പട്ന: പട്നയിൽ നിന്ന് ലക്നൗവിലേക്ക് പോവുകയായിരുന്ന ഇൻഡിഗോ വിമാനത്തിന് (ഫ്ലൈറ്റ് നമ്പർ 6E925) 17,000 അടി ഉയരത്തിൽ വച്ച് മിന്നലേറ്റു. തുടർന്ന് വിമാനം ലക്നൗ വിമാനത്താവളത്തിൽ അടിയന്തര ലാൻഡിങ് നടത്തി. ഇടിമിന്നലിൽ വിമാനത്തിന്റെ മുൻഭാഗത്തിന് (nose section) കേടുപാടുകൾ സംഭവിച്ചു.
വിമാനത്തിലുണ്ടായിരുന്ന 104 യാത്രക്കാരും 6 ജീവനക്കാരും ഉൾപ്പെടെ 110 പേരും സുരക്ഷിതരാണ്. സംഭവത്തിൽ ആർക്കും പരിക്കേറ്റിട്ടില്ല. നിശ്ചയിച്ച സമയത്തിനും 8 മിനിറ്റ് മുൻപ് വൈകുന്നേരം 4:05-ഓടെ വിമാനം ലക്നൗവിൽ സുരക്ഷിതമായി ഇറക്കി.
മോശം കാലാവസ്ഥയിൽപ്പെട്ടതിനെ തുടർന്ന് വിമാനത്തിന് ചെറിയ തകരാർ സംഭവിച്ചതാണെന്നും യാത്രക്കാരെല്ലാം സുരക്ഷിതരാണെന്നും ഇൻഡിഗോ വക്താവ് അറിയിച്ചു. സംഭവത്തിൽ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) അന്വേഷണം പ്രഖ്യാപിച്ചു. കൃത്യമായ പരിശോധനയ്ക്കും ക്ലിയറൻസിനും ശേഷം മാത്രമേ ഇനി വിമാനം പറക്കാൻ അനുവദിക്കൂ.
