ഗാന്ധിനഗർ: ഗുജറാത്തിലെ മാഞ്ചൽപൂർ നിയമസഭാ മണ്ഡലത്തിലേക്ക് നടന്ന ഉപതിരഞ്ഞെടുപ്പിൽ ഭരണകക്ഷിയായ ബി.ജെ.പിക്ക് വൻ വിജയം. കോൺഗ്രസ് സ്ഥാനാർത്ഥി ഭികാഭായ് രബാരിയെ 30,000-ത്തിലധികം വോട്ടുകളുടെ വൻ ഭൂരിപക്ഷത്തിൽ പരാജയപ്പെടുത്തി ബി.ജെ.പിയുടെ സതീഷ് പട്ടേൽ (സതീന്ദ്രഭായ് പട്ടേൽ) തകർപ്പൻ വിജയം നേടി. ഇതോടെ തങ്ങളുടെ പരമ്പരാഗത കോട്ടയായ മാഞ്ചൽപൂർ ബി.ജെ.പി വിജയകരമായി നിലനിർത്തി.
മുതിർന്ന ബി.ജെ.പി നേതാവും മുൻ മന്ത്രിയുമായിരുന്ന യോഗേഷ് പട്ടേലിന്റെ നിര്യാണത്തെ തുടർന്നാണ് മാഞ്ചൽപൂർ മണ്ഡലത്തിൽ ഉപതിരഞ്ഞെടുപ്പ് വേണ്ടിവന്നത്. തുടർച്ചയായി എട്ട് തവണ എം.എൽ.എയായിരുന്ന യോഗേഷ് പട്ടേലിന്റെ വേർപാടിന് ശേഷം നടന്ന തിരഞ്ഞെടുപ്പിൽ, വയോധികനായ നേതാവിന്റെ വികസന പ്രവർത്തനങ്ങൾ പൂർത്തിയാക്കുമെന്ന വാഗ്ദാനവുമായാണ് സതീഷ് പട്ടേൽ ജനവിധി തേടിയത്.
വോട്ടെണ്ണലിന്റെ ആദ്യ ഘട്ടങ്ങൾ മുതൽ തന്നെ വ്യക്തമായ ആധിപത്യം പുലർത്തിയ സതീഷ് പട്ടേൽ, കോൺഗ്രസിന്റെ എല്ലാ കണക്കുകൂട്ടലുകളും തെറ്റിച്ചാണ് കൂറ്റൻ ഭൂരിപക്ഷം സ്വന്തമാക്കിയത്. വഡോദ്ര മുൻസിപ്പൽ കോർപ്പറേഷൻ കൗൺസിലറായും ബി.ജെ.പി ജില്ലാ പ്രസിഡന്റായും പ്രവർത്തിച്ചിട്ടുള്ള വ്യക്തിയാണ് വിജയിച്ച സതീഷ് പട്ടേൽ. ജനങ്ങൾ നൽകിയ ശക്തമായ പിന്തുണയ്ക്ക് അദ്ദേഹം നന്ദി അറിയിച്ചു.
