ന്യൂഡൽഹി: രാജ്യത്ത് നാൾക്കുനാൾ വർധിച്ചുവരുന്ന തെരുവുനായ ശല്യത്തിന് തടയിടാൻ നിർണായക വിധിപ്രസ്താവവുമായി സുപ്രീം കോടതി. മനുഷ്യജീവന് ഭീഷണിയാകുന്ന വിധത്തിൽ പേവിഷബാധയേറ്റതോ, സുഖപ്പെടുത്താനാകാത്ത രോഗം ബാധിച്ചതോ, അങ്ങേയറ്റം അക്രമാസക്തരായതോ ആയ തെരുവുനായകളെ നിയമപരമായ മാനദണ്ഡങ്ങൾ പാലിച്ച് ദയാവധം (Euthanasia) ചെയ്യാൻ സുപ്രീം കോടതി അനുമതി നൽകി. ജസ്റ്റിസുമാരായ വിക്രം നാഥ്, സന്ദീപ് മേത്ത, എൻ.വി. അഞ്ജാരിയ എന്നിവരടങ്ങിയ മൂന്നംഗ ബെഞ്ചാണ് ചരിത്രപരമായ ഈ വിധി പുറപ്പെടുവിച്ചത്.
വിദ്യാഭ്യാസ സ്ഥാപനങ്ങൾ, ആശുപത്രികൾ, ബസ് സ്റ്റാൻഡുകൾ, റെയിൽവേ സ്റ്റേഷനുകൾ തുടങ്ങിയ ജനത്തിരക്കേറിയ പൊതുസ്ഥലങ്ങളിൽ നിന്ന് തെരുവുനായകളെ അടിയന്തരമായി മാറ്റണമെന്ന മുൻ ഉത്തരവ് പരിഷ്കരിക്കാനോ പിൻവലിക്കാനോ കോടതി വിസമ്മതിച്ചു. പൊതുസ്ഥലങ്ങളിൽ നിന്ന് പിടികൂടി വന്ധ്യംകരണവും വാക്സിനേഷനും നടത്തുന്ന നായകളെ വീണ്ടും അതേ സ്ഥലങ്ങളിലേക്ക് തന്നെ തുറന്നുവിടരുതെന്ന നിർണായക ഉത്തരവ് കർശനമായി നടപ്പാക്കാൻ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും കോടതി നിർദേശം നൽകി.
മനുഷ്യന്റെ ജീവിക്കാനുള്ള അവകാശത്തിന് തന്നെയാണ് പ്രഥമ പരിഗണനയെന്ന് കോടതി അടിവരയിട്ടു പറഞ്ഞു. തെരുവുനായ്ക്കളുടെ ആക്രമണ ഭയമില്ലാതെ പൊതുസ്ഥലങ്ങളിലൂടെ സ്വതന്ത്രമായി സഞ്ചരിക്കാനുള്ള അവകാശം ഭരണഘടന ഉറപ്പുനൽകുന്ന മാന്യമായി ജീവിക്കാനുള്ള അവകാശത്തിന്റെ (Right to life) ഭാഗമാണെന്ന് ഡിവിഷൻ ബെഞ്ച് നിരീക്ഷിച്ചു. തെരുവുനായ ശല്യം വൻതോതിൽ രൂക്ഷമായതും നായ്ക്കളുടെ കടിയേൽക്കുന്ന സംഭവങ്ങൾ പതിവായതുമായ പ്രദേശങ്ങളിൽ തദ്ദേശസ്ഥാപനങ്ങൾക്ക് ദയാവധം അടക്കമുള്ള നിയമപരമായ നടപടികളിലേക്ക് കടക്കാം. എന്നാൽ ഇത് വെറ്ററിനറി വിദഗ്ധരുടെ കൃത്യമായ പരിശോധനയ്ക്കും ആനിമൽ ബർത്ത് കൺട്രോൾ (ABC) ചട്ടങ്ങൾക്കും വിധേയമായി മാത്രമായിരിക്കണം.
