മുംബൈ: ഈ മൺസൂൺ കാലത്ത് പ്രകൃതിഭംഗി ആസ്വദിക്കാൻ മാഥേരാനിലേക്ക് (Matheran) യാത്ര പ്ലാൻ ചെയ്യുന്ന സഞ്ചാരികൾക്കായി പ്രധാന അറിയിപ്പ്. കനത്ത മഴയുടെ പശ്ചാത്തലത്തിൽ യാത്രാസുരക്ഷ മുൻനിർത്തി, ചരിത്രപ്രസിദ്ധമായ മാഥേരാൻ ഹിൽ റെയിൽവേ റൂട്ടിലെ നെരൾ – അമൻ ലോഡ്ജ് (Neral – Aman Lodge) വിഭാഗത്തിലെ റെഗുലർ ടോയ് ട്രെയിൻ സർവീസുകൾ മധ്യ റെൽവേ (Central Railway) താത്കാലികമായി നിർത്തിവെച്ചു. ജൂൺ 15 മുതൽ ഒക്ടോബർ 15 വരെയുള്ള നാല് മാസക്കാലത്തേക്കാണ് ഈ സുരക്ഷാ ക്രമീകരണം ഏർപ്പെടുത്തിയിരിക്കുന്നത്. കനത്ത മഴ, കുറഞ്ഞ കാഴ്ചപരിധി, ഉരുൾപൊട്ടൽ സാധ്യത എന്നിവ കണക്കിലെടുത്താണ് മൺസൂൺ കാലത്ത് ഈ റൂട്ടിലെ സർവീസ് നിർത്തിവെക്കുന്നത്.

അമൻ ലോഡ്ജ് – മാഥേരാൻ സർവീസുകൾ തുടരും; സഞ്ചാരികൾക്ക് ആശ്വാസം

താഴത്തെ സെക്ഷൻ അടച്ചിടുമെങ്കിലും സഞ്ചാരികളുടെയും പ്രദേശവാസികളുടെയും യാത്രാസൗകര്യം കണക്കിലെടുത്ത് അമൻ ലോഡ്ജിനും മാഥേരാൻ റെയിൽവേ സ്റ്റേഷനും ഇടയിലുള്ള ഷട്ടിൽ ടോയ് ട്രെയിൻ സർവീസുകൾ ഈ കാലയളവിലും സാധാരണപോലെ തുടരുമെന്ന് റെയിൽവേ അധികൃതർ വ്യക്തമാക്കിയിട്ടുണ്ട്. വരാന്ത്യങ്ങളിലെ (ശനി, ഞായർ) വർധിച്ച തിരക്ക് പരിഗണിച്ച് അധിക സർവീസുകളും ഈ റൂട്ടിൽ ഷെഡ്യൂൾ ചെയ്തിട്ടുണ്ട്. 3 സെക്കൻഡ് ക്ലാസ് കോച്ചുകൾ, ഒരു ഫസ്റ്റ് ക്ലാസ് കോച്ച്, രണ്ട് എസ്.എൽ.ആർ/എൽ.ആർ കോച്ചുകൾ എന്നിവയടങ്ങുന്ന 6 കോച്ചുകളുള്ള ട്രെയിനാണ് ഈ റൂട്ടിൽ ഷട്ടിൽ സർവീസിനായി ഉപയോഗിക്കുന്നത്.

​മാഥേരാനിലേക്ക് ഇനി എങ്ങനെ എത്താം?

നെരളിൽ എത്തുന്ന സഞ്ചാരികൾക്ക് അവിടെ നിന്നും ദസ്തൂരി നാക്ക (Dasturi Naka) വരെ ഷെയർ ടാക്സി സർവീസുകൾ വഴി റോഡ് മാർഗ്ഗം യാത്ര ചെയ്യാം. സ്വന്തം വാഹനങ്ങളിൽ വരുന്നവർക്ക് ദസ്തൂരിയിലുള്ള പാർക്കിങ് സൗകര്യം ഉപയോഗപ്പെടുത്താവുന്നതാണ്. ദസ്തൂരിയിൽ നിന്നും അമൻ ലോഡ്ജ് വഴി നിലവിൽ സർവീസ് നടത്തുന്ന ഷട്ടിൽ ടോയ് ട്രെയിനുകളിൽ കയറി സഞ്ചാരികൾക്ക് സുരക്ഷിതമായി മാഥേരാനിലേക്ക് എത്തിച്ചേരാൻ സാധിക്കും. പശ്ചിമഘട്ടത്തിലെ കനത്ത മഴക്കാലത്ത് യാത്രാ സുരക്ഷയും പ്രാദേശിക വിനോദസഞ്ചാര സാധ്യതകളും ഒരുപോലെ സംരക്ഷിക്കാനാണ് റെയിൽവേ ഈ ബദൽ സംവിധാനം ഒരുക്കിയിരിക്കുന്നത്. ഒക്ടോബർ 15-ന് ശേഷം കാലാവസ്ഥാ അനുകൂല്യവും സുരക്ഷാ പരിശോധനകളും വിലയിരുത്തിയ ശേഷം നെരൾ – അമൻ ലോഡ്ജ് റൂട്ടിലെ സാധാരണ ടോയ് ട്രെയിൻ സർവീസുകൾ പുനരാരംഭിക്കും.