മുംബൈ: നൃത്തത്തിന്റെയും സംസ്കാരത്തിന്റെയും കലാപ്രതിഭകളുടെയും മഹോത്സവമായി മാറിയ ‘സിന്ധു നായർസ് ഘുങ്രൂ’ ആറാം സീസണിലേക്ക് കടക്കുന്നു. 2026 ജൂൺ 21ന് അരങ്ങേറുന്ന ‘ഘുങ്രൂ – സീസൺ 6’ന്റെ പ്രഖ്യാപനം ഭക്തിനിർഭരമായ ചടങ്ങോടെയാണ് നടത്തിയത്. കലയുടെ പുതിയ അധ്യായത്തിന് ആത്മീയമായ തുടക്കമാകുകയായിരുന്നു മുംബൈയിലെ പ്രശസ്ത സിദ്ധിവിനായക് ക്ഷേത്രത്തിൽ നടന്ന ലോഗോ പ്രകാശനച്ചടങ്ങ്.
സീസൺ 6ന്റെ ഔദ്യോഗിക ലോഗോ മഹാരാഷ്ട്രയിലെ പ്രമുഖ സാമൂഹിക പ്രവർത്തകനായ ശ്രീ രാജാറാം ദേശ്മുഖ് പ്രകാശനം ചെയ്തു. വിഘ്നേശ്വരന്റെ സാന്നിധ്യത്തിൽ നടന്ന ചടങ്ങിൽ കലയും വിശ്വാസവും ഒരുമിച്ചുചേർന്ന അപൂർവ നിമിഷങ്ങൾക്കാണ് സാക്ഷ്യം വഹിക്കാനായത്. പ്രാർഥനയുടെയും പ്രതീക്ഷയുടെയും അന്തരീക്ഷത്തിൽ പുതിയ സീസണിന് തുടക്കമായതായി സംഘാടകർ അറിയിച്ചു.
രാജ്യത്തിന്റെ വിവിധ ഭാഗങ്ങളിൽ നിന്നുള്ള നൃത്തപ്രതിഭകളെ ഒരേ വേദിയിലേക്ക് എത്തിക്കുന്ന സാംസ്കാരിക സംഗമമായാണ് ‘ഘുങ്രൂ’ ഇതിനോടകം ശ്രദ്ധ നേടിയിരിക്കുന്നത്. ഈ വർഷം 111 ടീമുകളിലായി 1600ലേറെ കലാകാരന്മാർ വേദിയിലെത്തും. ശാസ്ത്രീയ നൃത്തം, നാടോടി കലാരൂപങ്ങൾ, വെസ്റ്റേൺ ഡാൻസ് തുടങ്ങി വൈവിധ്യമാർന്ന അവതരണങ്ങളാണ് പ്രേക്ഷകരെ കാത്തിരിക്കുന്നത്.
ഓരോ പ്രകടനത്തിനും പിന്നിൽ മാസങ്ങളായുള്ള പരിശീലനവും കഠിനാധ്വാനവും ആത്മസമർപ്പണവും ഉണ്ടെന്ന് സംഘാടകർ വ്യക്തമാക്കി. പാരമ്പര്യത്തിന്റെ ചുവടുകളെ പുതുതലമുറയുടെ ആവേശത്തോട് ചേർത്തിണക്കുന്ന അവതരണങ്ങളിലൂടെ കലാസ്വാദകർക്ക് മറക്കാനാകാത്ത അനുഭവം സമ്മാനിക്കാനാണ് ഒരുക്കങ്ങൾ പുരോഗമിക്കുന്നത്.
ഭാഷയുടെയും ദേശത്തിന്റെയും പ്രായത്തിന്റെയും അതിരുകൾ മറികടന്ന് നൃത്തമെന്ന ഒരേയൊരു ഭാഷയിൽ കലാകാരന്മാർ ഒന്നിക്കുന്ന വേദിയായിരിക്കും ഇത്തവണത്തെ ഘുങ്രൂ. ഓരോ ചുവടിലും കഥകളുണ്ടാകും; ഓരോ അവതരണത്തിലും സംസ്കാരത്തിന്റെ സ്പന്ദനമുണ്ടാകും. ‘ഒരുമയിലെ വൈവിധ്യം’ എന്ന സന്ദേശം ഉയർത്തിപ്പിടിച്ചാണ് ഈ വർഷത്തെ സീസൺ സംഘടിപ്പിക്കുന്നത്.
