മുംബൈ : വരാനിരിക്കുന്ന സിംഹസ്ഥ കുംഭമേള നാസിക്കിന്റെ വികസനത്തിന് പുതിയ ഊർജ്ജം പകരുമെന്ന് മഹാരാഷ്ട്ര ഉപമുഖ്യമന്ത്രി ഏകനാഥ് ഷിൻഡെ. രാജ്യത്തിന്റെ വിവിധ ഭാഗങ്ങളിൽ നിന്നുമെത്തുന്ന ലക്ഷക്കണക്കിന് തീർത്ഥാടകരെ സ്വീകരിക്കുന്നതിനായി നാസിക്കിലും ത്രയംബകേശ്വറിലും റോഡുകൾ, അടിസ്ഥാന സൗകര്യങ്ങൾ, പൊതുസൗകര്യങ്ങൾ എന്നിവ മെച്ചപ്പെടുത്താൻ സംസ്ഥാന സർക്കാർ ഏകദേശം 35,000 കോടി രൂപ നീക്കിവെച്ചതായി അദ്ദേഹം അറിയിച്ചു. ഗംഗാപ്പൂരിലെ പുതിയ റോഡ് പദ്ധതിയുടെ ഭൂമിപൂജ നിർവഹിച്ചും കർമ്മവീർ അഡ്വക്കറ്റ് ബാബുറാവ് ഗൺപത് ഠാക്കറെ കോളേജ് ഓഫ് എൻജിനീയറിംഗിലെ പുതിയ ഹോസ്റ്റൽ മന്ദിരം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

കുംഭമേളയുടെ തയ്യാറെടുപ്പുകൾക്ക് ഔദ്യോഗിക തുടക്കം കുറിച്ച് ഒക്ടോബർ 31-ന് രാഷ്ട്രപതി ദ്രൗപദി മുർമുവിന്റെ സാന്നിധ്യത്തിൽ പതാക ഉയർത്തൽ ചടങ്ങ് നടക്കുമെന്ന് ഉപമുഖ്യമന്ത്രി പറഞ്ഞു. ഗംഗാപ്പൂരിലെ പുതിയ റോഡ് യാത്രാതടസ്സം കുറയ്ക്കുമെന്നും, നിലവാരമില്ലാത്ത പ്രവൃത്തികൾ നടത്തുന്ന കരാറുകാർക്കെതിരെ കർശന നടപടി സ്വീകരിക്കുമെന്നും അദ്ദേഹം നിർദ്ദേശിച്ചു. വരൾച്ചാ സാഹചര്യം നിലനിൽക്കുമ്പോഴും കർഷകർക്ക് സഹായം ഉറപ്പാക്കിക്കൊണ്ട് തന്നെ കുംഭമേളയുടെ ഒരുക്കങ്ങളുമായി സർക്കാർ മുന്നോട്ട് പോവുകയാണെന്നും അദ്ദേഹം വ്യക്തമാക്കി.

വിദ്യാഭ്യാസ രംഗത്ത് 112 വർഷത്തെ സേവന പാരമ്പര്യമുള്ള മറാഠാ വിദ്യാ പ്രസാരക് സമാജിന്റെ പ്രവർത്തനങ്ങളെ ചടങ്ങിൽ ഉപമുഖ്യമന്ത്രി പ്രശംസിച്ചു. ഗ്രാമീണ മേഖലകളിൽ നിന്നുള്ള വിദ്യാർത്ഥികൾക്ക് എൻജിനീയറിംഗ് സ്വപ്നങ്ങൾ സാക്ഷാത്കരിക്കാൻ പുതിയ ഹോസ്റ്റൽ സുരക്ഷിതമായ അന്തരീക്ഷം ഒരുക്കുമെന്നും അദ്ദേഹം കൂട്ടിച്ചേർത്തു. കൂടാതെ, ജീവനക്കാരുടെ ആവശ്യങ്ങൾ നഗരവികസന വകുപ്പിന് കൈമാറാനും സന്ത് കബീർ നഗറിലെ ചേരി പുനരധിവാസ നിർദ്ദേശം പരിശോധിക്കാനും ഉദ്യോഗസ്ഥർക്ക് അദ്ദേഹം നിർദ്ദേശം നൽകി.

ചടങ്ങിൽ ഗാർഡിയൻ മിനിസ്റ്റർ ഗിരീഷ് മഹാജൻ, വിദ്യാഭ്യാസ മന്ത്രി ദാദാജി ഭൂസെ, എം.എൽ.എമാരായ സീമ ഹിരെ, ഗോകുൽ ഗീതെ, മേയർ ഹിംഗൗരി അഹെർ-അഡ്കെ, ഡെപ്യൂട്ടി മേയർ വിലാസ് ഷിൻഡെ, നാസിക് മുൻസിപ്പൽ കമ്മീഷണർ മനീഷ ഖാത്രി എന്നിവരും മറ്റ് ഭാരവാഹികളും ഉദ്യോഗസ്ഥരും പങ്കെടുത്തു.