താനെ: താനെ മുനിസിപ്പൽ കോർപ്പറേഷൻ (TMC) നിർദ്ദേശിച്ച സ്വത്ത് നികുതി വർധനവിനെതിരെ നഗരത്തിലെ റെസിഡന്റ്സ് അസോസിയേഷനുകൾ ശക്തമായ പ്രതിഷേധവുമായി രംഗത്ത്. വാസസ്ഥല കെട്ടിടങ്ങൾക്ക് 12 ശതമാനവും വാണിജ്യ/വാണിജ്യേതര സ്ഥാപനങ്ങൾക്കു 20 ശതമാനം വരെയുമാണ് നികുതി വർധിപ്പിക്കാൻ TMC നിർദ്ദേശിച്ചിട്ടുള്ളത്. എന്നാൽ നഗരത്തിൽ അടിസ്ഥാന പൗരസേവനങ്ങളും സൗകര്യങ്ങളും അപര്യാപ്തമായി തുടരുമ്പോൾ ഈ നികുതി വർധനവ് തികച്ചും അന്യായമാണെന്നാണ് നിവാസികളുടെ പ്രധാന പരാതി.

മാലിന്യ ശേഖരണവും ശുചിത്വ പരിപാലനവും ഇപ്പോഴും ആശങ്കാജനകമായി തുടരുന്നുവെന്ന് ജനങ്ങൾ ചൂണ്ടിക്കാണിക്കുന്നു. മഴക്കാലത്ത് മലിനജല-ഡ്രെയിനേജ് സംവിധാനങ്ങളുടെ പോരായ്മ കാരണം ഓടകൾ കവിഞ്ഞൊഴുകി വെള്ളക്കെട്ടും വൃത്തിഹീനമായ സാഹചര്യവുമാണ് രൂപപ്പെടുന്നത്. കൂടാതെ, പല റെസിഡൻഷ്യൽ മേഖലകളിലും തടസ്സരഹിതമായ നടപ്പാതകളില്ലാത്തതിനാൽ കാൽനടയാത്രക്കാർ റോഡിലൂടെ സഞ്ചരിക്കേണ്ടി വരുന്നു. നിലവിലുള്ള നടപ്പാതകളിൽ പലതും കയ്യേറ്റത്തിനും അനധികൃത പാർക്കിംഗിനും ഇരയായിരിക്കുകയാണ്. പൊതുറോഡുകളിലെ ഇത്തരം അനധികൃത പാർക്കിംഗ് രൂക്ഷമായ ഗതാഗതക്കുരുക്കിനും സുരക്ഷാ ഭീഷണിക്കും കാരണമാകുന്നുണ്ടെന്നും പരാതിയുണ്ട്.

എട്ട് വർഷത്തിലേറെയായി മന്ദഗതിയിൽ നീങ്ങുന്ന മെട്രോ പദ്ധതിയുടെ പുരോഗതിയെക്കുറിച്ചും ജനങ്ങൾ ചോദ്യങ്ങൾ ഉയർത്തുന്നു. പൊതുഗതാഗത സൗകര്യങ്ങളുടെ അപര്യാപ്തത മൂലവും ഗതാഗതക്കുരുക്ക് മൂലവും ദുരിതം അനുഭവിക്കുന്ന ജനങ്ങൾക്ക് മേൽ സാമ്പത്തിക ഭാരം അടിച്ചേൽപ്പിക്കുന്നതിന് പകരം, നിലവിലുള്ള വരുമാനം സുതാര്യമായും കാര്യക്ഷമമായും വിനിയോഗിക്കുകയാണ് വേണ്ടതെന്ന് നിവാസികൾ ഓർമ്മിപ്പിക്കുന്നു.

​ഈ സാഹചര്യത്തിൽ, നിർദ്ദേശിച്ച സ്വത്ത് നികുതി വർധനവ് ഉടൻ പിൻവലിക്കണമെന്നാണ് താനെയിലെ റെസിഡന്റ്സ് അസോസിയേഷനുകൾ ആവശ്യപ്പെടുന്നത്. നിലവിൽ പിരിച്ചെടുക്കുന്ന നികുതി എങ്ങനെ വിനിയോഗിക്കുന്നു എന്നതിന്റെ കണക്കുകൾ പൊതുജനങ്ങൾക്ക് മുന്നിൽ സുതാര്യമായി പ്രസിദ്ധീകരിക്കണം. ഖരമാലിന്യ സംസ്കരണവും ഡ്രെയിനേജ് സംവിധാനങ്ങളും മെച്ചപ്പെടുത്തുക, റെസിഡൻഷ്യൽ മേഖലകളിൽ തടസ്സരഹിതമായ നടപ്പാതകൾ ഉറപ്പാക്കുക, അനധികൃത പാർക്കിംഗിനും കയ്യേറ്റങ്ങൾക്കുമെതിരെ കർശന നടപടി സ്വീകരിക്കുക എന്നിവയും ആവശ്യങ്ങളിൽ ഉൾപ്പെടുന്നു. ഒപ്പം മെട്രോ നിർമാണം വേഗത്തിലാക്കി വ്യക്തമായ നടപ്പാക്കൽ പദ്ധതി അവതരിപ്പിക്കണമെന്നും ഏതൊരു നികുതി വർധനവിനും മുന്നോടിയായി നികുതിദായകരുമായി കൂടിയാലോചന നടത്തണമെന്നും ഇവർ അഭ്യർത്ഥിക്കുന്നു.

പൗരസേവനങ്ങളുടെ ഗുണനിലവാരം ഉയർത്താതെ സാധാരണക്കാരുടെ മേൽ അധിക സാമ്പത്തികഭാരം അടിച്ചേൽപ്പിക്കരുതെന്ന് TMC ജനറൽ ബോഡിയോടും ജനപ്രതിനിധികളോടും ആവശ്യപ്പെട്ടുകൊണ്ട് താനെയിലെ സാമൂഹ്യ സാംസ്കാരിക പ്രവർത്തകനായ ശശികുമാർ നായർ   വ്യക്തമാക്കുന്നത് ഇങ്ങനെയാണ്: “ആദ്യം മെച്ചപ്പെട്ട പൗരസേവനങ്ങൾ ഉറപ്പാക്കുക, ഉത്തരവാദിത്തവും സുതാര്യതയും പാലിക്കുക, നിലവിലുള്ള വരുമാനം കാര്യക്ഷമമായി വിനിയോഗിക്കുക — അതിനുശേഷം മാത്രം അധിക നികുതിയെക്കുറിച്ച് സംസാരിക്കുക.”