മത്സരപ്പാച്ചിലുകളുടെയും മടുപ്പിക്കുന്ന തിരക്കുകളുടെയും ലോകത്താണ് നമ്മൾ ജീവിക്കുന്നത്. രാവിലെ അലാറം അടിച്ചുണരുന്നതു മുതൽ രാത്രി ഉറങ്ങാൻ കിടക്കുന്നതു വരെ നീളുന്ന ഒരു വലിയ അങ്കലാപ്പ്. ഇതിനിടയിൽ എപ്പോഴെങ്കിലും നമ്മൾ സ്വന്തം ശരീരത്തിലേക്കോ മനസ്സിലേക്കോ ഒന്നു തിരിഞ്ഞു നോക്കാറുണ്ടോ? ഇല്ല എന്ന് ഉത്തരം പറയുന്ന ഭൂരിപക്ഷത്തിനുള്ള മറുപടിയാണ് അന്താരാഷ്ട്ര യോഗാദിനം. ആതുരാലയങ്ങളിലെ തിരക്കുകളിലേക്ക് നടന്നു കയറുന്നതിന് മുൻപ്, സ്വന്തം വീടിന്റെ ഉമ്മറത്തോ മുറിയിലോ ഒരു യോഗാമാറ്റ് വിരിക്കാൻ നമ്മൾ തയ്യാറായാൽ മാറുന്നത് ഒരു തലമുറയുടെ തന്നെ ആരോഗ്യ ചിത്രമാണ്.
യോഗ എന്നാൽ കേവലം കുറച്ച് ആസനങ്ങളോ കഠിനമായ ശാരീരിക വ്യായാമങ്ങളോ മാത്രമല്ല. അത് ശ്വാസത്തെയും ശരീരത്തെയും മനസ്സിനെയും ഒരേ താളത്തിൽ കോർത്തിണക്കുന്ന ഒരു കലയാണ്. ഇന്ന് ലോകമെമ്പാടും ഭീഷണിയായി മാറിക്കൊണ്ടിരിക്കുന്ന ലൈഫ് സ്റ്റൈൽ രോഗങ്ങളായ പ്രമേഹം, അമിത രക്തസമ്മർദ്ദം, അമിതവണ്ണം എന്നിവയെ ഒരു പരിധി വരെ തടഞ്ഞു നിർത്താൻ യോഗയെന്ന പ്രതിരോധ മരുന്നിനാകും. ജിമ്മിലെ കഠിനമായ വർക്കൗട്ടുകൾക്ക് സമയം കണ്ടെത്താൻ കഴിയാത്തവർക്ക് പോലും ദിവസവും ഒരു പത്തു മിനിറ്റ് യോഗയ്ക്കായി മാറ്റിവെച്ചാൽ അത് നൽകുന്ന ഊർജ്ജം ചെറുതല്ല.
സമ്മർദ്ദങ്ങളുടെ ലോകത്ത് മനസ്സിന് ശാന്തത
ആധുനിക കാലത്ത് മനുഷ്യൻ നേരിടുന്ന ഏറ്റവും വലിയ വില്ലൻ ‘സ്ട്രെസ്’ അഥവാ മാനസിക സമ്മർദ്ദമാണ്. ഐടി പ്രൊഫഷണലുകൾ മുതൽ വീട്ടമ്മമാരും വിദ്യാർത്ഥികളും വരെ ഇന്ന് ഇതിന്റെ ഇരകളാണ്. വിഷാദരോഗത്തിലേക്കും ആകുലതകളിലേക്കും വഴിമാറുന്ന മനസ്സുകളെ ശാന്തമാക്കാൻ യോഗയിലെ ‘പ്രാണായാമം’ (ശ്വസനക്രിയ) സഹായിക്കുമെന്ന് ശാസ്ത്രലോകം പോലും സമ്മതിക്കുന്നു. കൃത്യമായ ശ്വസനത്തിലൂടെ തലച്ചോറിലേക്കുള്ള ഓക്സിജന്റെ അളവ് വർദ്ധിക്കുകയും ഇത് മനസ്സിന് പെട്ടെന്ന് തന്നെ ആശ്വാസവും ഏകാഗ്രതയും പ്രധാനം ചെയ്യുകയും ചെയ്യും.
കംപ്യൂട്ടറിന് മുന്നിൽ മണിക്കൂറുകളോളം ഇരിക്കുന്നതു മൂലം ഉണ്ടാകുന്ന കഴുത്തുവേദന, നടുവേദന തുടങ്ങിയ ശാരീരിക അസ്വസ്ഥതകൾക്ക് യോഗയിലൂടെ ശാശ്വത പരിഹാരം കണ്ടെത്താനാകും. ശരീരത്തിന്റെ ഫ്ലെക്സിബിലിറ്റി വർദ്ധിപ്പിക്കുന്നതിനൊപ്പം തന്നെ ആന്തരികാവയവങ്ങളുടെ പ്രവർത്തനങ്ങളെ ഉത്തേജിപ്പിക്കാനും യോഗാസനങ്ങൾക്കാകും. പ്രായഭേദമന്യേ ആർക്കും ശീലിക്കാമെന്നതാണ് ഇതിന്റെ ഏറ്റവും വലിയ പ്രത്യേകത.
മാറ്റിവെക്കാം മൊബൈൽ ഫോൺ; ശീലിക്കാം യോഗ
രാവിലെ ഉണർന്നയുടൻ മൊബൈൽ സ്ക്രീനിലേക്ക് നോക്കുന്ന ശീലമാണ് ഇന്നത്തെ തലമുറയ്ക്കുള്ളത്. ആ ശീലത്തിന് പകരം സൂര്യനമസ്കാരത്തോടെ ഒരു ദിവസം ആരംഭിച്ചാൽ ഉണ്ടാകുന്ന മാറ്റം അത്ഭുതകരമായിരിക്കും. രോഗം വന്നതിന് ശേഷം ചികിത്സിക്കുന്നതിനേക്കാൾ നല്ലത് രോഗം വരാതെ നോക്കുന്നതാണെന്ന പഴഞ്ചൊല്ല് അന്വർത്ഥമാക്കുകയാണ് യോഗ. ഈ യോഗാദിനത്തിൽ നമുക്ക് ഒരു പുതിയ പ്രതിജ്ഞയെടുക്കാം; “ആരോഗ്യമുള്ള ഒരു ശരീരവും ശാന്തമായ ഒരു മനസ്സും എനിക്കായി ഞാൻ മാറ്റിവെക്കും.” തിരക്കുകൾക്ക് അല്പം അവധി നൽകി യോഗയെ ജീവിതത്തിന്റെ ഭാഗമാക്കൂ, ആരോഗ്യപൂർണ്ണമായ ഒരു നാളേയ്ക്കായി.
