മുംബൈ: ബോംബെ ഹൈക്കോടതി അനധികൃത പേരി കച്ചവടക്കാരെ നടപടി കൈക്കൊള്ളുന്നതിൽ സംസ്ഥാന സർക്കാരും ബ്രിഹൻമുംബൈ മുനിസിപ്പൽ കോർപ്പറേഷൻ (ബി.എം.സി)യും കാണിക്കുന്ന അനാസ്ഥയെ കടുത്ത ഭാഷയിൽ വിമർശിച്ചു. “സാധാരണക്കാരൻ എവിടേക്കാണ് പോകേണ്ടത്?” എന്ന ചോദ്യം ഉയർത്തിയ കോടതി, പൊതുജനങ്ങളുടെ ദുരിതം ഗൗരവമായി പരിഗണിക്കണമെന്ന് നിർദ്ദേശിച്ചു.
ദക്ഷിണ മുംബൈയിലെ സ്ഥിതിഗതികളെക്കുറിച്ചുള്ള റിപ്പോർട്ടിന്റെ അടിസ്ഥാനത്തിലാണ് കോടതിയുടെ നിരീക്ഷണം. സി.എസ്.ടി മുതൽ ഹൈക്കോടതി പരിസരം വരെ സ്ഥിതി ഭാഗികമായി നിയന്ത്രണത്തിലാണെങ്കിലും, കൊളാബ കോസ്വേ പ്രദേശത്ത് അനധികൃത വ്യാപാരികളുടെ അധിനിവേശം തുടരുന്നതായി കണ്ടെത്തിയതായി കോടതി അറിയിച്ചു.
പരാതിയുടെ അടിസ്ഥാനത്തിൽ കോടതി നിയോഗിച്ച നിയമസഹായി ജംഷെദ് മിസ്ത്രിയും ബി.എം.സി പ്രതിനിധികളും സ്ഥലപരിശോധന നടത്തി. റെയിൽവേ സ്റ്റേഷനുകൾ, സ്കൂളുകൾ, ആശുപത്രികൾ എന്നിവയ്ക്ക് സമീപമുള്ള നിയന്ത്രണങ്ങൾ ലംഘിച്ചും അനധികൃത വ്യാപാരം തുടരുന്നതായി റിപ്പോർട്ടിൽ ചൂണ്ടിക്കാട്ടി.
ഇവരെ നീക്കിയാലും അവർ വീണ്ടും മടങ്ങിവരുന്നുവെന്ന് ബി.എം.സി കോടതിയിൽ അറിയിച്ചു. തുടർന്ന് സ്ഥിരമായ നടപടി സ്വീകരിക്കുക പൊലീസിന്റെ ഉത്തരവാദിത്വമാണെന്നും അവർ പറഞ്ഞു. മറുവശത്ത്, പൊലീസിന്റെ സാന്നിധ്യത്തിൽ ബി.എം.സി തുടർച്ചയായി നടപടികൾ സ്വീകരിക്കണമെന്നാണ് സംസ്ഥാനത്തിന്റെ നിലപാട്.
ഇരുവിഭാഗങ്ങളും ഉത്തരവാദിത്വം പരസ്പരം മാറ്റിവെക്കുന്നതിൽ കോടതി കടുത്ത അസന്തോഷം രേഖപ്പെടുത്തി. മുമ്പ് നൽകിയ നിർദേശങ്ങൾ നിലനിൽക്കുന്നതിനിടയിലും പ്രശ്നം തുടർന്നുകൊണ്ടിരിക്കുന്നത് ഗൗരവകരമാണെന്നും, പൊതുജനങ്ങളുടെ സൗകര്യം ഉറപ്പാക്കാൻ അടിയന്തര നടപടി അനിവാര്യമാണെന്നും കോടതി വ്യക്തമാക്കി.
