മുംബൈ: പ്രവാസി മലയാളികളുടെ പുതുതലമുറയ്ക്ക് മാതൃഭാഷയുടെ മധുരവും സംസ്‌കാരവും പകർന്നുനൽകാൻ ലക്ഷ്യമിട്ട് കേരള സർക്കാർ നടപ്പിലാക്കുന്ന ‘മലയാളം മിഷൻ’ മുംബൈ ചാപ്റ്ററിന്റെ പ്രവർത്തനങ്ങൾ പതിനഞ്ചാം വർഷത്തിലേക്ക്. അന്യനാടുകളിൽ ജീവിക്കുന്നവർക്കായി സർക്കാർ തലത്തിൽ നടത്തുന്ന ലോകത്തിലെ തന്നെ പ്രഥമ സംരംഭമായ മലയാളം മിഷന്റെ ഭാഗമായി, ഈ വർഷത്തെ ഗൃഹസന്ദർശന മാസത്തിനും പ്രവേശനോത്സവത്തിനും മുംബൈയിൽ തുടക്കമാവുകയാണ്. ജൂലൈ 1 മുതൽ 31 വരെയാണ് ഗൃഹസന്ദർശന മാസം. ഇതിലൂടെ കണ്ടെത്തുന്ന പുതിയ പഠിതാക്കളെ ഉൾപ്പെടുത്തി ആഗസ്റ്റ് 9-ന് മേഖലാ തലങ്ങളിൽ പ്രവേശനോത്സവം സംഘടിപ്പിക്കും.

നിസ്വാർത്ഥ സേവനമനുഷ്ഠിക്കുന്ന അധ്യാപകരും, വിവിധ മലയാളി സമാജങ്ങളും ഇതര സംഘടനകളും നൽകുന്ന പിന്തുണയുമാണ് മുംബൈയിൽ മലയാളം മിഷന്റെ വിജയത്തിന് പിന്നിൽ. മഹാമാരിയുടെ കാലത്തും മറ്റും ക്ലാസുകളിൽ നിന്ന് മാറിനിന്ന കുട്ടികളെയും രക്ഷിതാക്കളെയും അധ്യാപകരെയും തിരികെ കൊണ്ടുവരുന്നതിനും, പുതിയ പഠിതാക്കളെ കണ്ടെത്തുന്നതിനുമായാണ് വിപുലമായ ഗൃഹസന്ദർശന പരിപാടി ആസൂത്രണം ചെയ്തിരിക്കുന്നത്. എല്ലാ വർഷവും ഇത്തരത്തിൽ ഗൃഹസന്ദർശനം നടത്തി പുതിയ പഠിതാക്കളെ ഭാഷാപഠനത്തിലേക്ക് ക്ഷണിക്കുന്ന ഏക ചാപ്റ്റർ മുംബൈ ആണെന്നത് ഈ സാംസ്‌കാരിക കൂട്ടായ്മയുടെ സവിശേഷതയാണ്.

അംഗീകാരങ്ങളുടെ നിറവിൽ മുംബൈ ചാപ്റ്റർ

മികച്ച പ്രവർത്തനങ്ങൾ കാഴ്ചവെയ്ക്കുന്ന മുംബൈ ചാപ്റ്റർ 2023-ൽ ഏറ്റവും മികച്ച ചാപ്റ്ററിനുള്ള ‘കണിക്കൊന്ന പുരസ്കാരം’ സ്വന്തമാക്കിയിരുന്നു. കൂടാതെ, മികച്ച അധ്യാപകർക്ക് നൽകുന്ന ‘ബോധി അധ്യാപക പുരസ്കാരം’ 2025-ൽ മുംബൈ ചാപ്റ്ററിലെ നിഷ പ്രകാശ് നേടുകയുണ്ടായി. വിജയശതമാനത്തിലും മുംബൈ ഏറെ മുന്നിലാണ്. 2024 മാർച്ചിൽ നടന്ന പ്രഥമ നീലക്കുറിഞ്ഞി പരീക്ഷയിൽ 21 പേരും, 2025 ജൂണിൽ നടന്ന പരീക്ഷയിൽ 19 പേരും ഉന്നത വിജയം കരസ്ഥമാക്കി. വരാനിരിക്കുന്ന 2026 ജൂലൈയിലെ പരീക്ഷയിലും മികച്ച വിജയം ചാപ്റ്റർ പ്രതീക്ഷിക്കുന്നു.

കോഴ്സുകളും പുതിയ തൊഴിൽ സാധ്യതകളും

മലയാളം മിഷൻ ആകെ നാല് കോഴ്സുകളാണ് നടത്തിവരുന്നത്. 6 വയസ്സ് പൂർത്തിയായവർക്ക് ചേരാവുന്ന പ്രാഥമിക കോഴ്സായ കണിക്കൊന്ന (2 വർഷം), തുടർന്ന് സൂര്യകാന്തി (2 വർഷം), ആമ്പൽ (3 വർഷം), നീലക്കുറിഞ്ഞി (3 വർഷം) എന്നിവയാണ് കോഴ്സുകൾ. അവസാന കോഴ്സായ നീലക്കുറിഞ്ഞി വിജയകരമായി പൂർത്തിയാക്കുന്നവർക്ക് കേരള പാഠാവലിയുടെ പത്താം ക്ലാസിന് തുല്യതയുള്ള കേരള സർക്കാരിന്റെ സർട്ടിഫിക്കറ്റ് ലഭിക്കും. കേരള സർക്കാരിന്റെ കെ.എ.എസ്, പി.എസ്.സി പരീക്ഷകളിൽ മാതൃഭാഷാ പ്രാവീണ്യം നിർബന്ധമാക്കിയ സാഹചര്യത്തിൽ, ഈ കോഴ്സ് വിജയിക്കുന്നവർക്ക് പുതിയ തൊഴിൽ സാധ്യതകളും തുറന്നു കിട്ടുന്നുണ്ട്.

​’എവിടെയെല്ലാം മലയാളി, അവിടെയെല്ലാം മലയാളം’ എന്ന ലക്ഷ്യം സഫലമാക്കാനുള്ള ഈ പ്രവർത്തനങ്ങളിൽ രക്ഷകർത്താക്കളുടെയും മലയാളി സമാജങ്ങളുടെയും മറ്റ് സംഘടനകളുടെയും ഭാഷാസ്‌നേഹികളുടെയും പൂർണ്ണ സഹകരണം ഭാരവാഹികൾ അഭ്യർത്ഥിച്ചു. കൂടുതൽ വിവരങ്ങൾക്ക് മേഖല ഭാരവാഹികളുമായോ 9970164635, 9892690978, 7506046031 എന്നീ നമ്പറുകളിലോ ബന്ധപ്പെടാവുന്നതാണെന്ന് മലയാളം മിഷൻ മുംബൈ ചാപ്റ്റർ പ്രസിഡന്റ് ആർ. ഡി. ഹരികുമാർ, സെക്രട്ടറി റീന സന്തോഷ് എന്നിവർ അറിയിച്ചു.