മുംബൈ: ‘ലേക്ക് സിറ്റി’യായി അറിയപ്പെടുന്ന താനെയെ ആധുനിക നഗരമായി മാറ്റാൻ വൻ വികസന പദ്ധതികൾക്ക് രൂപം നൽകുന്നതായി റിപ്പോർട്ട്. മഹാരാഷ്ട്ര മുഖ്യമന്ത്രി എക്നാഥ് ഷിൻഡെയുടെ നേതൃത്വത്തിലാണ് ഗതാഗതവും വിനോദസഞ്ചാരവും ഒരുപോലെ ശക്തിപ്പെടുത്തുന്ന പദ്ധതികൾ തയ്യാറാക്കുന്നത്.
നഗരത്തിലെ ഗതാഗതക്കുരുക്ക് കുറയ്ക്കുന്നതിനായി പോഡ് ടാക്സി സംവിധാനം നടപ്പാക്കാനാണ് പ്രധാന നീക്കം. ചെറിയ ക്യാപ്സ്യൂൾ മാതൃകയിലുള്ള ഈ സംവിധാനം വേഗത്തിൽ യാത്ര ചെയ്യാൻ സഹായിക്കുന്നതോടൊപ്പം നഗര ഗതാഗതത്തിന് പുതിയ മുഖം നൽകുമെന്നും പ്രതീക്ഷിക്കുന്നു.
ഇതോടൊപ്പം, പാരിസിലെ ഐഫൽ ടവറിനെ ഓർമ്മിപ്പിക്കുന്ന ഇരട്ട ഗോപുരങ്ങൾ നിർമ്മിക്കുന്നതും പരിഗണനയിലാണ്. നഗരത്തിന്റെ ആകാശരേഖ മാറ്റിമറിക്കുന്ന ഈ പദ്ധതി വിനോദസഞ്ചാരികളെ ആകർഷിക്കുന്ന പ്രധാന കേന്ദ്രമായി മാറുമെന്ന് വിലയിരുത്തുന്നു.
പദ്ധതികൾ യാഥാർത്ഥ്യമായാൽ, താനെയുടെ വിനോദസഞ്ചാര രംഗത്ത് വലിയ വളർച്ച ഉണ്ടാകുകയും അടിസ്ഥാന സൗകര്യ വികസനത്തോടെ സാമ്പത്തിക രംഗത്തും ഉണർവ് ഉണ്ടാകുകയും ചെയ്യും. ഘട്ടംഘട്ടമായി നടപ്പാക്കുന്ന ഈ പദ്ധതികൾക്ക് സംസ്ഥാന സർക്കാരിന്റെ പ്രത്യേക മുൻഗണനയുണ്ടെന്ന് ബന്ധപ്പെട്ട വൃത്തങ്ങൾ അറിയിച്ചു.
ഇവ നടപ്പിലായാൽ, മുംബൈയ്ക്ക് പിന്നാലെ വികസനത്തിൽ മുന്നിലെത്തുന്ന പ്രധാന നഗരമായി താനെ മാറുമെന്ന പ്രതീക്ഷ ശക്തമാണ്.
