ന്യൂഡൽഹി: രാജ്യത്ത് വർദ്ധിച്ചുവരുന്ന തെരുവുനായ ശല്യം നേരിടാൻ അവയെ കൊന്നൊടുക്കാനോ ദയാവധത്തിന് (Euthanasia) ഇരയാക്കാനോ സുപ്രീം കോടതി ഉത്തരവിട്ടിട്ടില്ലെന്ന് മൃഗസംരക്ഷണ പ്രവർത്തകർ. തെരുവുനായ്ക്കളെ കൊന്നൊടുക്കാൻ കോടതി അനുമതി നൽകിയെന്ന രീതിയിൽ നവമാധ്യമങ്ങളിൽ പ്രചരിക്കുന്ന വാർത്തകൾ തീർത്തും അടിസ്ഥാനരഹിതവും നിയമത്തെ തെറ്റായി വ്യാഖ്യാനിക്കുന്നതുമാണെന്ന് പ്രമുഖ മൃഗസംരക്ഷണ പ്രവർത്തകനായ സേവ്യർ സാന്റിയാഗോ വ്യക്തമാക്കി.
മൃഗങ്ങൾക്കെതിരെയുള്ള ക്രൂരത തടയുന്ന നിയമത്തിലെ (PCA Act) സെക്ഷൻ 11(3)(b) പ്രകാരം മാരകമായ രോഗങ്ങളോ കടുത്ത പരിക്കുകളോ ബാധിച്ച നായ്ക്കളെ മാത്രമേ ദയാവധത്തിന് വിധേയമാക്കാൻ അനുവാദമുള്ളൂ. ഇതേ നിയമം തന്നെയാണ് സുപ്രീം കോടതിയും മുൻപോട്ട് വെച്ചിരിക്കുന്നത്. അല്ലാതെ, കേവലം തെരുവിലലഞ്ഞു തിരിയുന്നു എന്ന കാരണത്താൽ ആരോഗ്യവാനായ ഒരു നായയെപ്പോലും കൊല്ലാൻ ആർക്കും നിയമപരമായ അവകാശമില്ലെന്ന് അദ്ദേഹം ചൂണ്ടിക്കാട്ടി.
തദ്ദേശ സ്വയംഭരണ സ്ഥാപനങ്ങൾ തെരുവുനായ്ക്കളുടെ എണ്ണം നിയന്ത്രിക്കാൻ കേന്ദ്ര സർക്കാർ അംഗീകരിച്ച ‘അനിമൽ ബർത്ത് കൺട്രോൾ’ (ABC) ചട്ടങ്ങൾ കൃത്യമായി പാലിക്കണമെന്നാണ് കോടതി നിർദ്ദേശിച്ചിരിക്കുന്നത്. നായ്ക്കളെ വന്ധ്യംകരണത്തിന് വിധേയമാക്കിയ ശേഷം അവയെ പിടികൂടിയ അതേ സ്ഥലത്തുതന്നെ തിരികെ വിടണം. ഇതിന് വിരുദ്ധമായി നായ്ക്കളെ കൂട്ടത്തോടെ കൊല്ലാനോ മറ്റ് സ്ഥലങ്ങളിലേക്ക് മാറ്റാനോ തദ്ദേശ സ്ഥാപനങ്ങൾക്ക് അധികാരമില്ല.
കോടതി വിധി തെറ്റായി വ്യാഖ്യാനിച്ച് തെരുവുനായ്ക്കളെ ഉപദ്രവിക്കാനോ കൊല്ലാനോ ആരെങ്കിലും തുനിഞ്ഞാൽ അത് കടുത്ത നിയമലംഘനമായി കണക്കാക്കുമെന്നും വൻ നിയമനടപടികൾ നേരിടേണ്ടി വരുമെന്നും സേവ്യർ സാന്റിയാഗോ മുന്നറിയിപ്പ് നൽകി. തെരുവുനായ പ്രശ്നത്തിന് ശാശ്വത പരിഹാരം കാണാൻ വന്ധ്യംകരണവും വാക്സിനേഷനും ഊർജ്ജിതമാക്കുകയാണ് വേണ്ടതെന്നും അദ്ദേഹം കൂട്ടിച്ചേർത്തു.
