മുംബൈ: ഒളിവിൽ കഴിഞ്ഞിരുന്ന പ്രതികളെ പിടികൂടുന്നതിനായി നടത്തിയ പ്രത്യേക ഡ്രൈവിൽ മുംബൈ പൊലീസ് 367 പേരെ പിടികൂടി. വർഷങ്ങളായി നിയമത്തിന്റെ പിടിയിൽ നിന്നും ഒഴിഞ്ഞുമാറിയിരുന്നവരെയാണ് വ്യത്യസ്ത സ്ഥലങ്ങളിൽ നിന്ന് അറസ്റ്റ് ചെയ്തത്.
പിടിയിലായവരിൽ 20 വർഷത്തിലധികമായി ഒളിവിൽ കഴിഞ്ഞിരുന്ന 18 പേരും ഉൾപ്പെടുന്നു. 1987 മുതൽ തന്നെ ഒളിവിൽ കഴിയുന്ന ചില പ്രതികളെയും ഈ പ്രത്യേക നടപടിയിൽ കണ്ടെത്തിയതായി പൊലീസ് അറിയിച്ചു. നീണ്ട കാലമായി നിലനിന്ന കേസുകളിൽ ഇതോടെ നിർണായക മുന്നേറ്റമുണ്ടായതായി അധികൃതർ വ്യക്തമാക്കി.
കുറ്റകൃത്യങ്ങളിൽ പങ്കെടുത്ത ശേഷം ഒളിവിൽ കഴിയുന്നവരെ കണ്ടെത്തി നിയമത്തിന് മുന്നിലെത്തിക്കുക എന്ന ലക്ഷ്യത്തോടെ തുടർന്നും ഇത്തരത്തിലുള്ള പ്രത്യേക നടപടികൾ ശക്തമാക്കുമെന്ന് മുംബൈ പൊലീസ് അറിയിച്ചു. നിയമം മറികടക്കുന്നവർക്ക് രക്ഷയില്ലെന്ന സന്ദേശമാണ് ഈ നടപടിയിലൂടെ നൽകുന്നതെന്നും അധികൃതർ കൂട്ടിച്ചേർത്തു.
