മുംബൈ: കസ്റ്റഡിയിലെടുത്ത സമരക്കാരായ വിദ്യാർഥികളെ കള്ളക്കേസിൽ കുടുക്കുമെന്ന് മുംബൈ പോലീസ് ഡ്രൈവർ ഭീഷണിപ്പെടുത്തുന്ന വിഡിയോ വൈറലായ സംഭവത്തിൽ ആദ്യമായി തുറന്നുപറഞ്ഞ് വാനിലുണ്ടായിരുന്ന പതിനെട്ടുകാരനായ വിദ്യാർഥി. പരീക്ഷാ ക്രമക്കേടുകൾക്കെതിരെ സി.ജെ.പി (CJP) നടത്തിയ പ്രതിഷേധത്തിൽ പങ്കെടുക്കാൻ ഉല്ലാസ്നഗറിൽ നിന്നുമെത്തിയ ഹർഷവർധൻ കദാം ആണ് ഒരു ഇംഗ്ലീഷ് മാധ്യമത്തിന് നൽകിയ പ്രത്യേക അഭിമുഖത്തിൽ തങ്ങൾ നേരിട്ട അനുഭവങ്ങളും അതിനുശേഷമുണ്ടായ സൈബർ ആക്രമണങ്ങളും വെളിപ്പെടുത്തിയത്.
മുംബൈ പോലീസിന്റെ വാനിൽ വച്ച് ചിത്രീകരിച്ച 25 സെക്കൻഡ് ദൈർഘ്യമുള്ള വിഡിയോയാണ് സമൂഹമാധ്യമങ്ങളിൽ വലിയ പ്രതിഷേധത്തിന് വഴിവെച്ചത്. വീണ്ടും പ്രതിഷേധിക്കാൻ ഇറങ്ങിയാൽ പോക്കറ്റിൽ ’50 ഗ്രാം പൗഡർ’ വെച്ച് കള്ളക്കേസിൽ കുടുക്കുമെന്നും, ജാമ്യം പോലും കിട്ടാതെ ജീവിതം തുലച്ചു കളയുമെന്നും ഡ്രൈവറായ പവൻ സാങ്ലെ കസ്റ്റഡിയിലുള്ള യുവാക്കളോട് പറയുന്നതാണ് വിഡിയോയിലുള്ളത്. എന്നാൽ ആ സമയത്ത് പോലീസുകാരന്റെ ഈ വാദങ്ങൾ തങ്ങൾ ഗൗരവമായി എടുത്തിരുന്നില്ലെന്നും വാനിനുള്ളിൽ ശാന്തരായിരുന്ന വിദ്യാർഥികൾ അത് തമാശയായി ചിരിച്ചു തള്ളുകയാണ് ചെയ്തതെന്നും ഹർഷവർധൻ കദാം ഓർത്തെടുത്തു. എന്നാൽ ഇത്തരം ഭീഷണികൾ വിദ്യാർഥികളുടെ മാനസികാരോഗ്യത്തെ ഗുരുതരമായി ബാധിക്കുമെന്നും അദ്ദേഹം കൂട്ടിച്ചേർത്തു.
വിഡിയോ വൈറലായതോടെ വലിയ പിന്തുണ ലഭിച്ചെങ്കിലും കടുത്ത വിമർശനങ്ങളും നേരിടേണ്ടി വന്നതായി ഹർഷവർധൻ വെളിപ്പെടുത്തി. വാനിലുണ്ടായിരുന്ന ഡ്രൈവർക്ക് ജോലി നഷ്ടപ്പെടാൻ ഇടയായെന്നും, അതുവഴി അദ്ദേഹത്തിന്റെ കുടുംബത്തിന്റെ ജീവിതം തകർത്തത് താനാണെന്നും ആരോപിച്ചാണ് ഒരു വിഭാഗം ആളുകൾ സോഷ്യൽ മീഡിയയിലൂടെ കടന്നാക്രമിക്കുന്നത്. അതേസമയം, വിഡിയോ വ്യാപകമായി പ്രചരിച്ചതിനെ തുടർന്ന് സംഭവത്തിൽ മുംബൈ പോലീസ് അന്വേഷണത്തിന് ഉത്തരവിട്ടിട്ടുണ്ട്.
