മുംബൈ: മഹാരാഷ്ട്രയിൽ മലേറിയ കേസുകൾ ഏറ്റവും കൂടുതലായി രേഖപ്പെടുത്തുന്ന ഹോട്ട്സ്പോട്ടായി മുംബൈ മാറിയതായി ഔദ്യോഗിക കണക്കുകൾ. ദിവസേന ശരാശരി 28 പേർക്ക് മലേറിയ സ്ഥിരീകരിക്കപ്പെടുന്നതായി റിപ്പോർട്ട് വ്യക്തമാക്കുന്നു. കഴിഞ്ഞ മൂന്ന് വർഷത്തിനിടെ കേസുകളിൽ ഏകദേശം 39 ശതമാനം വർധനവാണ് ഉണ്ടായത്.
മഴക്കാലത്തോട് അനുബന്ധിച്ച് കൊതുക് വ്യാപനം ശക്തമാകുന്നതും നഗരത്തിലെ ചില പ്രദേശങ്ങളിലെ ശുചിത്വക്കുറവും രോഗവ്യാപനത്തിന് പ്രധാന കാരണങ്ങളായി ആരോഗ്യ വകുപ്പ് വിലയിരുത്തുന്നു. പ്രത്യേകിച്ച് കുടിവെള്ളം കെട്ടിനിൽക്കുന്ന ഇടങ്ങളും നിർമാണപ്രദേശങ്ങളും മലേറിയ വ്യാപനത്തിന് അനുകൂല സാഹചര്യങ്ങൾ സൃഷ്ടിക്കുന്നതായി അധികൃതർ മുന്നറിയിപ്പ് നൽകുന്നു.
സ്ഥിതിഗതികൾ നിയന്ത്രണ വിധേയമാക്കുന്നതിനായി നിരീക്ഷണവും പ്രതിരോധ നടപടികളും ശക്തമാക്കിയതായി ആരോഗ്യ വകുപ്പ് അറിയിച്ചു. വീടുകളും പരിസരവും ശുചിയായി സൂക്ഷിക്കുക, വെള്ളം കെട്ടിനിൽക്കുന്നത് ഒഴിവാക്കുക തുടങ്ങിയ മുൻകരുതലുകൾ കർശനമായി പാലിക്കണമെന്ന് പൊതുജനങ്ങളോട് അധികൃതർ അഭ്യർത്ഥിച്ചു.
