മുംബൈ: സംസ്ഥാനത്ത് പെരുകി വരുന്ന വ്യാജ ഡോക്ടർമാരുടെ ശല്യം പൂർണ്ണമായും തുടച്ചുനീക്കാൻ വിപ്ലവകരമായ ഡിജിറ്റൽ സംവിധാനവുമായി മഹാരാഷ്ട്ര സർക്കാർ. രോഗികൾക്ക് മുന്നിലിരിക്കുന്ന ഡോക്ടർ യഥാർത്ഥത്തിൽ യോഗ്യതയുള്ള ആളാണോ എന്ന് നിമിഷനേരം കൊണ്ട് തിരിച്ചറിയാൻ സഹായിക്കുന്ന ‘നോ യുവർ ഡോക്ടർ’ ക്യൂആർ കോഡ് വെരിഫിക്കേഷൻ സംവിധാനം സംസ്ഥാന സർക്കാർ ഔദ്യോഗികമായി പ്രഖ്യാപിച്ചു. മഹാരാഷ്ട്ര മെഡിക്കൽ കൗൺസിൽ വികസിപ്പിച്ചെടുത്ത ഈ പദ്ധതി നിയമസഭയിലാണ് മെഡിക്കൽ വിദ്യാഭ്യാസ മന്ത്രി ഹസൻ മുഷ്രിഫ് പ്രഖ്യാപിച്ചത്.
ഈ പുതിയ നയം അനുസരിച്ച് സംസ്ഥാനത്തെ എല്ലാ രജിസ്റ്റേർഡ് ഡോക്ടർമാരും തങ്ങളുടെ ക്ലിനിക്കുകളിലോ ആശുപത്രികളിലോ ഈ ക്യൂആർ കോഡ് നിർബന്ധമായും പ്രദർശിപ്പിക്കണം. ചികിത്സ തേടിയെത്തുന്ന പൊതുജനങ്ങൾക്ക് മൊബൈൽ ഫോൺ ഉപയോഗിച്ച് ഈ ക്യൂആർ കോഡ് സ്കാൻ ചെയ്യുന്നതിലൂടെ ഡോക്ടറുടെ പേര്, യോഗ്യത, രജിസ്ട്രേഷൻ നമ്പർ, സ്പെഷ്യലൈസേഷൻ തുടങ്ങിയ വിവരങ്ങൾ ഉടനടി പരിശോധിക്കാൻ സാധിക്കും. ഗ്രാമീണ-നഗര വ്യത്യാസമില്ലാതെ ജനങ്ങളുടെ ജീവൻ വെച്ച് കളിക്കുന്ന വ്യാജന്മാരെ പിടികൂടാൻ ഈ സുതാര്യമായ ഡിജിറ്റൽ സംവിധാനം വഴി സാധിക്കുമെന്ന് മന്ത്രി വ്യക്തമാക്കി.
സോലാപൂർ ജില്ലയിലെ വ്യാജ ഡോക്ടർമാർക്കെതിരെ സ്വീകരിച്ച നടപടികളെക്കുറിച്ച് നിയമസഭയിൽ ചോദ്യോത്തര വേളയിൽ എംഎൽഎ വിജയ് ദേശ്മുഖ് ഉന്നയിച്ച ചോദ്യത്തിന് മറുപടി നൽകുകയായിരുന്നു മന്ത്രി. ചർച്ചയിൽ പങ്കെടുത്ത എംഎൽഎമാരായ രാഹുൽ കുൽ, രാഹുൽ പാട്ടീൽ എന്നിവരും ഈ വിഷയത്തിൽ ഉപചോദ്യങ്ങൾ ഉന്നയിച്ചു. മറാത്ത്വാഡ, വിദർഭ മേഖലകളിൽ ‘ബംഗാളി ഡോക്ടർമാർ’ എന്ന പേരിൽ വ്യാജന്മാർ ഗ്രാമങ്ങളിൽ ക്ലിനിക്കുകൾ സ്ഥാപിച്ച് രോഗികൾക്ക് വീര്യമേറിയ സ്റ്റിറോയിഡുകൾ നൽകുന്നത് ഗുരുതരമായ ആരോഗ്യപ്രശ്നങ്ങൾ ഉണ്ടാക്കുന്നുണ്ടെന്ന് എംഎൽഎ രാഹുൽ പാട്ടീൽ സഭയുടെ ശ്രദ്ധയിൽപ്പെടുത്തി. നഴ്സിംഗ് രജിസ്ട്രേഷൻ ഓഡിറ്റ് ചെയ്യുന്നതിനായി ഒരു പ്രത്യേക ‘ടാസ്ക് ഫോഴ്സ്’ രൂപീകരിക്കണമെന്നും അദ്ദേഹം സർക്കാരിനോട് ആവശ്യപ്പെട്ടു.
