ഛത്രപതി സംഭാജിനഗർ: നീറ്റ് പരീക്ഷാ ക്രമക്കേടുകൾക്കെതിരെ ഡൽഹി ജന്തർ മന്തറിൽ നടന്ന സമരം വൻ വിജയമായതിന് പിന്നാലെ, സമരത്തിന്റെ സൂത്രധാരനും കോക്രോച്ച് ജനതാ പാർട്ടി (സി.ജെ.പി) സ്ഥാപകനുമായ അഭിജിത് ദിപ്കെയുടെ മാതാപിതാക്കളെ സന്ദർശിച്ച് ശിവസേന നേതാവും മഹാരാഷ്ട്ര മന്ത്രിയുമായ സഞ്ജയ് ഷിർസത്. ഞായറാഴ്ച ഛത്രപതി സംഭാജിനഗറിലെ അഭിജിതിന്റെ വസതിയിലെത്തിയാണ് മന്ത്രി കുടുംബാംഗങ്ങളെ കണ്ടത്.

അഭിജിതിന്റെ മാതാപിതാക്കളുമായി തനിക്ക് മുൻപ് തന്നെ അടുത്ത ബന്ധമുണ്ടെന്ന് സന്ദർശന ശേഷം മന്ത്രി സഞ്ജയ് ഷിർസത് മാധ്യമങ്ങളോട് പറഞ്ഞു. രാഷ്ട്രീയ നേട്ടങ്ങൾക്കായുള്ള സന്ദർശനമെന്ന് തെറ്റിദ്ധരിക്കപ്പെടാതിരിക്കാനാണ് പ്രക്ഷോഭ സമയത്ത് ഇവിടേക്ക് വരാതിരുന്നത്. സ്വന്തം മകൻ രാജ്യമെമ്പാടും ഇത്രയധികം പ്രശസ്തനായെന്നോ ഇത്ര വലിയ ഉയരങ്ങളിലെത്തിയെന്നോ വിശ്വസിക്കാൻ ആ മാതാപിതാക്കൾക്ക് ഇപ്പോഴും സാധിച്ചിട്ടില്ല. കേന്ദ്ര സർക്കാരും അഭിജിതിനെ പിന്തുണയ്ക്കുകയും അദ്ദേഹത്തിന്റെ എല്ലാ ആവശ്യങ്ങളും അംഗീകരിക്കുകയും ചെയ്തതായി മന്ത്രി വ്യക്തമാക്കി.

നീറ്റ് ചോദ്യപേപ്പർ ചോർച്ചയ്ക്കെതിരെ ജന്തർ മന്തറിൽ ശക്തമായ പ്രക്ഷോഭം ഉയർന്നതിനെ തുടർന്ന് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ ശനിയാഴ്ച രാജിവച്ചിരുന്നു. പ്രധാനമന്ത്രി നരേന്ദ്ര മോദിക്കാണ് അദ്ദേഹം രാജിക്കത്ത് കൈമാറിയത്. ധർമേന്ദ്ര പ്രധാന്റെ രാജിക്ക് പിന്നാലെ കേന്ദ്രമന്ത്രി പ്രഹ്ലാദ് ജോഷിക്ക് വിദ്യാഭ്യാസ മന്ത്രാലയത്തിന്റെ അധിക ചുമതല നൽകി. ഉപഭോക്തൃ കാര്യം, ഭക്ഷ്യം, പൊതുവിതരണം, പുതിയതും പുനരുപയോഗിക്കാവുന്നതുമായ ഊർജ്ജം എന്നീ വകുപ്പുകളുടെ ചുമതല നിലവിൽ പ്രഹ്ലാദ് ജോഷിക്കുണ്ട്.

30 വയസ്സുകാരനായ മുൻ പൊളിറ്റിക്കൽ കമ്മ്യൂണിക്കേഷൻ സ്ട്രാറ്റജിസ്റ്റാണ് അഭിജിത് ദിപ്കെ. അദ്ദേഹം രൂപീകരിച്ച കോക്രോച്ച് ജനതാ പാർട്ടി എന്ന ആക്ഷേപഹാസ്യ പ്രസ്ഥാനം രാജ്യവ്യാപക ജനകീയ പ്രക്ഷോഭമായി മാറുകയായിരുന്നു. വിദ്യാഭ്യാസ രംഗത്തെ ക്രമക്കേടുകൾക്കെതിരെ ഉയർന്ന ഈ ശക്തമായ പ്രതിഷേധമാണ് കേന്ദ്ര വിദ്യാഭ്യാസ മന്ത്രിയുടെ രാജിയിലേക്ക് നയിച്ചത്.