മുംബൈ: മെട്രോയും ലോക്കൽ ട്രെയിനുകളും താണ്ടി നഗരത്തിന്റെ പ്രധാന വാണിജ്യ കേന്ദ്രമായ ബാന്ദ്ര കുർള കോംപ്ലക്സിലേക്ക് (ബി.കെ.സി) എത്തുന്ന ലക്ഷക്കണക്കിന് യാത്രികരുടെ യാത്രാക്ലേശത്തിന് പരിഹാരവുമായി മുംബൈ മെട്രോപൊളിറ്റൻ റീജിയൻ ഡെവലപ്മെന്റ് അതോറിറ്റി. റോഡിലെ ട്രാഫിക് ബ്ലോക്കിൽ പെടാതെ, വായുവിലൂടെ പായാൻ കഴിയുന്ന ഇന്ത്യയിലെ ആദ്യത്തെ വൻകിട ‘പോഡ് ടാക്സി’ (Automated Rapid Transit) ശൃംഖലയ്ക്കാണ് മുംബൈ നഗരം ഒരുങ്ങുന്നത്. ലണ്ടൻ ഹീത്രൂ വിമാനത്താവളത്തിലെ പ്രശസ്തമായ പോഡ് ടാക്സി സാങ്കേതികവിദ്യയുടെ മാതൃകയിലാണ് ഈ സ്വപ്ന പദ്ധതി യാഥാർഥ്യമാകുന്നത്.
റെയിൽവേ സ്റ്റേഷനുകളിൽ നിന്നിറങ്ങി ബി.കെ.സിയിലെ ഓഫീസുകളിലേക്ക് പോകാൻ ഷെയർ ഓട്ടോകൾക്കായി കിലോമീറ്ററുകളോളം നീളുന്ന ക്യൂവും, അമിത നിരക്കിനെച്ചൊല്ലിയുള്ള തർക്കങ്ങളും, ശ്വാസം മുട്ടിക്കുന്ന റോഡ് ബ്ലോക്കുകളും മുംബൈക്കാരുടെ നിത്യേനയുള്ള തലവേദനയാണ്. നിലവിൽ 4 മുതൽ 6 ലക്ഷം വരെ ആളുകളാണ് ദിവസേന ഇവിടേക്ക് ജോലിക്കായി എത്തുന്നത്. വരാനിരിക്കുന്ന ബുള്ളറ്റ് ട്രെയിൻ ടെർമിനൽ കൂടി യാഥാർഥ്യമാകുന്നതോടെ ഇത് ഇനിയും കുതിച്ചുയരും. ഈ സാഹചര്യത്തിലാണ് കുർള, ബാന്ദ്ര റെയിൽവേ സ്റ്റേഷനുകളെ ബി.കെ.സിയുമായി ബന്ധിപ്പിക്കുന്ന പോഡ് ടാക്സി പദ്ധതിക്ക് തുടക്കമിട്ടിരിക്കുന്നത്.
പൂർണ്ണമായും ഡ്രൈവറില്ലാതെ, ആർട്ടിഫിഷ്യൽ ഇന്റലിജൻസ് സാങ്കേതികവിദ്യയിൽ ബാറ്ററിയിലാണ് ഈ പോഡ് ടാക്സികൾ പ്രവർത്തിക്കുന്നത്. മണിക്കൂറിൽ 40 കിലോമീറ്റർ വേഗതയുള്ള, പൂർണ്ണമായും ശീതീകരിച്ച ഓരോ പോഡിലും 6 പേർക്ക് യാത്ര ചെയ്യാം. റോഡിന് മുകളിലുള്ള പ്രത്യേക എലിവേറ്റഡ് ട്രാക്കിലൂടെയാണ് ഇവ സർവീസ് നടത്തുക. ഓരോ 15 സെക്കൻഡിലും സ്റ്റേഷനുകളിൽ പോഡുകൾ ലഭ്യമാകും എന്നതാണ് പ്രധാന ആകർഷണം. യാത്രക്കാർ ആവശ്യപ്പെടുന്ന സ്റ്റേഷനുകളിൽ മാത്രം നിർത്തുന്ന തരത്തിലാണ് ഇതിന്റെ സിസ്റ്റം ക്രമീകരിച്ചിരിക്കുന്നത്.
ആകെ 8.85 കിലോമീറ്റർ ദൂരത്തിൽ 22 സ്റ്റേഷനുകളുമായാണ് പദ്ധതി വിഭാവനം ചെയ്തിരിക്കുന്നത്. ആദ്യഘട്ടത്തിൽ കുർള ടെർമിനൽ മുതൽ ബാന്ദ്ര ഈസ്റ്റ് വരെയുള്ള 3.36 കിലോമീറ്റർ പാതയാണ് നിർമ്മിക്കുന്നത്. ഇതിന്റെ നിർമ്മാണോദ്ഘാടനം കഴിഞ്ഞതായും, 20 മാസങ്ങൾക്കുള്ളിൽ ഒന്നാം ഘട്ടം പൂർത്തിയാകുമെന്നുമാണ് അധികൃതർ വ്യക്തമാക്കുന്നത്. യാത്രക്കാർക്ക് കിലോമീറ്ററിന് 21 രൂപ നിരക്കിൽ ഈ ആധുനിക സൗകര്യം ഉപയോഗപ്പെടുത്താം. സർക്കാർ സാമ്പത്തിക സഹായമില്ലാതെ പൊതു-സ്വകാര്യ പങ്കാളിത്തത്തോടെ (PPP) നിർമ്മിക്കുന്ന രാജ്യത്തെ ആദ്യ ഗതാഗത പദ്ധതി കൂടിയാണിത്. ‘സായ് ഗ്രീൻ മൊബിലിറ്റി’ എന്ന കമ്പനിയാണ് പദ്ധതി നടപ്പിലാക്കുന്നത്.
എന്നാൽ, ഈ ആകാശ ടാക്സികൾക്ക് ബി.കെ.സിയിലെ വൻ ജനത്തിരക്ക് പൂർണ്ണമായും ഉൾക്കൊള്ളാൻ കഴിയുമോ എന്ന കാര്യത്തിൽ ഗതാഗത വിദഗ്ധർക്കിടയിൽ ഭിന്നാഭിപ്രായമുണ്ട്. ഒരു പോഡിൽ 6 പേർ വീതം 15 സെക്കൻഡ് ഇടവേളകളിൽ സർവീസ് നടത്തിയാൽ പോലും ഒരു മണിക്കൂറിൽ ഒരു ദിശയിലേക്ക് പരമാവധി 1500 പേരെ മാത്രമേ കൊണ്ടുപോകാൻ സാധിക്കൂ. ദിവസേന ലക്ഷക്കണക്കിന് ആളുകൾ എത്തുന്ന ബി.കെ.സിയിൽ ഇതൊരു വലിയ മാറ്റം ഉണ്ടാക്കില്ലെന്നും, ഇതൊരു ‘പ്രീമിയം’ സർവീസായി ഒതുങ്ങിപ്പോകാൻ സാധ്യതയുണ്ടെന്നുമാണ് വിമർശകരുടെ വാദം. എങ്കിലും വരാനിരിക്കുന്ന മെട്രോ ലൈനുകളുമായി പോഡ് ടാക്സി കൂടിച്ചേരുന്നതോടെ മുംബൈയുടെ യാത്രാമുഖം മാറുമെന്ന പ്രതീക്ഷയിലാണ് അധികൃതർ.
