കേരളത്തിൽ നിന്ന് അകലെയാണെങ്കിലും, മനസ്സിൽ ഇന്നും നിറഞ്ഞുനിൽക്കുന്നത് എന്റെ നാടിന്റെ ഓർമ്മകളാണ്. നാട്ടിലെ ഓണക്കാലത്തിന്റെ ഓർമ്മകളാണ്. ജനിച്ചുവളർന്ന മണ്ണിന്റെ മണമുള്ള ഓർമ്മകൾ…
ഒരുപക്ഷേ അതുകൊണ്ടുതന്നെയാകാം, ഓരോ ഓണക്കാലവും എത്തുമ്പോൾ മനസ്സ് അറിയാതെ തിരികെ നടക്കുന്നത് ആ പഴയ വഴികളിലൂടെയും, മുറ്റത്തെ പൂക്കളത്തിലൂടെയും, ഊഞ്ഞാലിൻ ചുവട്ടിലൂടെയും, ബാല്യത്തിന്റെ ആ സന്തോഷങ്ങളിലൂടെയുമാണ്.
ഒരു പ്രവാസി മലയാളിയായി ഇന്ന് ഓണം ആഘോഷിക്കുമ്പോൾ, ഒരിക്കൽ നഷ്ടപ്പെട്ടുപോയ ആ ഓണക്കാലത്തെ വീണ്ടും കണ്ടെത്താനുള്ള ശ്രമമാണ് ഓരോ ആഘോഷവും. പൂക്കളമിടുന്നു, ഓണസദ്യ ഒരുക്കുന്നു, ഓണക്കോടിയുടുക്കുന്നു, കൂട്ടുകാരെ വിളിക്കുന്നു, ആഘോഷിക്കുന്നു… എന്നിട്ടും മനസ്സിന്റെ ഏതോ കോണിൽ ഒരു ചോദ്യം ബാക്കിയാണ് — എന്റെ ഓർമ്മയിലെ ആ ഓണം എവിടെയാണ്?
നീണ്ട പ്രവാസജീവിതം പിന്നിട്ടിട്ടും, ഇപ്പോഴും ഞാൻ ഒരു പ്രവാസി മലയാളിയാണെന്നുള്ളത് മനസ്സിനെ പറഞ്ഞു പഠിപ്പിക്കേണ്ടിവരുന്നു. കാരണം, മലയാളി എവിടെയാണെങ്കിലും, അവർ മലയാളി തന്നെ.
നാടിനോടും, ഓർമ്മകളോടും, ആ പഴയ ഓണക്കാലത്തോടുമുള്ള ആ ബന്ധം ഒരിക്കലും മായുന്നില്ല.
നഷ്ടപ്പെട്ടുപോയ എന്റെ ഓർമ്മകളിൽ ഇന്നും പൂത്തുനിൽക്കുന്ന ആ ഓണം തേടിയുള്ള ഒരു യാത്ര…
(കഴിഞ്ഞ രണ്ട് പതിറ്റാണ്ടായി ഭോപ്പാലിൽ ആതുരസേവന രംഗത്ത് സജീവമായ സൗമ്യ മോഹൻ ആണ് ലേഖിക. കോട്ടയം ജില്ലയിലെ കുമ്മണ്ണൂർ ആണ് സ്വദേശം.)
