ദുബായിൽ വ്യോമ പ്രതിരോധ സംവിധാനം ഡ്രോണുകൾ വിജയകരമായി തടഞ്ഞതായി അധികൃതർ അറിയിച്ചു. ആക്രമണശ്രമം തടഞ്ഞുവെങ്കിലും തകർത്ത ഡ്രോണുകളുടെ അവശിഷ്ടങ്ങൾ രണ്ടു വീടുകളുടെ മുറ്റത്ത് വീണതിനെ തുടർന്ന് രണ്ട് പേർക്ക് പരിക്കേറ്റു.
സംഭവം സ്ഥിരീകരിച്ച് അധികൃതർ അറിയിച്ചു: പരിക്കേറ്റവരെ ഉടൻ ആശുപത്രിയിലേക്ക് മാറ്റി ചികിത്സ നൽകി. ഗുരുതരമായ പരിക്കുകളൊന്നുമില്ല. ഇരുവരുടെയും ആരോഗ്യനില തൃപ്തികരമാണെന്ന് ആശുപത്രിവൃത്തങ്ങൾ വ്യക്തമാക്കി.
ദുബായ് നഗരത്തിലെ ചില ഭാഗങ്ങളിൽ കേട്ട ശക്തമായ ശബ്ദങ്ങൾ വ്യോമ പ്രതിരോധ സംവിധാനം പ്രവർത്തിച്ചതിന്റെ ഫലമാണെന്ന് വിശദീകരിച്ചു. ഡ്രോണുകൾ ലക്ഷ്യത്തിലെത്തുന്നതിന് മുൻപേ തന്നെ തകർത്തതിനാൽ വലിയ ദുരന്തം ഒഴിവായെന്നും അധികൃതർ അറിയിച്ചു.
യുണൈറ്റഡ് അറബ് എമിറേറ്റ്സ് ഭരണകൂടം ജനങ്ങളോട് ജാഗ്രത പാലിക്കണമെന്ന് അഭ്യർഥിച്ചു. ഔദ്യോഗിക കേന്ദ്രങ്ങൾ പുറത്തുവിടുന്ന വിവരങ്ങൾ മാത്രമേ വിശ്വസിക്കാവൂ. സ്ഥിരീകരിക്കാത്ത വാർത്തകളും ദൃശ്യങ്ങളും സാമൂഹ്യമാധ്യമങ്ങളിൽ പ്രചരിപ്പിക്കരുതെന്നും മുന്നറിയിപ്പ് നൽകി.
സംഭവത്തെ തുടർന്ന് പ്രദേശത്ത് സുരക്ഷ ശക്തമാക്കിയിട്ടുണ്ട്. സ്ഥിതി പൂർണ നിയന്ത്രണത്തിലാണെന്നും പൊതുജനങ്ങൾ ആശങ്കപ്പെടേണ്ട സാഹചര്യമില്ലെന്നും അധികൃതർ വ്യക്തമാക്കി.
