തിരുവനന്തപുരം: കേരള സർക്കാരിന്റെ പുതിയ സ്റ്റേറ്റ് അറ്റോർണിയായി അഡ്വക്കേറ്റ് അനൂപ് വി. നായരെ നിയമിച്ചു. ചൊവ്വാഴ്ച നടത്തിയ വാർത്താസമ്മേളനത്തിൽ മുഖ്യമന്ത്രി വി. ഡി. സതീശനാണ് നിയമന പ്രഖ്യാപനം നടത്തിയത്.
അഡ്വ. എൻ. മനോജ്കുമാറിന് പകരമായാണ് അനൂപ് വി. നായർ ചുമതലയേൽക്കുന്നത്. കേരള ഹൈക്കോടതിയിൽ സംസ്ഥാന സർക്കാരിന് വേണ്ടി നടക്കുന്ന കേസുകളുടെ ഏകോപനവും നടത്തിപ്പും അഡ്വക്കേറ്റ് ജനറലിന്റെ ഓഫീസുമായി ചേർന്ന് നിർവഹിക്കുന്ന സുപ്രധാന ചുമതലയാണ് സ്റ്റേറ്റ് അറ്റോർണിക്കുള്ളത്.
കൊച്ചി ആസ്ഥാനമായി പ്രവർത്തിക്കുന്ന അനൂപ് വി. നായർ 2002ൽ അഭിഭാഷകനായി എൻറോൾ ചെയ്ത ശേഷം 23 വർഷത്തിലേറെയായി കേരളത്തിലെ വിവിധ കോടതികളിലും ട്രൈബ്യൂണലുകളിലും നിയമപ്രവർത്തനം നടത്തി വരികയാണ്. എഎസ്എം അറ്റോർണീസിന്റെ സ്ഥാപക പങ്കാളിയായ അദ്ദേഹം സിവിൽ, ക്രിമിനൽ, ഭരണഘടനാ റിട്ട് ഹർജികൾ, സർവീസ് ലോ, കമ്പനി ലോ, സർഫേസി നിയമം, പഞ്ചായത്ത് രാജ് വിഷയങ്ങൾ എന്നിവയിൽ ശ്രദ്ധേയമായ പ്രവർത്തനമാണ് കാഴ്ചവെച്ചത്.
നിരവധി ഗ്രാമപഞ്ചായത്തുകൾക്കും സ്വയംഭരണ സ്ഥാപനങ്ങൾക്കും വേണ്ടി കേരള ഹൈക്കോടതിയിൽ ഹാജരായിട്ടുള്ള അനൂപ് വി. നായർ ഗുരുവായൂർ ദേവസ്വം ബോർഡിന്റെ ലീഗൽ അഡ്വൈസർ പാനലിലും പ്രവർത്തിച്ചിട്ടുണ്ട്. ജീവനക്കാരുടെ സർവീസ് ചട്ടഭേദഗതികളിൽ നിർണായക പങ്കുവഹിച്ച അദ്ദേഹം 2024ൽ കേരള ഹൈക്കോടതി അഡ്വക്കേറ്റ്സ് അസോസിയേഷന്റെ സെക്രട്ടറിയായും സേവനമനുഷ്ഠിച്ചിട്ടുണ്ട്.
നിയമരംഗത്തെ ദീർഘകാല പരിചയവും പൊതുസേവന പ്രതിബദ്ധതയും സംസ്ഥാനത്തിന്റെ നിയമ പ്രതിനിധാനവും കേസ് മാനേജ്മെന്റ് സംവിധാനവും കൂടുതൽ ശക്തിപ്പെടുത്തുമെന്ന പ്രതീക്ഷയിലാണ് പുതിയ നിയമനം.