തദ്ദേശ സ്ഥാപനങ്ങളുടെയും സംസ്ഥാന സർക്കാരുകളുടെയും കടുത്ത വീഴ്ചയെ കോടതി രൂക്ഷമായ ഭാഷയിലാണ് വിമർശിച്ചത്. എബിസി ചട്ടങ്ങൾ കൃത്യമായ ദീർഘവീക്ഷണത്തോടെ നടപ്പാക്കുന്നതിൽ അധികൃതർ പരാജയപ്പെട്ടതാണ് നിലവിലെ ഗുരുതര സാഹചര്യത്തിന് കാരണം. കുട്ടികളും പ്രായമായവരും വിദേശ വിനോദസഞ്ചാരികളും അടക്കം തെരുവുനായ്ക്കളുടെ ക്രൂരമായ ആക്രമണത്തിന് ഇരയാകുന്ന പരുക്കൻ യാഥാർത്ഥ്യങ്ങൾക്ക് നേരെ കോടതിക്ക് കണ്ണടയ്ക്കാനാകില്ലെന്നും ബെഞ്ച് വ്യക്തമാക്കി.
കോടതി ഉത്തരവ് നടപ്പാക്കുന്നതിൽ വീഴ്ച വരുത്തുന്ന ഉദ്യോഗസ്ഥർക്കെതിരെ കടുത്ത അച്ചടക്ക നടപടിയും കോടതിലക്ഷ്യ നടപടിയും ഉണ്ടാകുമെന്ന് സുപ്രീം കോടതി ശക്തമായ മുന്നറിയിപ്പ് നൽകി. ഉത്തരവുകൾ കൃത്യമായി നടപ്പാക്കുന്നുണ്ടെന്ന് ഉറപ്പുവരുത്താൻ എല്ലാ ഹൈക്കോടതികളോടും സ്വമേധയാ (Suo motu) കേസെടുത്ത് നിരീക്ഷിക്കാനും സുപ്രീം കോടതി നിർദേശിച്ചിട്ടുണ്ട്. അതേസമയം, കോടതി ഉത്തരവ് പാലിച്ച് പൊതുസ്ഥലങ്ങൾ നായവിമുക്തമാക്കാൻ നിയമപരമായ നടപടികളെടുക്കുന്ന ഉദ്യോഗസ്ഥർക്ക് സംരക്ഷണം നൽകുമെന്നും അവർക്കെതിരെ സാധാരണഗതിയിൽ എഫ്.ഐ.ആറോ ക്രിമിനൽ നടപടികളോ പാടില്ലെന്നും കോടതി വ്യക്തമാക്കി.
രാജ്യത്തെ എല്ലാ ജില്ലകളിലും ആവശ്യമായ അടിസ്ഥാന സൗകര്യങ്ങളോടും പരിശീലനം ലഭിച്ച ജീവനക്കാരോടും കൂടിയ കുറഞ്ഞത് ഒരു ‘ആനിമൽ ബർത്ത് കൺട്രോൾ’ (ABC) കേന്ദ്രമെങ്കിലും യുദ്ധകാലാടിസ്ഥാനത്തിൽ സ്ഥാപിക്കാൻ സംസ്ഥാനങ്ങൾക്ക് കോടതി നിർദേശം നൽകി. കൂടാതെ എല്ലാ സർക്കാർ ആശുപത്രികളിലും തദ്ദേശ സ്ഥാപനങ്ങളിലും പേവിഷബാധയ്ക്കുള്ള വാക്സിനുകളും ഇമ്മ്യൂണോഗ്ലോബുലിനും (Immunoglobulins) ആവശ്യത്തിന് ലഭ്യമാണെന്ന് സംസ്ഥാനങ്ങൾ ഉറപ്പുവരുത്തണമെന്നും സുപ്രീം കോടതി വിധിയിൽ വ്യക്തമാക്കുന്നു.
