മുംബൈ: കാലവർഷം എത്താൻ വൈകുന്നതോടെ രാജ്യം കണ്ട ഏറ്റവും വലിയ മഹാനഗരങ്ങളിലൊന്നായ മുംബൈയിൽ കടുത്ത കുടിവെള്ള ക്ഷാമം വരുന്നു. നഗരത്തിലേക്ക് വെള്ളമെത്തിക്കുന്ന പ്രധാന തടാകങ്ങളിലെ ജലശേഖരം വെറും 15.3 ശതമാനമായി കുറഞ്ഞതായി ബൃഹൻമുംബൈ മുൻസിപ്പൽ കോർപ്പറേഷൻ (ബിഎംസി) അറിയിച്ചു. മുംബൈയുടെ ഏറ്റവും പ്രധാനപ്പെട്ട ജലസ്രോതസ്സുകളിലൊന്നായ അപ്പർ വൈതർണ തടാകം ഇപ്പോൾ പൂർണ്ണമായും വറ്റി വരണ്ട അവസ്ഥയിലാണ്. ജൂൺ പകുതിയായിട്ടും മഴ എത്തിയില്ലെങ്കിൽ വരും ദിവസങ്ങളിൽ നഗരത്തിൽ കടുത്ത ജലനിയന്ത്രണം ഏർപ്പെടുത്തേണ്ടി വരുമെന്നാണ് അധികൃതർ നൽകുന്ന സൂച.
നഗരത്തിലെ കുടിവെള്ള ആവശ്യങ്ങൾ നിറവേറ്റുന്ന ഏഴ് പ്രധാന തടാകങ്ങളിലെ നിലവിലെ അവസ്ഥ തികച്ചും ആശങ്കാജനകമാണ്. അപ്പർ വൈതർണയിലെ ജലം പൂർണ്ണമായും തീർന്നപ്പോൾ, താൻസ തടാകത്തിൽ 20 ശതമാനവും മോദക് സാഗറിൽ 26 ശതമാനവും വെള്ളം മാത്രമാണ് ഇപ്പോൾ ശേഷിക്കുന്നത്. വരും ദിവസങ്ങളിലെ വലിയ പ്രതിസന്ധി മറികടക്കാൻ സംസ്ഥാന സർക്കാരിന്റെ പ്രത്യേക കരുതൽ ശേഖരത്തിൽ (സ്റ്റേറ്റ് റിസർവ് ക്വാട്ട) നിന്ന് കൂടുതൽ വെള്ളം അനുവദിക്കണമെന്ന് ബിഎംസി ആവശ്യപ്പെട്ടിട്ടുണ്ട്.
കഴിഞ്ഞ വർഷത്തെ അപേക്ഷിച്ച് ഇത്തവണ തടാകങ്ങളിലെ ജലനിരപ്പിൽ വൻ കുറവാണ് രേഖപ്പെടുത്തിയിരിക്കുന്നത്. കഴിഞ്ഞ വർഷം ഇതേ സമയത്ത് ആവശ്യത്തിന് വെള്ളം തടാകങ്ങളിൽ ഉണ്ടായിരുന്നു. നിലവിലെ ജലക്ഷാമം നേരിടുന്നതിനായി നഗരത്തിൽ ഉടനീളം 10 മുതൽ 15 ശതമാനം വരെ ജലവിതരണം വെട്ടിക്കുറയ്ക്കാൻ (വാട്ടർ കട്ട്) ബിഎംസി ആലോചിക്കുന്നുണ്ട്. വരും ദിവസങ്ങളിൽ ജനങ്ങൾ കുടിവെള്ളം പരമാവധി സൂക്ഷിച്ച് ഉപയോഗിക്കണമെന്നും ഒട്ടും ദൂർത്തടിക്കരുതെന്നും അധികൃതർ കർശന നിർദ്ദേശം നൽകി.
