നേപ്പാളിലെ തിബറ്റ് അതിർത്തിയോട് ചേർന്നുള്ള രസൂവ ജില്ലയിൽ ഭോട്ടേ കോശി നദിയിലുണ്ടായ പെട്ടെന്നുള്ള കനത്ത വെള്ളപ്പൊക്കത്തിലും ഉരുൾപൊട്ടലിലും 95 പേർ മരണപ്പെടുകയും 105 ഇന്ത്യക്കാരും 37 പ്രവാസി ഭാരതീയരും (എൻ.ആർ.ഐ) ഉൾപ്പെടെ അഞ്ഞൂറോളം പേരെ കാണാതാവുകയും ചെയ്തു. നുവാകോട്ട്, ധാഡിങ്, ചിറ്റ്വാൻ ജില്ലകളെയും പ്രളയം രൂക്ഷമായി ബാധിച്ചിട്ടുണ്ട്. പരിക്കേറ്റ 93 പേർ ചികിത്സയിലാണ്. കാണാതായവരിൽ ഭൂരിഭാഗവും കൈലാസ മാനസസരോവർ തീർത്ഥാടനത്തിനായി തിബറ്റിലേക്ക് പോയ തീർത്ഥാടകരാണെന്നാണ് നിഗമനം. ടച്ച് കൈലാസ് ട്രാവൽസ് ആൻഡ് ടൂൾസ് മാനേജിങ് ഡയറക്ടർ ബാഷു കുമാർ അധികാരി നൽകുന്ന വിവരമനുസരിച്ച് ബുധനാഴ്ച അതിർത്തി കടക്കേണ്ടിയിരുന്ന 390 തീർത്ഥാടകരുമായി ബന്ധപ്പെടാൻ സാധിച്ചിട്ടില്ല. ട്രെക്കിങ് ഏജൻസീസ് അസോസിയേഷൻ ഓഫ് നേപ്പാൾ പ്രസിഡന്റ് സാഗർ പാണ്ഡെയുടെ നേതൃത്വത്തിൽ തീർത്ഥാടകരെ കണ്ടെത്താനുള്ള ശ്രമങ്ങൾ പുരോഗമിക്കുകയാണ്.
ദുരന്തത്തിൽ ജീവൻ പൊലിഞ്ഞവരോടുള്ള ആദരാസൂചകമായി അനുശോചനം അറിയിച്ച ഇന്ത്യൻ പ്രധാനമന്ത്രി നരേന്ദ്ര മോദി, നേപ്പാൾ പ്രധാനമന്ത്രി ബാബ്ലെൻ ഷായുമായി (ബാലേന്ദ്ര ഷാ) സംസാരിക്കുകയും ഇന്ത്യയുടെ പൂർണ്ണ പിന്തുണയും എല്ലാവിധ മാനുഷിക സഹായങ്ങളും വാഗ്ദാനം ചെയ്യുകയും ചെയ്തു. നിലവിൽ ഇന്ത്യൻ വ്യോമസേനയുടെ വിമാനങ്ങളിൽ മരുന്നുകളും മറ്റ് അടിയന്തര ആശ്വാസ സാമഗ്രികളും നേപ്പാളിലേക്ക് അയക്കുന്നുണ്ട്. എൻ.ഡി.ആർ.എഫ് സംഘത്തെയും രക്ഷാപ്രവർത്തനത്തിനായി നേപ്പാളിലേക്ക് അയക്കാൻ കേന്ദ്ര സർക്കാർ തയ്യാറെടുക്കുകയാണ്.
നേപ്പാളിലെ ത്രിശൂലി നദിയിൽ ജലനിരപ്പ് ഉയർന്നതിനെ തുടർന്ന് ബീഹാറിലെ ഗണ്ഡക് നദീതീരങ്ങളിൽ ജാഗ്രതാ നിർദ്ദേശം നൽകിയിട്ടുണ്ട്. സ്ഥിതിഗതികൾ വിലയിരുത്താൻ കേന്ദ്ര ആഭ്യന്തര മന്ത്രി അമിത് ഷാ ബീഹാർ ഉപമുഖ്യമന്ത്രി സമ്രാട്ട് ചൗധരിയുമായി സംസാരിക്കുകയും ബീഹാറിലേക്ക് ഒമ്പത് എൻ.ഡി.ആർ.എഫ് (NDRF) സംഘങ്ങളെ നിയോഗിക്കുകയും ചെയ്തു. ഉത്തർപ്രദേശിലെ മഹാരാജ്ഗഞ്ച്, കുശിനഗർ ജില്ലകളിൽ ജാഗ്രത പാലിക്കാൻ ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ഭരണകൂടത്തിന് നിർദ്ദേശം നൽകി.
രസൂവാഗഡി-തിമുറെ മേഖലയിൽ കനത്ത നാശനഷ്ടമാണുണ്ടായത്. ഹെലികോപ്റ്ററുകളും ഡ്രോണുകളും സ്നിഫർ നായ്ക്കളും ഉപയോഗിച്ച് നേപ്പാൾ സൈന്യവും പൊലീസും രക്ഷാപ്രവർത്തനം നടത്തുന്നുണ്ട്. രസൂവാഗഡി, സഞ്ചൻ ഖോല, അപ്പർ ത്രിശൂലി 3എ തുടങ്ങി എട്ടോളം വൈദ്യുതി നിലയങ്ങൾക്ക് പ്രളയത്തിൽ കേടുപാടുകൾ സംഭവിച്ചു. പെട്ടെന്നുള്ള പ്രളയത്തിന് കാരണം തിബറ്റ് അതിർത്തിയിലുണ്ടായ മഞ്ഞിടിച്ചിലോ ഹിമാനീസരോവരം പൊട്ടിയൊഴുകിയതോ (GLOF) ആകാം എന്നാണ് നേപ്പാൾ ഹൈഡ്രോളജി വിഭാഗത്തിലെ ഇൻഫർമേഷൻ ഓഫീസർ ദിങ്കർ കായസ്ഥ വ്യക്തമാക്കിയത്. ദുരന്തബാധിതർക്ക് സഹായത്തിനായി 1234, 1144 എന്നീ അടിയന്തര നമ്പറുകളിലോ ടൂറിസ്റ്റ് പൊലീസിന്റെ 9851289445 എന്ന നമ്പറിലോ ബന്ധപ്പെടാമെന്ന് അധികൃതർ അറിയിച്ചു.
