മുംബൈ: മഹാരാഷ്ട്ര ഗതാഗത മന്ത്രിയുടെ അഭ്യർത്ഥനകളും അവശ്യ സർവീസ് നിയമവും (ESMA) കാറ്റിൽപ്പറത്തി ബെസ്റ്റ് (BEST) ജീവനക്കാർ നടത്തുന്ന അനിശ്ചിതകാല ബസ് സമരം രണ്ടാം ദിവസത്തിലേക്ക് കടന്നതോടെ മുംബൈ നഗരത്തിലെ പൊതുഗതാഗത സംവിധാനം താറുമാറായി.
ശനിയാഴ്ചയും ബസുകൾ കൂട്ടത്തോടെ നിരത്തിലിറങ്ങാതിരുന്നതോടെ സാധാരണക്കാരായ ലക്ഷക്കണക്കിന് യാത്രക്കാരാണ് കടുത്ത ദുരിതത്തിലായത്.

നഗരത്തിന്റെ ജീവനനാഡിയായ ബെസ്റ്റ് ബസുകൾ നിരത്തിൽ ഇറങ്ങാതായതോടെ തങ്ങളുടെ ലക്ഷ്യസ്ഥാനങ്ങളിൽ എത്തിച്ചേരാൻ ജനങ്ങൾ പാടുപെടുകയാണ്. കടുത്ത തിരക്കിൽ ശ്വാസം മുട്ടുന്ന ലോക്കൽ ട്രെയിനുകളെയും മെട്രോ സർവീസുകളെയുമാണ് നിലവിൽ യാത്രക്കാർ പ്രധാനമായും ആശ്രയിക്കുന്നത്. റെയിൽവേ സ്റ്റേഷനുകളിലും മെട്രോ ടാക്സി സ്റ്റാൻഡുകളിലും ജനങ്ങളുടെ അഭൂതപൂർവ്വമായ തിരക്കാണ് അനുഭവപ്പെടുന്നത്.
ബസ് സർവീസുകൾ മുടങ്ങിയത് മുതലെടുത്ത് ടാക്സികൾ, ഓട്ടോറിക്ഷകൾ, ആപ്പ് അധിഷ്ഠിത ക്യാബുകൾ എന്നിവർ അമിത ചാർജ് ഈടാക്കുന്നതായും പരാതിയുണ്ട്. നിവൃത്തിയില്ലാതെ വലിയ തുക നൽകിയാണ് പലരും ജോലിക്കും മറ്റുമായി യാത്ര ചെയ്യുന്നത്.

സമരം അവസാനിപ്പിക്കാൻ മഹാരാഷ്ട്ര ഗതാഗത മന്ത്രി നേരിട്ട് അഭ്യർത്ഥന നടത്തുകയും കടുത്ത അച്ചടക്ക നടപടികളിലേക്ക് നീങ്ങാൻ സാധിക്കുന്ന എസ്‍മ (Essential Services Maintenance Act) സർക്കാർ പ്രഖ്യാപിക്കുകയും ചെയ്തിട്ടും തങ്ങളുടെ ആവശ്യങ്ങളിൽ നിന്ന് ഒരടി പിന്നോട്ടില്ലെന്ന ഉറച്ച നിലപാടിലാണ് ബൃഹൻമുംബൈ ഇലക്ട്രിക് സപ്ലൈ ആൻഡ് ട്രാൻസ്പോർട്ട് (BEST) ജീവനക്കാർ. സമരം നീളുന്നത് വരും ദിവസങ്ങളിൽ മുംബൈയിലെ ജനജീവിതം കൂടുതൽ ദുസ്സഹമാക്കുമെന്നാണ് വിലയിരുത്തപ്പെടുന്നത്.