മുംബൈ: ഇന്ത്യക്കാരുടെ ചായപ്രേമം കേവലം ഒരു ശീലത്തിനപ്പുറം പുതിയൊരു സംസ്കാരമായി മാറുന്നതായി പ്രമുഖ ക്വിക്ക് കൊമേഴ്സ് പ്ലാറ്റ്‌ഫോമായ ഇൻസ്റ്റാമാർട്ടിന്റെ (Instamart) ഏറ്റവും പുതിയ പഠന റിപ്പോർട്ട്. രാജ്യത്തെ ചായപ്രേമികളായ നഗരങ്ങളുടെ പട്ടികയിൽ സാമ്പത്തിക തലസ്ഥാനമായ മുംബൈ രണ്ടാം സ്ഥാനം സ്വന്തമാക്കി. ഐടി നഗരമായ ബംഗളൂരുവാണ് ചായ ഉപഭോഗത്തിൽ ഇന്ത്യയിൽ ഒന്നാം സ്ഥാനത്തുള്ളത്. ഹൈദരാബാദാണ് പട്ടികയിൽ മൂന്നാമത്.

രാജ്യത്തെ 130-ലധികം നഗരങ്ങളിൽ നിന്നുള്ള വിവരങ്ങൾ വിശകലനം ചെയ്ത് തയ്യാറാക്കിയ ഈ റിപ്പോർട്ട് അനുസരിച്ച്, പരമ്പരാഗത ചായകൾക്കൊപ്പം പുതിയ രുചിക്കൂട്ടുകളും റെഡി-ടു-ഡ്രിങ്ക് (Ready-to-drink – RTD) പാനീയങ്ങളും ഇന്ത്യൻ വിപണിയിൽ വൻ മുന്നേറ്റമാണ് നടത്തുന്നത്.

വിപണി പിടിച്ചടക്കി റെഡി-ടു-ഡ്രിങ്ക് പാനീയങ്ങളും ഫ്രൂട്ട് ചായകളും

യുവതലമുറയുടെ മാറുന്ന ജീവിതശൈലിയും ആരോഗ്യ സംരക്ഷണ ചിന്തകളും ചായ വിപണിയിലും വലിയ പ്രതിഫലനമാണ് ഉണ്ടാക്കുന്നത്. കുടിക്കാൻ പാകത്തിൽ കുപ്പികളിലും കാനുകളിലും ലഭിക്കുന്ന ‘റെഡി-ടു-ഡ്രിങ്ക്’ ചായകൾക്ക് മുൻവർഷത്തെ അപേക്ഷിച്ച് 109 ശതമാനത്തിന്റെ വൻ വളർച്ചയാണ് രേഖപ്പെടുത്തിയത്.

​പഴങ്ങളുടെ രുചിയുള്ള ചായകളോടാണ് (Fruit-infused teas) നഗരങ്ങളിലെ യുവാക്കൾക്ക് കൂടുതൽ പ്രിയം. ഇതിൽ തന്നെ ‘പീച്ച് ചായ’ (Peach tea) വില്പനയിൽ 62 മടങ്ങ് വർദ്ധനവാണ് ഉണ്ടായത്. ഇതിനുപുറമേ ബ്ലൂ പീ (Blue pea), തുളസി, ഗ്രീൻ ടീ, കൊമ്പൂച്ച (Kombucha) തുടങ്ങിയ വെൽനസ് ചായകളും വിപണിയിൽ വലിയ ജനപ്രീതി നേടുന്നുണ്ട്.

ഇപ്പോഴും താരം ഇഞ്ചി ചായ തന്നെ!

പുതുപുത്തൻ രുചികൾ വിപണിയിൽ തരംഗമാകുമ്പോഴും ഇന്ത്യക്കാരുടെ മനസ്സ് ഇപ്പോഴും പരമ്പരാഗത ചായകൾക്കൊപ്പം തന്നെയാണ്. രാജ്യത്ത് ഏറ്റവും കൂടുതൽ ആളുകൾ ഓർഡർ ചെയ്തത് ഇഞ്ചി ചായയാണ് (Adrak Chai). പ്ലെയിൻ ബ്ലാക്ക് ടീ, ഏലയ്ക്കാ ചായ, ഗ്രീൻ ടീ, മസാല ചായ എന്നിവയാണ് തൊട്ടുപിന്നാലെയുള്ളത്. ഇന്ത്യയിലെ ഏത് പ്രമുഖ നഗരമെടുത്താലും ഇഞ്ചി ചായയ്ക്കുള്ള ജനപ്രീതി ഒട്ടും കുറഞ്ഞിട്ടില്ലെന്ന് റിപ്പോർട്ട് വ്യക്തമാക്കുന്നു.

അവധിദിനങ്ങളിലെ ചായ കുടി

​ആഴ്ചാവസാനങ്ങളിലാണ് രാജ്യത്ത് ചായ ഓർഡറുകൾ ഏറ്റവും കൂടുതൽ ഉയരുന്നത്. ചായ വില്പനയിൽ ഞായറാഴ്ചയാണ് ഏറ്റവും മുന്നിൽ. ശനി, വ്യാഴം ദിവസങ്ങളാണ് തൊട്ടുപിന്നാലെയുള്ളത്. ആളുകൾ ഒഴിവുസമയങ്ങൾ ആസ്വദിക്കുന്നതിന്റെ ഭാഗമായി ചായയെ കൂടെക്കൂട്ടുന്നു എന്നാണ് ഈ കണക്കുകൾ സൂചിപ്പിക്കുന്നത്.

വൻനഗരങ്ങൾക്ക് പുറമേ ചെറുകിട നഗരങ്ങളിലും ചായ ഉപഭോഗം അതിവേഗം വർദ്ധിക്കുകയാണ്. ഭുവനേശ്വറിൽ ചായ ഓർഡറുകളിൽ 64 ശതമാനം വളർച്ച രേഖപ്പെടുത്തിയപ്പോൾ, കേരളത്തിൽ നിന്നുള്ള തിരുവനന്തപുരവും കൊച്ചിയും ഈ വളർച്ചാ നിരക്കിൽ തൊട്ടുപിന്നാലെയുണ്ട്. ഭാരതത്തിന്റെ ചായ സംസ്കാരം പരമ്പരാഗത തനിമ നിലനിർത്തിക്കൊണ്ടുതന്നെ വലിയൊരു വിപ്ലവത്തിലൂടെയാണ് കടന്നുപോകുന്നതെന്ന് ഇൻസ്റ്റാമാർട്ടിന്റെ ഈ പുതിയ കണക്കുകൾ അടിവരയിടുന്നു.