മുംബൈ: മഹാരാഷ്ട്രയിൽ നിന്ന് ഒഴിവ് വരുന്ന രാജ്യസഭ സീറ്റുകളിലേക്ക് കേന്ദ്രമന്ത്രി രാംദാസ് അതാവലെയും ബിജെപി നേതാവ് വിനോദ് താവ്ഡെയും സ്ഥാനാർത്ഥികളായി ബിജെപി പ്രഖ്യാപിച്ചു. പാർട്ടി കേന്ദ്രനേതൃത്വമാണ് ഇരുവരുടെയും പേരുകൾ ഔദ്യോഗികമായി പ്രഖ്യാപിച്ചത്.
കേന്ദ്ര സാമൂഹ്യനീതി–ശാക്തീകരണ സഹമന്ത്രിയും റിപ്പബ്ലിക്കൻ പാർട്ടി ഓഫ് ഇന്ത്യ (അത്താവലെ വിഭാഗം) നേതാവുമായ രാംദാസ് അത്താവലെ നിലവിൽ രാജ്യസഭാംഗമാണ്. എൻഡിഎ സഖ്യത്തിലെ പ്രധാന നേതാവായ അദ്ദേഹത്തെ വീണ്ടും രാജ്യസഭയിലേക്ക് അയയ്ക്കാനാണ് തീരുമാനം.
ബിജെപി ദേശീയ ജനറൽ സെക്രട്ടറിയും മഹാരാഷ്ട്രയിലെ മുതിർന്ന നേതാവുമായ വിനോദ് താവ്ഡെ പാർട്ടിയുടെ മറ്റൊരു സ്ഥാനാർത്ഥിയാണ്. സംസ്ഥാന രാഷ്ട്രീയത്തിൽ ദീർഘകാലമായി സജീവമായ നേതാക്കളിൽ ഒരാളാണ് അദ്ദേഹം.
മഹാരാഷ്ട്രയിൽ ഒഴിവാകുന്ന രാജ്യസഭ സീറ്റുകളിലേക്ക് നടക്കുന്ന തിരഞ്ഞെടുപ്പിനായാണ് ബിജെപി ഈ തീരുമാനം പ്രഖ്യാപിച്ചത്. സഖ്യരാഷ്ട്രീയത്തിലെ സമവാക്യങ്ങൾ കണക്കിലെടുത്താണ് സ്ഥാനാർത്ഥികളെ തെരഞ്ഞെടുത്തതെന്ന് പാർട്ടി വൃത്തങ്ങൾ അറിയിച്ചു.