മുംബൈ: ഡിജിറ്റൽ ലോകത്തെ പുതിയ രാഷ്ട്രീയ പരീക്ഷണമായ ‘കോക്രോച്ച് ജനതാ പാർട്ടി’ (CJP) സോഷ്യൽ മീഡിയയിൽ കൊടുങ്കാറ്റായി മാറുമ്പോൾ, നെഞ്ചിടിപ്പോടെ ഒരമ്മയും അച്ഛനും. മഹാരാഷ്ട്രയിലെ ഛത്രപതി സംഭാജിനഗർ സ്വദേശികളായ ഭഗവാൻ ദിപ്കെയും അനിത ദിപ്കെയുമാണ് തങ്ങളുടെ മകനും സി.ജെ.പി സ്ഥാപകനുമായ അഭിജീത് ദിപ്കെയുടെ ‘പാറ്റാ രാഷ്ട്രീയം’ കാരണം കഴിഞ്ഞ ഏതാനും ദിവസങ്ങളായി ഉറക്കമില്ലാ രാത്രികൾ തള്ളിനീക്കുന്നത്. മകൻ വലിയ ജനപ്രീതി നേടുന്നുണ്ടെങ്കിലും ഏതു നിമിഷവും പോലീസ് പിടിയിലായേക്കാം എന്ന ഭീതിയിലാണ് ഈ വൃദ്ധദമ്പതികൾ.
ഹൈക്കോടതി അഭിഭാഷകനെ ശാസിക്കുന്നതിനിടയിൽ സുപ്രീം കോടതി ചീഫ് ജസ്റ്റിസ് സൂര്യകാന്ത് പ്രയോഗിച്ച ‘പാറ്റകൾ’, ‘പരജീവികൾ’ എന്നീ വാക്കുകളിൽ നിന്നാണ് അഭിജീത് തന്റെ ഹാസ്യ-വിമർശന (Satirical) കൂട്ടായ്മയ്ക്ക് രൂപം നൽകുന്നത്. ചീഫ് ജസ്റ്റിസ് പിന്നീട് തന്റെ പരാമർശം വ്യാജ ബിരുദങ്ങൾ ഉപയോഗിച്ച് നിയമരംഗത്തേക്ക് കടന്നുവരുന്നവരെ ഉദ്ദേശിച്ചായിരുന്നു എന്ന് തിരുത്തിയെങ്കിലും, ‘പാറ്റ’യെ ഔദ്യോഗിക ചിഹ്നമാക്കി അഭിജീത് തുടങ്ങിയ ഡിജിറ്റൽ പാർട്ടി സോഷ്യൽ മീഡിയയിൽ വൻ തരംഗമായി മാറുകയായിരുന്നു. രാജ്യത്തെ പ്രമുഖ നേതാക്കളെക്കാൾ കൂടുതൽ ഫോളോവേഴ്സ് ചുരുങ്ങിയ ദിവസങ്ങൾ കൊണ്ട് ഈ പേജിന് ലഭിച്ചു.
അയൽവാസികളിൽ നിന്നും കൊച്ചുമക്കളിൽ നിന്നുമാണ് മകന്റെ ഈ വലിയ ജനപ്രീതിയെക്കുറിച്ച് മാതാപിതാക്കൾ അറിയുന്നത്. ഇതോടെയാണ് ഇവരുടെ സമാധാനം നഷ്ടപ്പെട്ടത്. രാഷ്ട്രീയത്തോട് കടുത്ത വിയോജിപ്പുള്ള അച്ഛൻ ഭഗവാൻ ദിപ്കെ തന്റെ ആശങ്കകൾ പങ്കുവെച്ചു: “അവൻ ഇപ്പോൾ വലിയ പ്രശസ്തനാണ്. ഇത്തരം കാര്യങ്ങളിൽ ഇടപെടുന്നവർ പെട്ടെന്ന് അറസ്റ്റിലാകാൻ സാധ്യതയുണ്ട്. മകന് എന്ത് സംഭവിക്കുമെന്നോർത്ത് കഴിഞ്ഞ രണ്ട് ദിവസമായി എനിക്ക് ഉറങ്ങാൻ കഴിഞ്ഞിട്ടില്ല. രാഷ്ട്രീയം എനിക്ക് വെറുപ്പാണ്.”
തുടക്കത്തിൽ എൻജിനീയറിങ് പഠിച്ചെങ്കിലും മാധ്യമപ്രവർത്തനത്തോട് താല്പര്യം തോന്നി പൂനെയിലും പിന്നീട് വിദേശത്തുമായി മാസ് മീഡിയ പഠിച്ച ആളാണ് അഭിജീത്. മകൻ രാഷ്ട്രീയത്തിൽ നിന്നും മാറി പൂനെയിലോ ഡൽഹിയിലോ നല്ലൊരു ജോലി വാങ്ങി സുരക്ഷിതനായി ജീവിക്കണമെന്നാണ് അമ്മ അനിതയുടെ ആഗ്രഹം. മകൻ സുരക്ഷിതനായി വീട്ടിൽ തിരിച്ചെത്തിയാൽ മതിയെന്നും രാഷ്ട്രീയത്തിലേക്ക് പോകുന്നതിനെ താൻ ഒരിക്കലും പിന്തുണയ്ക്കില്ലെന്നും വിതുമ്പലോടെ അമ്മ പറയുന്നു.
മുമ്പ് ആം ആദ്മി പാർട്ടിക്ക് (AAP) വേണ്ടിയും അഭിജീത് പ്രവർത്തിച്ചിരുന്നു. അപ്പോഴും രാഷ്ട്രീയം തങ്ങൾക്ക് ചേർന്നതല്ലെന്ന് മാതാപിതാക്കൾ ഉപദേശിച്ചിരുന്നു. സോഷ്യൽ മീഡിയയിൽ ‘കോക്രോച്ച് ജനതാ പാർട്ടി’ തരംഗം തുടരുമ്പോഴും, മകന്റെ സുരക്ഷയെക്കുറിച്ചുള്ള ആശങ്കയോടെ പ്രാർത്ഥനയിലാണ് ഈ മാതാപിതാക്കൾ.
