മുംബൈ: ബോളിവുഡ് സിനിമകളുടെ ഇഷ്ടലൊക്കേഷനായി മുംബൈയിലെ റെയിൽവേ സ്റ്റേഷനുകൾ മാറുമ്പോൾ, റെയിൽവേയുടെ ഖജനാവിലേക്ക് ഒഴുകുന്നത് കോടികൾ. കഴിഞ്ഞ മൂന്ന് വർഷത്തിനിടെ സെൻട്രൽ, വെസ്റ്റേൺ റെയിൽവേകൾ സിനിമാ ഷൂട്ടിംഗിലൂടെ മാത്രം സ്വന്തമാക്കിയത് 6.31 കോടി രൂപയാണ്. യാത്രക്കാരുടെ തിരക്കിനിടയിലും ക്യാമറക്കണ്ണുകൾക്ക് പ്രിയപ്പെട്ട ഇടമായി മാറിയ റെയിൽവേ സ്റ്റേഷനുകൾ മികച്ച വരുമാന മാർഗമായി മാറിയിരിക്കുകയാണ്.
സിനിമാ ചിത്രീകരണത്തിലൂടെ ഏറ്റവും കൂടുതൽ ലാഭമുണ്ടാക്കിയത് സെൻട്രൽ റെയിൽവേയാണ്. കഴിഞ്ഞ മൂന്ന് സാമ്പത്തിക വർഷങ്ങളിലായി ഏകദേശം 4.39 കോടി രൂപയാണ് ഇവർക്ക് ലഭിച്ചത്. ഇതിൽ ചരിത്രപ്രസിദ്ധമായ ഛത്രപതി ശിവാജി മഹാരാജ് ടെർമിനസ് (CSMT) തന്നെയാണ് സിനിമക്കാരുടെ പ്രിയപ്പെട്ട ഇടം. മുംബൈയുടെ അടയാളമായ ഈ സ്റ്റേഷനിൽ ചിത്രീകരിക്കുന്ന സീനുകൾക്ക് ബോളിവുഡിൽ വലിയ ഡിമാൻഡാണുള്ളത്. പനവേൽ, ആപ്ത സ്റ്റേഷനുകളും സിനിമാ തിരക്കിൽ ഒട്ടും പിന്നിലല്ല.
വെസ്റ്റേൺ റെയിൽവേയ്ക്കും കഴിഞ്ഞ വർഷങ്ങളിൽ മികച്ച വരുമാനമാണ് ലഭിച്ചത്. ഏകദേശം 1.92 കോടി രൂപയാണ് ഇവർ സിനിമാ ഷൂട്ടിംഗിലൂടെ സമാഹരിച്ചത്. ചർച്ച്ഗേറ്റ് സ്റ്റേഷൻ ഉൾപ്പെടെയുള്ള പ്രമുഖ സ്റ്റേഷനുകൾ ചിത്രീകരണങ്ങൾക്കായി വിട്ടുനൽകിയതിലൂടെയാണിത്. 2023-24 സാമ്പത്തിക വർഷത്തിൽ മാത്രം ഷൂട്ടിംഗിൽ നിന്ന് റെയിൽവേയ്ക്ക് ലഭിച്ച വരുമാനത്തിൽ വലിയ വർധനവുണ്ടായിട്ടുണ്ട്.
യാത്രക്കാരെ ബുദ്ധിമുട്ടിക്കാതെ തന്നെ ഷൂട്ടിംഗ് നടത്താൻ കർശനമായ നിയന്ത്രണങ്ങളും റെയിൽവേ ഏർപ്പെടുത്തുന്നുണ്ട്. സ്റ്റേഷൻ പരിസരങ്ങൾക്കു പുറമെ ഓടുന്ന ട്രെയിനുകളിലും സ്റ്റേഷനിൽ നിർത്തിയിട്ടിരിക്കുന്ന കോച്ചുകളിലും ഷൂട്ടിംഗിനായി പ്രത്യേക അനുമതി നൽകുന്നു. ഷൂട്ടിംഗ് എളുപ്പമാക്കുന്നതിനായി ഏകജാലക സംവിധാനത്തിലൂടെ അനുമതി നൽകുന്ന രീതിയും നിലവിലുണ്ട്.
ബോളിവുഡിന് പുറമെ തെന്നിന്ത്യൻ സിനിമകളും വെബ് സീരീസുകളും പരസ്യചിത്രങ്ങളും മുംബൈയിലെ റെയിൽവേ ട്രാക്കുകളെ ലക്ഷ്യമിട്ടതോടെ വരും വർഷങ്ങളിൽ ഈ വരുമാനം ഇനിയും വർധിക്കുമെന്നാണ് അധികൃതരുടെ കണക്കുകൂട്ടൽ.
