മുംബൈ: സംസ്ഥാനത്തെ ആരോഗ്യമേഖലയെ ആശങ്കയിലാഴ്ത്തി മഹാരാഷ്ട്രയിൽ വെറും 35 ദിവസത്തെ തീവ്ര പരിശോധനയിലൂടെ 6,111 പുതിയ ക്ഷയരോഗ (ടിബി) കേസുകൾ സ്ഥിരീകരിച്ചു. ആരോഗ്യ വകുപ്പ് നടത്തിയ സജീവ കേസ് കണ്ടെത്തൽ (ACF) ദൗത്യത്തിലൂടെയാണ് ഇത്രയും ചുരുങ്ങിയ ദിവസങ്ങൾക്കുള്ളിൽ ഇത്രയധികം രോഗികളെ കണ്ടെത്തിയത്. ഇതിനുപുറമേ, സംസ്ഥാനത്തെ 11,091 ഗ്രാമങ്ങൾ ക്ഷയരോഗ വ്യാപനത്തിന് അതീവ സാധ്യതയുള്ള ‘ഹൈ-റിസ്ക്’ മേഖലകളാണെന്ന് കൃത്രിമബുദ്ധി (AI) സംവിധാനം മുന്നറിയിപ്പ് നൽകിയതും അധികൃതരെ ആശങ്കയിലാഴ്ത്തുന്നു.

​ഗ്രാമീണ-നഗര മേഖലകളിലെയും ചേരികളിലെയും ദുർബല വിഭാഗങ്ങളെ ലക്ഷ്യമിട്ടായിരുന്നു ഈ വൻ പരിശോധന. സംശയമുള്ള 1,02,400 പേരുടെ കഫം പരിശോധിച്ചതിൽ നിന്ന് 5,640 പേർക്കും, എക്സ്-റേ പരിശോധനയിലൂടെ 471 പേർക്കും ഉൾപ്പെടെയാണ് ആകെ 6,111 പേർക്ക് രോഗബാധ കണ്ടെത്തിയത്. ഇവർക്കെല്ലാം സൗജന്യ ചികിത്സ ഉറപ്പാക്കിയിട്ടുണ്ട്. ചരിത്രത്തിലാദ്യമായി ഐഐടി ബോംബെയുടെ (IIT Bombay) സഹായത്തോടെ വികസിപ്പിച്ച എഐ മോഡൽ ഉപയോഗിച്ചാണ് മുൻകാല വിവരങ്ങൾ വിശകലനം ചെയ്ത് ഉയർന്ന സാധ്യതയുള്ള 11,091 ഗ്രാമങ്ങളെ തിരിച്ചറിഞ്ഞത്. ഇവിടെ നിരീക്ഷണം കൂടുതൽ ശക്തമാക്കും.

രോഗികൾക്ക് പോഷകാഹാരവും പിന്തുണയും നൽകുന്ന കേന്ദ്ര സർക്കാരിന്റെ ‘നിക്ഷയ് മിത്ര’ പദ്ധതിയും സംസ്ഥാനത്ത് സജീവമാണ്. നിലവിൽ മഹാരാഷ്ട്രയിൽ രജിസ്റ്റർ ചെയ്ത 22,504 നിക്ഷയ് മിത്രങ്ങൾ വഴി 53,858 രോഗികൾക്ക് സഹായം ലഭിക്കുന്നുണ്ട്. 2025-ഓടെ രാജ്യം ക്ഷയരോഗ വിമുക്തമാക്കുക എന്ന ലക്ഷ്യത്തോടെയാണ് ഈ തീവ്ര ദൗത്യം മുന്നോട്ട് പോകുന്നത്.