മുംബൈ: നവരാത്രി ആഘോഷങ്ങളുടെ ഭാഗമായി നടക്കുന്ന ഗർബ, ദാന്ധിയ പരിപാടികളിൽ മുസ്ലീങ്ങൾക്ക് പ്രവേശനം വിലക്കണമെന്ന ആവശ്യങ്ങൾക്കിടെ, സൗഹാർദ്ദപരമായ നിലപാടുമായി മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസിന്റെ ഭാര്യയും സാമൂഹിക പ്രവർത്തകയുമായ അമൃത ഫഡ്നാവിസ്. ആഘോഷങ്ങൾ എല്ലാവരെയും ഉൾക്കൊള്ളുന്നതാകണമെന്നും മുസ്ലീം വിഭാഗത്തിലുള്ളവർ ചടങ്ങുകളിൽ പങ്കെടുത്ത് ആഘോഷിക്കുന്നതിൽ തെറ്റൊന്നും കാണുന്നില്ലെന്നും അവർ വ്യക്തമാക്കി.
മഹാരാഷ്ട്രയിലെ ഗർബ, ദാന്ധിയ ആഘോഷങ്ങളിൽ നിന്ന് മുസ്ലീങ്ങളെ വിലക്കണമെന്ന് വിശ്വ ഹിന്ദു പരിഷത്ത് (വി.എച്ച്.പി) ആവശ്യപ്പെടുകയും മന്ത്രി നിതീഷ് റാണെ ഇതിനെ പിന്തുണയ്ക്കുകയും ചെയ്ത പശ്ചാത്തലത്തിലാണ് അമൃത ഫഡ്നാവിസിന്റെ പ്രതികരണം. മറ്റ് സമുദായത്തിലുള്ളവർ സമാധാനപരമായി വന്ന് ആഘോഷങ്ങളിൽ പങ്കുചേരുന്നതിൽ തെറ്റില്ലെന്നാണ് ചൊവ്വാഴ്ച മാധ്യമങ്ങളോട് സംസാരിക്കവെ അവർ പറഞ്ഞത്.
അതേസമയം, ഗർബ ആഘോഷങ്ങളുടെ മറവിൽ ‘ലവ് ജിഹാദ്’ കേസുകൾ വർദ്ധിക്കുന്നുണ്ടെന്നും വിഗ്രഹപൂജയിൽ വിശ്വസിക്കാത്തവർ ഹിന്ദു മതപരമായ ചടങ്ങുകളിൽ പങ്കെടുക്കരുതെന്നുമാണ് മന്ത്രി നിതീഷ് റാണെ വാദിച്ചത്. പങ്കெடுക്കുന്നവരുടെ ആധാർ കാർഡ് പരിശോധിക്കണമെന്നും തിലകം ചാർത്തണമെന്നും ഹനുമാൻ ചാലിസ ചൊല്ലിക്കണമെന്നും വി.എച്ച്.പിയും റാണെയും ആവശ്യപ്പെട്ടിരുന്നു. എന്നാൽ, റാണെയുടെ പരാമർശങ്ങളെക്കുറിച്ചുള്ള ആഴത്തിലുള്ള ചോദ്യങ്ങളിലേക്ക് കടക്കാൻ അമൃത ഫഡ്നാവിസ് തയ്യാറായില്ല.
