പൂനെ: യുവ ബിൽഡർ കേതൻ അഗർവാൾ വധക്കേസിലെ പ്രതികളായ സിയ ഗോയൽ, കാമുകൻ ചേതൻ ചൗധരി എന്നിവരെ പോളിഗ്രാഫ് പരിശോധനയ്ക്ക് വിധേയരാക്കണമെന്ന പോലീസിന്റെ ഹർജി കോടതി തള്ളി. പ്രതികളുടെ സമ്മതമില്ലാതെ ശാസ്ത്രീയ പരിശോധന നടത്താനാകില്ലെന്ന് വ്യക്തമാക്കിയ ജുഡീഷ്യൽ മജിസ്‌ട്രേറ്റ് ഫസ്റ്റ് ക്ലാസ് എ.എം. വിഭൂതെ, ഇരുവരെയും ജൂലൈ 16 വരെ ജുഡീഷ്യൽ കസ്റ്റഡിയിൽ വിട്ടു. അതേസമയം, പ്രതികളുടെ ഫോൺ ചാറ്റുകളിൽ നിന്ന് ലഭിച്ച വിവരങ്ങളുടെ അടിസ്ഥാനത്തിൽ ബീഡ് സ്വദേശിയായ ഒരു യുവാവിനെ പോലീസ് ചോദ്യം ചെയ്തു.

കേതനെ ലോഹഗഡ് കോട്ടയിലെ മലയിടുക്കിൽ നിന്ന് തള്ളിയിട്ട് കൊലപ്പെടുത്തുന്നതിന് മുൻപ് പൂനെ ലുല്ലാനഗറിലെ കുന്നിൻ പ്രദേശത്ത് വെച്ച് പ്രതികൾ കൃത്യമായ പരിശീലനം നടത്തിയിരുന്നതായി പോലീസ് കോടതിയെ അറിയിച്ചു. സിയ നൽകുന്ന പ്രത്യേക ആംഗ്യം ലഭിച്ചയുടൻ കേതനെ തള്ളിയിടാനായിരുന്നു പദ്ധതി. വരുന്ന നവംബറിൽ വിവാഹം കഴിക്കാൻ നിശ്ചയിച്ചിരുന്ന സിയയുമായി ചേതനുണ്ടായിരുന്ന ബന്ധത്തിന് കേതൻ തടസ്സമായതാണ് കൊലപാതകത്തിന് കാരണം. കേസിൽ മുതിർന്ന അഭിഭാഷകൻ ഉജ്ജ്വൽ നികത്തിനെ സ്പെഷ്യൽ പബ്ലിക് പ്രോസിക്യൂട്ടറായി നിയമിച്ചിട്ടുണ്ട്.