ലണ്ടൻ: മദ്യപാനവും ആരോഗ്യവും സംബന്ധിച്ച് ലോകത്തെ ഞെട്ടിക്കുന്ന പുതിയ പഠന റിപ്പോർട്ട് പുറത്ത്. കഴിക്കുന്ന മദ്യത്തിന്റെ അളവ് മാത്രമല്ല, ഏതുതരം മദ്യമാണ് ഉപയോഗിക്കുന്നത് എന്നതും മരണനിരക്കിൽ നിർണായക സ്വാധീനം ചെലുത്തുന്നുണ്ടെന്നാണ് പുതിയ കണ്ടെത്തൽ. മുപ്പത്തിനാലായിരത്തിലധികം ആളുകളിൽ നടത്തിയ വലിയൊരു പഠനത്തിലാണ് വ്യത്യസ്തതരം മദ്യങ്ങൾ ആരോഗ്യത്തിലും ആയുസ്സിലും ഉണ്ടാക്കുന്ന വ്യത്യസ്തമായ മാറ്റങ്ങളെക്കുറിച്ചുള്ള വിവരങ്ങൾ പുറത്തുവന്നിട്ടുള്ളത്.

ഏതൊരു തരം മദ്യം ഉപയോഗിക്കുന്നവരായാലും അമിതമായി മദ്യം കഴിക്കുന്നത് മരണസാധ്യത വർദ്ധിപ്പിക്കുമെന്ന് പഠനം വ്യക്തമാക്കുന്നു. കാൻസർ, ഹൃദ്രോഗങ്ങൾ, മറ്റ് കാരണങ്ങൾ എന്നിവയാലുള്ള മരണനിരക്ക് ഉയർന്ന അളവിലുള്ള മദ്യപാനത്തിൽ വളരെ കൂടുതലാണെന്ന് പഠനത്തിൽ കണ്ടെത്തിയിട്ടുണ്ട്. എന്നാൽ കുറഞ്ഞ അളവിലും മിതമായ അളവിലും മദ്യം ഉപയോഗിക്കുന്നവരുടെ കാര്യത്തിൽ ചിത്രമാകെ വ്യത്യസ്തമാണ്.

കുറഞ്ഞ അളവിൽ വൈൻ ഉപയോഗിക്കുന്നവരിൽ മരണനിരക്ക് കുറവാണെന്നാണ് പഠനം കാണിക്കുന്നത്. മിതമായ അളവിൽ വൈൻ കുടിക്കുന്നവരിൽ ഹൃദ്രോഗം മൂലമുള്ള മരണസാധ്യത, മദ്യം തൊടാത്തവരുമായോ അപൂർവ്വമായി മാത്രം കഴിക്കുന്നവരുമായോ താരതമ്യം ചെയ്യുമ്പോൾ 21 ശതമാനം കുറവാണെന്ന് ഗവേഷകർ കണ്ടെത്തിയിട്ടുണ്ട്. ഇതിനു വിപരീതമായി, കുറഞ്ഞ അളവിലായാലും ബീർ, സൈഡർ, സ്പിരിറ്റ് തുടങ്ങിയവ ഉപയോഗിക്കുന്നവർക്ക് മരണസാധ്യത കൂടുതലാണെന്നാണ് കണക്കാക്കപ്പെട്ടിരിക്കുന്നത്.

മദ്യത്തിന്റെ തരത്തിനനുസരിച്ച് ഫലങ്ങളിൽ വ്യത്യാസമുണ്ടാകാൻ കാരണം ചില പ്രത്യേക ഘടകങ്ങളാകാമെന്ന് ഗവേഷകർ ചൂണ്ടിക്കാണിക്കുന്നു. ചുവന്ന വൈനിൽ അടങ്ങിയിരിക്കുന്ന പോളിഫെനോൾസ് (polyphenols), ആന്റിഓക്‌സിഡന്റുകൾ (antioxidants) തുടങ്ങിയ ഘടകങ്ങൾ ഹൃദയാരോഗ്യത്തിന് ഗുണം ചെയ്തേക്കാമെന്ന് കരുതുന്നു. കൂടാതെ, ആളുകളുടെ മദ്യപാന ശീലങ്ങളും മറ്റ് ജീവിതരീതികളും ഇതിൽ നിർണായക പങ്കുവഹിക്കുന്നുണ്ട്. ചെന്നിന്റെ അഭിപ്രായപ്രകാരം, മദ്യത്തിന്റെ തരം, അത് കഴിക്കുന്ന രീതി, അതോടൊപ്പമുള്ള ജീവിതശീലങ്ങൾ എന്നിവയെല്ലാം മരണനിരക്കിലെ വ്യത്യാസങ്ങൾക്ക് കാരണമാകുന്നുണ്ട്.

അതേസമയം, വൈൻ കുടിക്കുന്നത് കൊണ്ടുമാത്രം രോഗങ്ങളിൽ നിന്നും പൂർണ്ണമായ സംരക്ഷണം ലഭിക്കുമെന്ന് ഈ കണ്ടെത്തലുകളെ വ്യാഖ്യാനിക്കരുതെന്ന് ഗവേഷകർ കർശനമായി ഓർമ്മിപ്പിക്കുന്നു. വ്യക്തികൾ സ്വയം നൽകിയ വിവരങ്ങളുടെ അടിസ്ഥാനത്തിലാണ് പഠനം നടത്തിയത് എന്നതിനാൽ ഇതിന് ചില പരിമിതികളുണ്ടെന്നും വിദഗ്ദ്ധർ വ്യക്തമാക്കുന്നു. അമേരിക്കൻ കോളേജ് ഓഫ് കാർഡിയോളജിയുടെ വാർഷിക ശാസ്ത്രീയ സമ്മേളനത്തിലാണ് (ACC. 26) ഈ പഠന വിവരങ്ങൾ അവതരിപ്പിച്ചത്. ന്യൂട്രീഷൻ ജേണലിലും (Nutrition Journal) ഈ പഠനം പ്രസിദ്ധീകരിച്ചിട്ടുണ്ട്.