മുംബൈ: ജയിലിൽ താൻ അനുഭവിച്ച കഠിനമായ ദുരിതങ്ങളെയും പ്രതിസന്ധികളെയും കുറിച്ച് തുറന്നുപറഞ്ഞ് ബോളിവുഡ് സൂപ്പർതാരം സൽമാൻ ഖാൻ. സഹോദരൻ സൊഹൈൽ ഖാനെ പിന്തുണയ്ക്കുന്നതിനായി പ്രൈം വീഡിയോയിലെ ‘അലയൻസ്’ എന്ന റിയാലിറ്റി ഷോയിൽ അതിഥിയായെത്തിയപ്പോഴാണ് താരം തന്റെ പഴയ ജയിൽ അനുഭവങ്ങൾ വെളിപ്പെടുത്തിയത്.

വർഷങ്ങൾക്ക് മുമ്പ് ജയിലിൽ കഴിയേണ്ടി വന്നപ്പോഴുള്ള ദാരുണമായ സാഹചര്യങ്ങളാണ് സൽമാൻ ഖാൻ പങ്കുവെച്ചത്. “വർഷങ്ങൾക്ക് മുമ്പ് ഞാൻ ജയിലിൽ പോയപ്പോൾ ഞങ്ങൾക്ക് മുന്നിൽ കമ്പികളുണ്ടായിരുന്നു. വളരെ ചെറിയൊരു സ്ഥലത്ത് 50 ഉം 60 ഉം 70 ഉം ആളുകളാണ് ഉണ്ടായിരുന്നത്. ഒരൊറ്റ ശൗചാലയം മാത്രമാണ് അവിടെയുണ്ടായിരുന്നത്, അതും ഇന്ത്യൻ ശൈലിയിലുള്ള കമ്മോഡ്. ചിലപ്പോൾ അവിടെ പല്ലികളുണ്ടാകും, അതിനേക്കാളൊക്കെ ഉപരി അത് മുകളറ്റം വരെ നിറഞ്ഞു കവിഞ്ഞ നിലയിലായിരുന്നു,” സൽമാൻ വ്യക്തമാക്കി. സൽമാന്റെ ഈ തുറന്നുപറച്ചിൽ സഹോദരൻ സൊഹൈൽ ഖാനെയും മറ്റു മത്സരാർത്ഥികളെയും തീർത്തും വികാരാധീനരാക്കി.

1998-ലെ കൃഷ്ണമൃഗത്തെയും ചിങ്കാരയെയും വേട്ടയാടിയ കേസുകളുമായി ബന്ധപ്പെട്ട് സൽമാൻ ഖാൻ മുമ്പ് ജയിലിലും പോലീസ് കസ്റ്റഡിയിലും കഴിഞ്ഞിട്ടുണ്ട്. വിവിധ ഘട്ടങ്ങളിലായി ഏകദേശം 18 ദിവസത്തോളമാണ് താരം തടവിൽ കഴിഞ്ഞത്. കുന്നൽ ഖേമു അവതാരകനായ ‘അലയൻസ്’ എന്ന ഷോയിൽ പങ്കെടുത്ത സൊഹൈൽ ഖാന് പ്രയാസകരമായ ഒരു ആഴ്ച കടന്നുപോയതിന് പിന്നാലെയാണ് സൽമാൻ ഖാൻ ഷോയിലേക്ക് എത്തിയത്.

നേരത്തെയും ജയിൽവാസത്തെ കുറിച്ച് സൽമാൻ പ്രതികരിച്ചിട്ടുണ്ട്. 2008-ൽ ‘ഓൺ ദി കൗച്ച് വിത്ത് കോയൽ’ എന്ന പരിപാടിയിൽ പങ്കെടുത്തപ്പോൾ, തെറ്റ് ചെയ്തിട്ടില്ലെന്ന് ബോധ്യമുള്ളപ്പോൾ തലയുയർത്തിത്തന്നെ ജയിലിൽ പോകാമെന്നും അവിടെയുള്ള ശൗചാലയവും മാലിന്യക്കൂമ്പാരവും മാത്രമായിരുന്നു പ്രധാന പ്രശ്നമെന്നും താരം വ്യക്തമാക്കിയിരുന്നു. സൊഹൈൽ ഖാൻ ചെറുപ്പത്തിൽ നേരിട്ട ലൈംഗിക അധിക്രമത്തെ കുറിച്ച് അടുത്തിടെ ഈ ഷോയിൽ തുറന്നുപറഞ്ഞതും വലിയ ചർച്ചയായിരുന്നു.