മുംബൈ: ആഫ്രിക്കൻ രാജ്യങ്ങളിൽ എബോള വൈറസ് ബാധ (Ebola Outbreak) വീണ്ടും പടർന്നുപിടിക്കുന്ന പശ്ചാത്തലത്തിൽ രാജ്യത്തെ പ്രധാന രാജ്യാന്തര വിമാനത്താവളങ്ങളിൽ അതീവ ജാഗ്രതാ നിർദ്ദേശം (Ebola Alert) പുറപ്പെടുവിച്ചു. മുംബൈ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളം, ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളം എന്നിവിടങ്ങളിലാണ് കേന്ദ്ര ആരോഗ്യ മന്ത്രാലയത്തിന്റെ നിർദ്ദേശപ്രകാരം പ്രതിരോധ നടപടികൾ ശക്തമാക്കിയത്. രോഗബാധിത പ്രദേശങ്ങളിൽ നിന്നും എത്തുന്ന യാത്രക്കാരെ നിരീക്ഷിക്കാനും പരിശോധിക്കാനും പ്രത്യേക സംവിധാനങ്ങൾ ഒരുക്കിയിട്ടുണ്ട്.

ആഫ്രിക്കൻ രാജ്യങ്ങളിൽ നിന്ന് നേരിട്ടോ മറ്റ് വിമാനത്താവളങ്ങൾ വഴിയോ എത്തുന്ന യാത്രക്കാരെ കർശനമായ സ്ക്രീനിംഗിന് വിധേയരാക്കും. യാത്രക്കാരിൽ ആർക്കെങ്കിലും എബോള ലക്ഷണങ്ങൾ കണ്ടാലോ സംശയം തോന്നിയാലോ അവരെ ഉടൻ തന്നെ ഐസൊലേഷനിലേക്ക് മാറ്റാൻ വിമാനത്താവളങ്ങളിലെ ഹെൽത്ത് ഓർഗനൈസേഷൻ (APHO) ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്. പനി, കഠിനമായ തലവേദന, പേശി വേദന, ക്ഷീണം, തൊണ്ടവേദന എന്നിവയാണ് എബോളയുടെ പ്രാരംഭ ലക്ഷണങ്ങൾ.

രോഗം രാജ്യത്തേക്ക് പടരുന്നത് തടയാൻ എയർലൈൻ ജീവനക്കാർക്കും കസ്റ്റംസ് ഉദ്യോഗസ്ഥർക്കും പ്രത്യേക മാർഗ്ഗനിർദ്ദേശങ്ങൾ നൽകിക്കഴിഞ്ഞു. വിമാനത്തിനുള്ളിൽ വെച്ച് ഏതെങ്കിലും യാത്രക്കാരന് അസ്വസ്ഥത അനുഭവപ്പെട്ടാൽ പൈലറ്റുമാർ വിമാനത്താവളത്തിലെ മെഡിക്കൽ സംഘത്തെ മുൻകൂട്ടി വിവരമറിയിക്കണം. സംശയാസ്പദമായ കേസുകൾ കൈകാര്യം ചെയ്യുന്നതിനായി മുംബൈയിലെയും ഡൽഹിയിലെയും പ്രമുഖ ആശുപത്രികളിൽ പ്രത്യേക ഐസൊലേഷൻ വാർഡുകളും സജ്ജമാക്കിയിട്ടുണ്ട്.

നിലവിൽ രാജ്യത്ത് എബോള കേസുകളൊന്നും റിപ്പോർട്ട് ചെയ്തിട്ടില്ലെന്നും മുൻകരുതൽ നടപടിയുടെ ഭാഗമായാണ് വിമാനത്താവളങ്ങളിൽ ജാഗ്രത ശക്തമാക്കിയതെന്നും ആരോഗ്യ മന്ത്രാലയ അധികൃതർ വ്യക്തമാക്കി. വിമാനത്താവളങ്ങളിലെ മെഡിക്കൽ പരിശോധനകളോട് യാത്രക്കാർ പൂർണ്ണമായും സഹകരിക്കണമെന്നും രോഗബാധിത രാജ്യങ്ങളിൽ സന്ദർശനം നടത്തി മടങ്ങിയെത്തുന്നവർ ആരോഗ്യവിവരങ്ങൾ മറച്ചുവെക്കരുതെന്നും അധികൃതർ അഭ്യർത്ഥിച്ചു.