നവി മുംബൈ: കല-സാംസ്കാരിക രംഗങ്ങളിലെ സജീവ സാന്നിധ്യമായ കോപ്പർഖൈർനെ ന്യൂ ബോംബെ കൾച്ചറൽ സെന്റർ (NBCC) സമൂഹത്തിലെ നിർദ്ധനരായ വിദ്യാർത്ഥികൾക്കായി കാരുണ്യഹസ്തം നീട്ടുന്നു. സംഘടനയുടെ ആഭിമുഖ്യത്തിൽ ഈ വരുന്ന ഞായറാഴ്ച (ജൂൺ 21) രാവിലെ 11:00 മണിക്ക് നിർദ്ധനരായ കുട്ടികൾക്കായുള്ള പഠനോപകരണ വിതരണ ചടങ്ങ് സംഘടിപ്പിക്കും. കോർപ്പറേറ്റർ ഭാരതി പാട്ടീൽ മുഖ്യാതിഥിയായി പങ്കെടുത്ത് പദ്ധതിയുടെ ഉദ്ഘാടനം നിർവ്വഹിക്കും.

നൂറിലധികം കുട്ടികൾക്ക് സ്കൂൾ കിറ്റുകൾ

പഠനവഴിയിൽ സാമ്പത്തിക പ്രതിസന്ധികൾ നേരിടുന്ന നൂറിലധികം വിദ്യാർത്ഥികൾക്കാണ് എൻ.ബി.സി.സിയുടെ നേതൃത്വത്തിൽ സ്കൂൾ ബാഗ്, കുട, പുസ്തകങ്ങൾ എന്നിവയടങ്ങുന്ന കിറ്റുകൾ സൗജന്യമായി വിതരണം ചെയ്യുന്നത്.

​”കലയും സംസ്കാരവും പ്രോത്സാഹിപ്പിക്കുന്നതിനൊപ്പം തന്നെ സമൂഹത്തോടുള്ള കടമ കൂടിയാണ് ഇത്തരം ജീവകാരുണ്യ പ്രവർത്തനങ്ങൾ. കോവിഡ് കാലഘട്ടത്തിന് ശേഷവും സാമ്പത്തിക ബുദ്ധിമുട്ടുകൾ അനുഭവിക്കുന്ന നിരവധി കുടുംബങ്ങളുണ്ട്. അത്തരം സാഹചര്യങ്ങളെ തിരിച്ചറിഞ്ഞുകൊണ്ടാണ് നിർദ്ധനരായ കുട്ടികൾക്ക് താങ്ങാകാൻ ഞങ്ങൾ മുന്നിട്ടിറങ്ങിയത്.”
— മാളവിക മനോജ് (ജനറൽ സെക്രട്ടറി, എൻ.ബി.സി.സി)പറഞ്ഞു.

നവി മുംബൈയിലെ പ്രമുഖ മലയാളി സമാജങ്ങളിലൊന്നായ ന്യൂ ബോംബെ കൾച്ചറൽ സെന്റർ, പ്രവാസലോകത്ത് മലയാള തനിമ നിലനിർത്തുന്നതിനൊപ്പം തന്നെ സാമൂഹിക പ്രതിബദ്ധതയുള്ള ഇത്തരം കാരുണ്യ പ്രവർത്തനങ്ങൾക്കും എന്നും മുൻഗണന നൽകുമെന്നും ഭാരവാഹികൾ അറിയിച്ചു.