മുംബൈ : മുംബൈയ്ക്ക് സമീപമുള്ള വസായിൽ വിവാഹച്ചടങ്ങിനിടെ ഉണ്ടായ സ്ത്രീധന തർക്കം വൻ സംഘർഷത്തിലേക്ക് വഴിമാറി. വധൂവര പക്ഷങ്ങൾ തമ്മിലുണ്ടായ വാക്കേറ്റം പിന്നീട് കൂട്ടത്തല്ലായി മാറിയതോടെ വിവാഹവേദിയിൽ പരിഭ്രാന്തി പടർന്നു. സംഭവത്തിൽ നിരവധി പേർക്ക് പരിക്കേറ്റു.

വസായി വെസ്റ്റിലെ സ്വാതന്ത്ര്യവീർ സവർക്കർ സ്പോർട്സ് കോംപ്ലക്സിലായിരുന്നു സംഭവം. സ്ത്രീധനവും വിവാഹസമ്മാനങ്ങളും സംബന്ധിച്ച തർക്കമാണ് സംഘർഷത്തിന് കാരണമായതെന്ന് പൊലീസ് അറിയിച്ചു. ആദ്യം ചെറിയ വാക്കുതർക്കമായിരുന്നു ഉണ്ടായത്. എന്നാൽ പിന്നീട് ഇരുപക്ഷത്തുമുള്ള ബന്ധുക്കളും സുഹൃത്തുക്കളും തമ്മിൽ ഏറ്റുമുട്ടലിലേക്ക് കാര്യങ്ങൾ നീങ്ങുകയായിരുന്നു.

സംഭവത്തിനിടെ കസേരകളും മറ്റ് വസ്തുക്കളും ഉപയോഗിച്ച് ആക്രമണം നടന്നതായും റിപ്പോർട്ടുണ്ട്. വിവാഹവേദിയിൽ ഉണ്ടായിരുന്ന സ്ത്രീകളും കുട്ടികളും ഉൾപ്പെടെ നിരവധി പേർ ഭീതിയിലായി. ചിലർക്ക് മർദനത്തിൽ പരിക്കേറ്റതിനെ തുടർന്ന് സമീപത്തെ ആശുപത്രികളിൽ പ്രവേശിപ്പിച്ച് ചികിത്സ നൽകി.

സമൂഹമാധ്യമങ്ങളിൽ പ്രചരിച്ച ദൃശ്യങ്ങളിൽ ആളുകൾ തമ്മിൽ തള്ളിക്കയറി മർദിക്കുന്നതും ഉച്ചത്തിൽ വാക്കേറ്റം നടക്കുന്നതും വ്യക്തമായി കാണാം. വിവാഹച്ചടങ്ങ് പൂർണമായും കലാപാവസ്ഥയിലായതോടെ അതിഥികൾ പലരും സ്ഥലത്ത് നിന്ന് ഓടി രക്ഷപ്പെടുകയും ചെയ്തു.

15 മുതൽ 20 പേർ വരെ ചേർന്നാണ് ആക്രമണം നടത്തിയതെന്നാണ് പരാതിയിൽ പറയുന്നത്. സ്ത്രീകളെ അപമാനിക്കുകയും ജീവൻ ഭീഷണിപ്പെടുത്തുകയും ചെയ്തതായും പരാതിക്കാർ ആരോപിച്ചു.

സംഭവത്തെ തുടർന്ന് മാണിക്പുർ പോലീസ് ഭാരതീയ ന്യായ സംഹിതയിലെ വിവിധ വകുപ്പുകൾ പ്രകാരം കേസ് രജിസ്റ്റർ ചെയ്തു. വൈറലായ ദൃശ്യങ്ങളും പരാതികളും പരിശോധിച്ച ശേഷമാകും തുടർനടപടികളെന്ന് പൊലീസ് അറിയിച്ചു. നിലവിൽ ആരെയും അറസ്റ്റ് ചെയ്തിട്ടില്ല.