മുംബൈ: മുംബൈയിലെ കാന്തിവലിയിൽ 2012-ൽ അഞ്ച് വയസ്സുകാരനെ തട്ടിക്കൊണ്ടുപോയി കൊലപ്പെടുത്തിയ കേസിൽ ജീവപര്യന്തം തടവ് ശിക്ഷ അനുഭവിച്ചിരുന്ന പ്രതിയെ ബോംബെ ഹൈക്കോടതി വെറുതെവിട്ടു. കുറ്റകൃത്യവുമായി പ്രതിയെ ബന്ധിപ്പിക്കുന്ന സാഹചര്യത്തെളിവുകളുടെ കണ്ണികൾ പൂർണ്ണമായി സ്ഥാപിക്കുന്നതിൽ പ്രോസിക്യൂഷൻ പരാജയപ്പെട്ടുവെന്ന് ചൂണ്ടിക്കാണിച്ചാണ് കോടതി നടപടി. പ്രതി മനിഷ് പ്രസാദ് ഗൗഡിന്റെ (Manishprasad Gaud) അപ്പീൽ അനുവദിച്ച കോടതി, അദ്ദേഹത്തിന്റെ ശിക്ഷ റദ്ദാക്കുകയും 50,000 രൂപയുടെ വ്യക്തിഗത ബോണ്ടിന്റെ അടിസ്ഥാനത്തിൽ ഉടൻ മോചിപ്പിക്കാൻ ഉത്തരവിടുകയും ചെയ്തു.
”എത്ര ശക്തമായ സംശയമായാലും അത് തെളിവിന് പകരമാകില്ല” എന്ന് നിരീക്ഷിച്ചാണ് കോടതി വിധി പ്രസ്താവിച്ചത്. ജസ്റ്റിസ് മനീഷ് പിടാലെ (Manish Pitale), ജസ്റ്റിസ് ശ്രീരാം ശിർസാത് (Shreeram Shirsat) എന്നിവരടങ്ങിയ ബെഞ്ചാണ് കേസിൽ വിധി പറഞ്ഞത്. 2012 ഓഗസ്റ്റിലാണ് കാന്തിവലിയിൽ നിന്ന് അഞ്ച് വയസ്സുകാരനായ ആൺകുട്ടിയെ കാണാതാകുന്നത്. തുടർന്ന് ദിവസങ്ങൾക്ക് ശേഷം കുട്ടിയുടെ അഴുകിയ നിലയിലുള്ള മൃതദേഹം കണ്ടെത്തുകയായിരുന്നു. കേസിൽ അറസ്റ്റിലായ മനിഷ് പ്രസാദ് ഗൗഡിനെതിരെ തട്ടിക്കൊണ്ടുപോകൽ, കൊലപാതകം, തെളിവ് നശിപ്പിക്കൽ എന്നീ കുറ്റങ്ങൾ ചുമത്തി 2018 മെയ് മാസത്തിലാണ് ദിൻഡോശി സെഷൻസ് കോടതി ജീവപര്യന്തം തടവ് ശിക്ഷ വിധിച്ചത്. അഡ്വക്കേറ്റ് പ്രശാന്ത് പാണ്ഡെ (Prashant Pandey) മുഖേനയാണ് പ്രതി ഹൈക്കോടതിയെ സമീപിച്ചത്.
കുട്ടിയുടേത് കൊലപാതകമാണെന്ന് കോടതി അംഗീകരിച്ചെങ്കിലും, പ്രോസിക്യൂഷൻ ഹാജരാക്കിയ തെളിവുകളിലെ ഗുരുതരമായ വീഴ്ചകൾ ഹൈക്കോടതി എടുത്തുപറഞ്ഞു. സാക്ഷിമൊഴികളിലെ വൈരുദ്ധ്യങ്ങളും മൊഴി രേഖപ്പെടുത്തുന്നതിലുണ്ടായ അകാരണമായ താമസമും ചൂണ്ടിക്കാണിച്ച കോടതി, ‘ഒടുവിൽ കണ്ടു’ (last-seen) എന്ന സിദ്ധാന്തം പൂർണ്ണമായി മുഖവിലയ്‌ക്കെടുക്കാൻ തയ്യാറായില്ല. കൂടാതെ, ഡിജിറ്റൽ തെളിവുകളും ഭീഷണി കോളുകളും വിശ്വസനീയമല്ലെന്നും തെളിവ് നിയമത്തിലെ 65 ബി പ്രകാരമുള്ള നിർബന്ധിത സർട്ടിഫിക്കറ്റുകൾ അവയ്‌ക്കൊപ്പം ഇല്ലായിരുന്നുവെന്നും കോടതി വ്യക്തമാക്കി. ശബ്ദ പരിശോധനാ റിപ്പോർട്ടും പ്രോസിക്യൂഷൻ വാദത്തിന് അനുകൂലമായിരുന്നില്ല.
പ്രോസിക്യൂഷൻ ആരോപിച്ച സാഹചര്യങ്ങളുടെ പരമ്പര കൃത്യമായി തെളിയിക്കുന്നതിൽ പരാജയപ്പെട്ടുവെന്ന് കോടതി നിരീക്ഷിച്ചു. സാക്ഷികളുടെ വിശ്വാസ്യതയും തെളിവുകളുടെ അടിസ്ഥാനവുമാണ് പ്രധാനം. സംശയം എത്ര ശക്തമാണെങ്കിലും അത് നിയമപരമായ തെളിവുകൾക്ക് പകരമാകില്ലെന്നും കോടതി ആവർത്തിച്ചു വ്യക്തമാക്കി. തുടർന്ന് 2018 മെയ് മാസത്തെ വിചാരണ കോടതി വിധി റദ്ദാക്കിയ ഹൈക്കോടതി, മറ്റ് കേസുകളിൽ ആവശ്യമില്ലെങ്കിൽ പ്രതിയെ ഉടൻ മോചിപ്പിക്കാൻ ഉത്തരവിട്ടു.
