റായ്ഗഡ് (മുംബൈ): മഹാരാഷ്ട്രയിലെ റായ്ഗഡ് ജില്ലയിൽ നാടിനെ നടുക്കിയ ഇരട്ടക്കൊലപാതകം. കാർജാത് താലൂക്കിലെ പത്താരവടി ഗ്രാമത്തിൽ പ്രായമായ ദമ്പതികളെ വീടിനുള്ളിൽ കഴുത്തറുത്തു കൊലപ്പെടുത്തിയ നിലയിൽ കണ്ടെത്തി. ഭഗവാൻ പാട്ടീൽ (68), ഭാര്യ ചംപൂഭായ് പാട്ടീൽ (65) എന്നിവരാണ് ക്രൂരമായി കൊല്ലപ്പെട്ടത്. മൃതദേഹങ്ങളുടെ മുഖത്ത് ചാരം വാരിപ്പൂശിയ നിലയിലായിരുന്നു. കൊലപാതകത്തിന് പിന്നിൽ നിധി തപ്പുന്ന സംഘങ്ങളോ അന്ധവിശ്വാസങ്ങളുമായി ബന്ധപ്പെട്ട ദുരൂഹതകളോ ആകാം എന്ന സംശയത്തിലാണ് പോലീസ്.

​ഗ്രാമത്തിലെ ഒരു കുന്നിൻമുകളിലെ ഒറ്റപ്പെട്ട വീട്ടിലായിരുന്നു ഇവർ താമസിച്ചിരുന്നത്. ഇവരുടെ വീട്ടിൽ നിധിയുണ്ടെന്ന തരത്തിൽ പ്രദേശത്ത് ചില പ്രചാരണങ്ങൾ ഉണ്ടായിരുന്നു. ചൊവ്വാഴ്ച രാവിലെ വീട്ടിൽനിന്ന് പുക ഉയരുന്നതും വൻ ദുർഗന്ധം വമിക്കുന്നതും ശ്രദ്ധയിൽപ്പെട്ട അയൽവാസികളാണ് പോലീസിൽ വിവരമറിയിച്ചത്. പോലീസ് സ്ഥലത്തെത്തി നടത്തിയ പരിശോധനയിലാണ് വീടിന്റെ ഹാളിൽ രക്തത്തിൽ കുളിച്ച നിലയിൽ മൃതദേഹങ്ങൾ കണ്ടെത്തിയത്.

​ഇരുവരുടെയും കഴുത്തറുത്ത നിലയിലായിരുന്നു. കൂടാതെ മൃതദേഹങ്ങളുടെ മുഖത്ത് കട്ടിയായി ചാരം പൂശിയിരുന്നു. നിധി ഒളിപ്പിച്ചിട്ടുണ്ടെന്ന സംശയത്തിൽ വീടിന്റെ തറ പലയിടങ്ങളിലായി കുത്തിപ്പൊളിച്ച നിലയിലാണ്. അക്രമികൾ വീടിനുള്ളിൽ നിധിക്കായി വ്യാപകമായ തിരച്ചിൽ നടത്തിയതായും പോലീസ് കണ്ടെത്തിയിട്ടുണ്ട്. മൃതദേഹങ്ങൾക്ക് സമീപം പൂജാസാധനങ്ങളോ മറ്റ് മന്ത്രവാദ സാമഗ്രികളോ ഉണ്ടായിരുന്നോ എന്ന് പോലീസ് പരിശോധിച്ചു വരികയാണ്.

​റായ്ഗഡ് ജില്ലാ പോലീസ് സൂപ്രണ്ട് (എസ്പി) സോമനാഥ് ഘാർഗെ, അഡീഷണൽ എസ്പി അതുൽ സെൻഡെ എന്നിവരുടെ നേതൃത്വത്തിലുള്ള ഉന്നത പോലീസ് സംഘം സംഭവസ്ഥലം സന്ദർശിച്ച് സ്ഥിതിഗതികൾ വിലയിരുത്തി. കൊലപാതകികളെ കണ്ടെത്താനായി ലോക്കൽ പോലീസിനു പുറമെ ക്രൈംബ്രാഞ്ചിന്റെ പ്രത്യേക സംഘത്തെയും നിയോഗിച്ചിട്ടുണ്ട്. ഡോഗ് സ്ക്വാഡും ഫോറൻസിക് വിദഗ്ധരും സ്ഥലത്തെത്തി ശാസ്ത്രീയ തെളിവുകൾ ശേഖരിച്ചു. ഇൻക്വസ്റ്റ് നടപടികൾക്ക് ശേഷം മൃതദേഹങ്ങൾ പോസ്റ്റ്‌മോർട്ടത്തിനായി ആശുപത്രിയിലേക്ക് മാറ്റി. പ്രതികളെക്കുറിച്ച് നിർണായക സൂചനകൾ ലഭിച്ചതായും അന്വേഷണം ഊർജിതമാക്കിയതായും റായ്ഗഡ് പോലീസ് അറിയിച്ചു.