ഇ-പിഴ (ഇ-ചലാൻ) നടപടികൾക്കെതിരെ മഹാരാഷ്ട്രയിൽ ഗതാഗത തൊഴിലാളി സംഘടനകൾ ഇന്ന് അർധരാത്രി മുതൽ സംസ്ഥാനവ്യാപക സമരം പ്രഖ്യാപിച്ചു. ഓട്ടോറിക്ഷ, ടാക്സി, ലോറി, ചരക്കുവാഹനങ്ങൾ, സ്വകാര്യ ബസുകൾ, കാബ് സേവനങ്ങൾ തുടങ്ങി നിരവധി വാഹനങ്ങൾ സമരത്തിൽ പങ്കെടുക്കുമെന്നാണ് സംഘടനകളുടെ അറിയിപ്പ്. ഇതോടെ മുംബൈയും പൂനെയും ഉൾപ്പെടെ പല നഗരങ്ങളിലും യാത്രക്കാർക്ക് ബുദ്ധിമുട്ട് നേരിടാൻ സാധ്യതയുണ്ട്.

ഇ-പിഴ സംവിധാനത്തിലൂടെ ചുമത്തുന്ന പിഴത്തുക കൂടുതലാണെന്നും പലപ്പോഴും തെറ്റായ രീതിയിൽ പിഴ ഈടാക്കപ്പെടുന്നുവെന്നും സംഘടനകൾ ആരോപിക്കുന്നു. പിഴയെ ചോദ്യം ചെയ്യാൻ അപേക്ഷ നൽകുന്നതിന് മുമ്പ് തന്നെ പിഴത്തുകയുടെ 50 ശതമാനം മുൻകൂർ അടയ്ക്കണമെന്ന വ്യവസ്ഥയും ഡ്രൈവർമാർക്ക് വലിയ സാമ്പത്തികഭാരമാണെന്നാണ് അവരുടെ പരാതി.

സർക്കാരുമായി നടത്തിയ ചർച്ചകൾ ഫലം കാണാത്തതിനെ തുടർന്നാണ് സമരം പ്രഖ്യാപിച്ചതെന്ന് സംഘടനകൾ അറിയിച്ചു. ആവശ്യങ്ങൾ പരിഗണിക്കാത്ത പക്ഷം സമരം ശക്തമാക്കുമെന്നും അവർ മുന്നറിയിപ്പ് നൽകി.

ലോറിയും മറ്റ് ചരക്കുവാഹനങ്ങളും സർവീസ് നിർത്തിയാൽ പച്ചക്കറി, പാൽ തുടങ്ങിയ ആവശ്യവസ്തുക്കളുടെ വിതരണത്തെയും ഇത് ബാധിക്കാമെന്ന ആശങ്ക ഉയരുന്നുണ്ട്. വിദ്യാർത്ഥികളുടെ പരീക്ഷകൾ പരിഗണിച്ച് ചില സ്ഥലങ്ങളിൽ സ്കൂൾ ബസുകൾക്ക് ഇളവ് നൽകാൻ സാധ്യതയുണ്ടെന്നും സംഘടനകൾ അറിയിച്ചു.