താനെ : ഡോംബിവ്ലി കേരളീയ സമാജത്തിന്റെ (രജി.) നേതൃത്വത്തിൽ സംഘടിപ്പിച്ച ‘ഓണോത്സവം 2026’ വർണാഭമായ പരിപാടികളോടെ ആഘോഷിച്ചു. സെപ്റ്റംബർ 6-ന് ഞായറാഴ്ച കമ്പൽപാഡയിലെ ഡോംബിവ്ലി മോഡൽ കോളേജിൽ നടന്ന ആഘോഷങ്ങളിൽ നിരവധി കുടുംബങ്ങളും മലയാളി സമൂഹാംഗങ്ങളും പങ്കെടുത്തു.
പരമ്പരാഗത കേരളീയ സംസ്കാരത്തിന്റെ സൗന്ദര്യം വിളിച്ചോതുന്ന അത്തപ്പൂക്കളം, വിഭവസമൃദ്ധമായ ഓണസദ്യ, സാംസ്കാരിക സമ്മേളനം, ഗാനമേള, നൃത്തങ്ങൾ തുടങ്ങി വിവിധ കലാപരിപാടികൾ ആഘോഷങ്ങൾക്ക് മാറ്റുകൂട്ടി. കുട്ടികളും മുതിർന്നവരും ഉൾപ്പെടെയുള്ള കലാകാരന്മാരുടെ വൈവിധ്യമാർന്ന പ്രകടനങ്ങളും തനതു രുചികളോടെ ഒരുക്കിയ ഓണസദ്യയും കാണികൾക്ക് മികച്ച അനുഭവമായി മാറി.
മലയാളികളുടെ പാരമ്പര്യവും സംസ്കാരവും പുതുതലമുറയിലേക്ക് പകർന്നുനൽകുന്നതിനും ഡോംബിവ്ലിയിലെ മലയാളി സമൂഹത്തിന്റെ ഐക്യവും സൗഹൃദവും കൂടുതൽ ശക്തിപ്പെടുത്തുന്നതിനുമുള്ള വേദിയായി ഓണോത്സവം മാറി. സമാജം ഭാരവാഹികൾ, ഗവേണിംഗ് കൗൺസിൽ അംഗങ്ങൾ, കമ്മിറ്റി പ്രവർത്തകർ, വോളന്റിയർമാർ, സ്പോൺസർമാർ, കലാകാരന്മാർ എന്നിവരുടെ കൂട്ടായ പ്രവർത്തനമാണ് പരിപാടിയുടെ വിജയത്തിന് പിന്നിൽ പ്രവർത്തിച്ചതെന്ന് സംഘാടകർ വ്യക്തമാക്കി.
”ഒരുമയിലൂടെ സംസ്കാരം, സംസ്കാരത്തിലൂടെ സമൂഹം” എന്ന സന്ദേശം ഉയർത്തിപ്പിടിച്ച ഓണോത്സവം 2026, ഡോംബിവ്ലി മലയാളി സമൂഹത്തിന്റെ സ്നേഹത്തിന്റെയും കൂട്ടായ്മയുടെയും ആഘോഷമായി മാറിയെന്ന് അറിയിച്ച സമാജം ഭാരവാഹികൾ, പരിപാടിയുമായി സഹകരിച്ച എല്ലാവർക്കും നന്ദി രേഖപ്പെടുത്തി.
