ന്യൂഡൽഹി: പ്രധാനമന്ത്രി നരേന്ദ്ര മോദിയുടെ ഔദ്യോഗിക വസതിയായ 7, ലോക് കല്യാൺ മാർഗിനു മുന്നിൽ കുത്തിയിരുന്ന് പ്രതിഷേധിച്ച പ്രതിപക്ഷ നേതാവ് രാഹുൽ ഗാന്ധി, പ്രിയങ്ക ഗാന്ധി വധ്ര, കർണാടക മുഖ്യമന്ത്രി ഡി.കെ. ശിവകുമാർ എന്നിവരുൾപ്പെടെയുള്ള മുതിർന്ന കോൺഗ്രസ് നേതാക്കളെ ഡൽഹി പോലീസ് കസ്റ്റഡിയിലെടുത്തു.

നീറ്റ് (NEET) പരീക്ഷാക്രമക്കേടുകൾക്കെതിരെ സമരം ചെയ്ത വിദ്യാർത്ഥികൾക്കു നേരെ പോലീസ് നടത്തിയ ലാത്തിച്ചാർജിൽ പ്രതിഷേധിച്ചായിരുന്നു കോൺഗ്രസ് നേതാക്കളുടെ അപ്രതീക്ഷിത തെരുവ് സമരം. പ്രധാനമന്ത്രി നരേന്ദ്ര മോദിയുടെയും കേന്ദ്ര ആഭ്യന്തരമന്ത്രി അമിത് ഷായുടെയും രാജി ആവശ്യപ്പെട്ട് പ്രക്ഷോഭകർ വസതിക്കു മുന്നിൽ മുദ്രാവാക്യം വിളികളോടെ കുത്തിയിരുന്നു. കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ രാജിയില്ലാതെയും പാർലമെന്റിൽ വിഷയത്തിൽ ചർച്ച അനുവദിച്ച് ഉറപ്പു ലഭിക്കാതെയും പിന്നോട്ടില്ലെന്ന് രാഹുൽ ഗാന്ധി വ്യക്തമാക്കി.

​കോൺഗ്രസ് അധ്യക്ഷൻ മല്ലികാർജുൻ ഖാർഗെ, കെ.സി. വേണുഗോപാൽ, കേരള മുഖ്യമന്ത്രി വി.ഡി. സതീശൻ, നേതാക്കളായ പവൻ ഖേര, രാജാ വോറിങ്, ദീപേന്ദർ ഹൂഡ, ഭൂപേഷ് ബാഗൽ, ഇമ്രാൻ മസൂദ്, കെ. സുരേഷ്, ചരൺജിത് സിങ് ചന്നി എന്നിവർ സമരത്തിൽ പങ്കാളികളായി. കൂടാതെ സമാജ്‌വാദി പാർട്ടി അധ്യക്ഷൻ അഖിലേഷ് യാദവ്, എൻസിപി (ശരദ് പവാർ) എംപി സുപ്രിയ സുലെ എന്നിവരും പ്രതിഷേധസ്ഥലത്തെത്തി പിന്തുണയറിയിച്ചു.
പ്രതിഷേധം ശക്തമായതിനെ തുടർന്ന് പ്രധാനമന്ത്രിയുടെ വസതിക്കു മുന്നിൽ കേന്ദ്ര സഹമന്ത്രി ജിതേന്ദ്ര സിങ്ങും കേന്ദ്ര ആഭ്യന്തര സെക്രട്ടറി ഗോവിന്ദ് മോഹനും നേരിട്ടെത്തി രാഹുൽ ഗാന്ധിയുമായി ചർച്ച നടത്തി. എന്നാൽ ഡിമാൻഡുകളിൽ ഉറച്ചുനിന്ന നേതാക്കൾ പിരിഞ്ഞുപോകാൻ കൂട്ടാക്കാതിരുന്നതോടെ ഡൽഹി പോലീസ് ഇവരെ ബലമായി നീക്കി കസ്റ്റഡിയിലെടുക്കുകയായിരുന്നു. കസ്റ്റഡിയിലെടുക്കുന്നത് തടയാൻ നേതാക്കൾ കയ്യിൽ സിപ് ടൈകൾ ധരിച്ചാണ് കുത്തിയിരിപ്പ് നടത്തിയത്.

സമരത്തിന് മുന്നോടിയായി രാഹുൽ ഗാന്ധിയും പ്രിയങ്ക ഗാന്ധിയും റാം മനോഹർ ലോഹ്യ ആശുപത്രിയിലെത്തി കഴിഞ്ഞ ദിവസം പരിക്കേറ്റ വിദ്യാർത്ഥികളെ സന്ദർശിച്ചിരുന്നു. രാജ്യത്തെ വിദ്യാർത്ഥികളുടെ ശബ്ദം അടിച്ചമർത്താനാകില്ലെന്നും സമരം തുടരുമെന്നും രാഹുൽ ഗാന്ധി സോഷ്യൽ മീഡിയയിലൂടെ വ്യക്തമാക്കി.