മുംബൈ: ക്ഷയരോഗമുക്ത മുംബൈ എന്ന ലക്ഷ്യത്തോടെ വൻ ആരോഗ്യ ബോധവൽക്കരണ പരിപാടിക്ക് ചെമ്പൂരിലെ ശ്രീ നാരായണ ഗുരു കോളേജ് ഓഫ് കൊമേഴ്സ് ക്യാമ്പസ് വേദിയാകുന്നു. ‘ടിബി ഫ്രീ മുംബൈ കാമ്പെയ്ൻ (സ്ലം വാക്ക്)’ എന്ന പേരിൽ സംഘടിപ്പിക്കുന്ന ക്യാമ്പെയ്ൻ 2026 ജൂലൈ 29 ബുധനാഴ്ച രാവിലെ 11:00 മണിക്ക് നടക്കും.
മഹാരാഷ്ട്ര ലോക് ഭവൻ, മഹാരാഷ്ട്ര നാഷണൽ സർവീസ് സ്കീം (എൻഎസ്എസ്) സെൽ, മുംബൈ സർവകലാശാല, ബൃഹൻമുംബൈ മുൻസിപ്പൽ കോർപ്പറേഷൻ (എംസിജിഎം), ചെമ്പൂർ ശ്രീ നാരായണ ഗുരു കോളേജ് ഓഫ് കൊമേഴ്സ് എന്നിവർ സംയുക്തമായാണ് ഈ ബോധവൽക്കരണ പരിപാടി സംഘടിപ്പിക്കുന്നത്.
മഹാരാഷ്ട്ര ഗവർണർ ജിഷ്ണു ദേവ് വർമ്മ, മുംബൈ സർവകലാശാല വൈസ് ചാൻസലർ പ്രൊഫ. രവീന്ദ്ര ഡി. കുൽക്കർണി എന്നിവരും മറ്റ് പ്രമുഖരും ചടങ്ങിൽ പങ്കെടുക്കും. ക്ഷയരോഗ പ്രതിരോധം, രോഗം നേരത്തെ കണ്ടുപിടിക്കൽ, ക്ഷയരോഗമുക്ത മുംബൈ എന്ന ലക്ഷ്യം കൈവരിക്കുന്നതിൽ സമൂഹത്തിനുള്ള കൂട്ടായ ഉത്തരവാദിത്തം എന്നിവയെക്കുറിച്ച് ജനങ്ങളിൽ വിപുലമായ അവബോധം സൃഷ്ടിക്കുകയാണ് ഈ ക്യാമ്പെയ്നിലൂടെ ലക്ഷ്യമിടുന്നത്.
മുംബൈ സർവകലാശാലയ്ക്ക് കീഴിലുള്ള വിവിധ കോളേജുകളിൽ നിന്നായി ആയിരത്തോളം നാഷണൽ സർവീസ് സ്കീം (എൻഎസ്എസ്) വോളന്റിയർമാർ ഈ ബോധവൽക്കരണ പരിപാടിയിൽ പങ്കാളികളാകും. പൊതുജനാരോഗ്യത്തിലും സാമൂഹിക സേവനത്തിലുമുള്ള തങ്ങളുടെ പ്രതിബദ്ധത തെളിയിച്ചുകൊണ്ടാണ് ഇവർ അണിനിരക്കുന്നത്.
ശ്രീ നാരായണ മന്ദിര സമിതി ജനറൽ സെക്രട്ടറി ഒ.കെ. പ്രസാദ് ആണ് പത്രക്കുറിപ്പിലൂടെ ഈ കാര്യം അറിയിച്ചത്. കൂടുതൽ വിവരങ്ങൾക്ക് അഡ്മിൻ മാനേജർ ജീവൻ രാഗ് (7558029758), അസിസ്റ്റന്റ് മാനേജർ വിഷ്ണു എം.പി. (9867737713) എന്നിവരുമായി ബന്ധപ്പെടാവുന്നതാണ്.
