​മുംബൈ: ഏതാനും ദിവസങ്ങളായി തുടർന്ന ഉഷ്ണ കാലാവസ്ഥയ്ക്ക് വിരാമമിട്ട് മുംബൈ നഗരത്തിലും പരിസരങ്ങളിലും ബുധനാഴ്ച രാവിലെ നേരിയ മഴയെത്തി. വരും മണിക്കൂറുകളിൽ നഗരത്തിലും പരിസരപ്രദേശങ്ങളിലും ആകാശം മേഘാവൃതമായിരിക്കുമെന്നും ഇടവിട്ട് മഴ പെയ്യാൻ സാധ്യതയുണ്ടെന്നും ഇന്ത്യൻ കാലാവസ്ഥാ വകുപ്പ് (IMD) അറിയിച്ചു. 

​സൗത്ത് മുംബൈയിലെ ബൈക്കുള, ഗിർഗാവ്, പരേൽ പ്രദേശങ്ങളിലും ഘാട്കോപ്പർ, അന്ധേരി, ഗോരേഗാവ് തുടങ്ങിയ നഗരപ്രാന്തങ്ങളിലും രാവിലെ മഴ ലഭിച്ചു. താപനില 26 ഡിഗ്രി മുതൽ 32 ഡിഗ്രി സെൽഷ്യസ് വരെയായിരിക്കും. കുറഞ്ഞ താപനില 29 ഡിഗ്രി സെൽഷ്യസാണ്. മഴ കുറവാണെങ്കിലും അന്തരീക്ഷത്തിൽ ഈർപ്പത്തിന്റെ അളവ് കൂടുതലായിരിക്കും.
ജൂലൈ 15 പുലർച്ചെ 4 മണിക്ക് മൂന്ന് മണിക്കൂർ കാലാവധിയോടെ പുറപ്പെടുവിച്ച ‘യെല്ലോ നൗകാസ്റ്റ്’ പ്രകാരം മുംബൈ, താനെ, പാൽഘർ, റായ്ഗഡ്, രത്നഗിരി, സിന്ധുദുർഗ് എന്നീ ജില്ലകളിലെ ഒറ്റപ്പെട്ട സ്ഥലങ്ങളിൽ നേരിയ മഴയ്ക്ക് സാധ്യതയുണ്ട്. കടുത്ത മുന്നറിയിപ്പുകൾ ഇല്ലെങ്കിലും മൺസൂൺ സാഹചര്യങ്ങൾ അതിവേഗം മാറാൻ സാധ്യതയുള്ളതിനാൽ ജനങ്ങൾ പുതിയ വിവരങ്ങൾ ശ്രദ്ധിക്കണമെന്ന് ഐഎംഡി നിർദ്ദേശിച്ചു.

അടുത്തിടെ പെയ്ത മൺസൂൺ മഴയെത്തുടർന്ന് നഗരത്തിലെ വായുനിലവാരം മികച്ച നിലയിലാണ്. ബുധനാഴ്ച രാവിലെ രേഖപ്പെടുത്തിയ കണക്കുകൾ പ്രകാരം മുംബൈയിലെ ആകെ വായു ഗുണനിലവാര സൂചിക (AQI) 33 ആണ്. ഇത് പൊതുജനാരോഗ്യത്തിന് ഏറ്റവും സുരക്ഷിതമായ ‘ഗുഡ്’ (Good) കാറ്റഗറിയിലാണ് ഉൾപ്പെടുന്നത്. സൂചിക 0-50 നും ഇടയിലാകുന്നത് മികച്ച വായുനിലവാരത്തെ കാണിക്കുന്നു.