മുംബൈ: കടുത്ത വേനലിൽ വെന്തുരുകുന്ന മുംബൈ മഹാനഗരത്തിന് ആശ്വാസമേകി സെൻട്രൽ റെയിൽവേയുടെ എസി ലോക്കൽ ട്രെയിനുകൾ. ഈ വർഷം ജനുവരി മുതൽ മെയ് വരെയുള്ള അഞ്ച് മാസത്തിനിടെ റെക്കോർഡ് യാത്രക്കാരാണ് എസി ലോക്കലുകളെ ആശ്രയിച്ചത്. 1.5 കോടിയിലധികം (1,50,09,178) യാത്രക്കാരാണ് ഈ കാലയളവിൽ എസി ട്രെയിനുകളിൽ യാത്ര ചെയ്തത്. റെയിൽവേയുടെ ചരിത്രത്തിലെ തന്നെ ഏറ്റവും ഉയർന്ന നിരക്കാണിത്.

വേനൽച്ചൂട് കടുത്തതോടെ സാധാരണ ലോക്കൽ ട്രെയിനുകളിലെ തിക്കും തിരക്കും ചൂടും ഒഴിവാക്കാൻ ലക്ഷക്കണക്കിന് യാത്രക്കാരാണ് എസി ട്രെയിനുകളിലേക്ക് മാറിയത്. യാത്രക്കാരുടെ എണ്ണത്തിലുണ്ടായ ഈ വൻ വർധനവ് സെൻട്രൽ റെയിൽവേയ്ക്ക് സമ്മാനിച്ചത് വൻ വരുമാനമാണ്. അഞ്ച് മാസത്തിനിടെ 67.87 കോടി രൂപയാണ് ടിക്കറ്റ് ഇനത്തിൽ മാത്രം റെയിൽവേയ്ക്ക് ലഭിച്ച വരുമാനം.

കഴിഞ്ഞ വർഷത്തെ അപേക്ഷിച്ച് യാത്രക്കാരുടെ എണ്ണത്തിൽ വലിയ കുതിച്ചുചാട്ടമാണ് ഇത്തവണ ഉണ്ടായിരിക്കുന്നത്. കഴിഞ്ഞ വർഷം ഇതേ കാലയളവിൽ 79.52 ലക്ഷം യാത്രക്കാരാണ് എസി ലോക്കലുകൾ ഉപയോഗിച്ചിരുന്നത്. എന്നാൽ ഇത്തവണ അത് 1.5 കോടിയായി ഉയർന്നു. അതായത് യാത്രക്കാരുടെ എണ്ണത്തിൽ 88.75 ശതമാനത്തിന്റെ അമ്പരപ്പിക്കുന്ന വളർച്ചയാണ് രേഖപ്പെടുത്തിയത്. വരുമാനത്തിലും കഴിഞ്ഞ വർഷത്തെ അപേക്ഷിച്ച് (35.53 കോടി) 91 ശതമാനത്തിന്റെ റെക്കോർഡ് വർധനവുണ്ടായി.

 *മെയ്* *മാസത്തിൽ* *മാത്രം* *36* *ലക്ഷം* *യാത്രക്കാർ* ; *തരംഗമായി* *എസി* *ലോക്കലുകൾ* 

ചൂട് അതിന്റെ പരകോടിയിലെത്തിയ മെയ് മാസത്തിലാണ് ഏറ്റവും കൂടുതൽ ആളുകൾ എസി ലോക്കലുകളെ ആശ്രയിച്ചത്. മെയ് മാസം മാത്രം 36.13 ലക്ഷം യാത്രക്കാരാണ് എസി ട്രെയിനുകളിൽ യാത്ര ചെയ്തത്. ഇതിലൂടെ 16.59 കോടി രൂപയുടെ വരുമാനവും ലഭിച്ചു. ജനുവരിയിൽ 24 ലക്ഷമായിരുന്ന യാത്രക്കാരുടെ എണ്ണം ഫെബ്രുവരിയിൽ 25 ലക്ഷവും, മാർച്ചിൽ 29 ലക്ഷവും, ഏപ്രിലിൽ 33 ലക്ഷവുമായി ഘട്ടംഘട്ടമായി ഉയരുകയായിരുന്നു.
​നിലവിൽ സെൻട്രൽ റെയിൽവേയുടെ മുംബൈ ഡിവിഷനിൽ പ്രതിദിനം 66 എസി ലോക്കൽ സർവീസുകളാണ് ഉള്ളത്. യാത്രക്കാരുടെ എണ്ണം കുത്തനെ ഉയർന്നതോടെ എസി ലോക്കൽ ട്രെയിനുകളുടെ എണ്ണവും സർവീസുകളും വർധിപ്പിക്കണമെന്ന ആവശ്യം യാത്രക്കാരുടെ ഭാഗത്തുനിന്ന് ശക്തമായിട്ടുണ്ട്. നഗരത്തിലെ മാറുന്ന യാത്രാസംസ്കാരത്തിന്റെ തെളിവാണ് എസി ലോക്കലുകളിലേക്ക് ജനങ്ങൾ കൂട്ടത്തോടെ ഒഴുകുന്നതെന്ന് റെയിൽവേ അധികൃതർ വ്യക്തമാക്കുന്നു.