നിലവിൽ മഹാരാഷ്ട്രയിൽ ഏകദേശം 1,40,000 രജിസ്റ്റേർഡ് ഡോക്ടർമാരുണ്ടെന്നും പ്രതിവർഷം 12,824 പുതിയ എംബിബിഎസ് ബിരുദധാരികൾ മെഡിക്കൽ രംഗത്തേക്ക് വരുന്നുണ്ടെന്നും മന്ത്രി ഹസൻ മുഷ്രിഫ് സഭയെ അറിയിച്ചു. എംബിബിഎസ്, ബിരുദാനന്തര ബിരുദം, ബിഎഎംഎസ്, ബിഎച്ച്എംഎസ്, യുനാനി, ഡെന്റൽ സയൻസ് തുടങ്ങിയ മേഖലകളിൽ നിയമപരമായ രജിസ്ട്രേഷൻ ഇല്ലാതെ പ്രാക്ടീസ് ചെയ്യുന്നവരെയാണ് ‘വ്യാജ ഡോക്ടർമാർ’ ആയി കണക്കാക്കുന്നത്. ഇത്തരം അനധികൃത പ്രാക്ടീഷണർമാർക്കെതിരെ 2015 നും 2026 നും ഇടയിൽ സംസ്ഥാനത്തുടനീളം 89 ക്രിമിനൽ കേസുകൾ രജിസ്റ്റർ ചെയ്തിട്ടുണ്ട്.
വ്യാജന്മാർക്കെതിരെയുള്ള നിരീക്ഷണം ശക്തമാക്കാൻ തഹസിൽദാർമാരുടെ അധ്യക്ഷതയിലുള്ള താലൂക്ക് തല സമിതികളും, ജില്ലാ കളക്ടർമാരുടെ അധ്യക്ഷതയിലുള്ള ജില്ലാതല സമിതികളും സർക്കാർ പുനസംഘടിപ്പിക്കും. താഴേത്തട്ടിലുള്ള മേൽനോട്ടം ഉറപ്പാക്കാൻ ഈ സമിതികളിൽ ഇനിമുതൽ പ്രാദേശിക ജനപ്രതിനിധികളെക്കൂടി ഉൾപ്പെടുത്തും. നിയമലംഘകർക്ക് കാത്തിരിക്കുന്നത് അതീവ ഗുരുതരമായ ശിക്ഷാനടപടികളാണ്. നാഷണൽ മെഡിക്കൽ കമ്മീഷൻ മാർഗ്ഗനിർദ്ദേശങ്ങൾ അനുസരിച്ച്, അനധികൃത പ്രാക്ടീസിന് ഒരു വർഷം വരെ തടവോ അല്ലെങ്കിൽ 50 ലക്ഷം രൂപ വരെ പിഴയോ ഈടാക്കാം. ഇതിന് പുറമെ, മഹാരാഷ്ട്ര മെഡിക്കൽ പ്രാക്ടീഷണേഴ്സ് ആക്ട് പ്രകാരം ആദ്യത്തെ കുറ്റത്തിന് 2 വർഷം വരെ തടവുശിക്ഷ ലഭിക്കും. ഇതേ കുറ്റം ആവർത്തിക്കുന്നവർക്ക് 10 വർഷം വരെ കഠിനതടവാണ് നിയമം അനുശാസിക്കുന്നത്. ജനങ്ങളുടെ ജീവൻ അപകടത്തിലാക്കുന്നവർക്കെതിരെ ഏറ്റവും കഠിനമായ ശിക്ഷ ഉറപ്പാക്കുന്നതിനായി പിസി-പിഎൻഡിടി ആക്റ്റിൽ ആവശ്യമായ ഭေദഗതികൾ വരുത്താൻ സർക്കാർ പൂർണ്ണ പിന്തുണ നൽകുമെന്നും മന്ത്രി ഹസൻ മുഷ്രിഫ് വ്യക്തമാക്കി.
