മുംബൈ: സമാധാനപരമായ പ്രതിഷേധങ്ങൾ ജനാധിപത്യത്തിൽ പൗരന്മാരുടെ അവകാശമാണെന്നും എന്നാൽ സമരക്കാരുടെ ഭാഗത്തുനിന്നോ പൊലീസിന്റെ ഭാഗത്തുനിന്നോ ഉണ്ടാകുന്ന അക്രമങ്ങൾ അനുവദിക്കാനാകില്ലെന്നും മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസിന്റെ 19 വയസ്സുകാരിയായ മകൾ ദിവ്യജ ഫഡ്‌നാവിസ്. ന്യൂഡൽഹിയിൽ നീറ്റ് (NEET) ചോദ്യപേപ്പർ ചോർച്ചയുമായും മറ്റ് വിദ്യാഭ്യാസ വിഷയങ്ങളുമായും ബന്ധപ്പെട്ട് കോക്‌റോച്ച് ജനതാ പാർട്ടി (CJP) നടത്തുന്ന വിദ്യാർത്ഥി പ്രക്ഷോഭത്തെക്കുറിച്ച് നിരന്തരം ചോദ്യങ്ങൾ ഉയർന്ന പശ്ചാത്തലത്തിലാണ് ഇൻസ്റ്റാഗ്രാം പോസ്റ്റിലൂടെ ദിവ്യജയുടെ പ്രതികരണം.

​”സമാധാനപരമായി പ്രതിഷേധിക്കാനുള്ള അവകാശം ജനാധിപത്യത്തിൽ പൗരന്മാർക്കുണ്ട്. എന്നാൽ പ്രതിഷേധക്കാർ പൊലീസിന് നേരെ നടത്തുന്ന അക്രമവും, പൊലീസുകാർ പ്രതിഷേധക്കാർക്ക് നേരെ നടത്തുന്ന അക്രമവും ഒരുതരത്തിലും അനുവദിക്കാൻ പാടില്ല,” ദിവ്യജ വ്യക്തമാക്കി.

രാഷ്ട്രീയ പാർട്ടികളെയോ അവരുടെ ആശയങ്ങളെയോ “അന്ധമായി” പിന്തുണയ്ക്കാതെ വിദ്യാഭ്യാസ പരിഷ്കാരങ്ങളെ പിന്തുണയ്ക്കണമെന്ന് ദിവ്യജ ജനങ്ങളോട് അഭ്യർത്ഥിച്ചു. ഏതൊരു പ്രക്ഷോഭത്തെയും പിന്തുണയ്ക്കുന്നതിന് മുൻപ് അതിന്റെ പിന്നിൽ പ്രവർത്തിക്കുന്നവരുടെ “യഥാർത്ഥ ലക്ഷ്യം” എന്താണെന്ന് പരിശോധിക്കണമെന്നും അവർ ഉപദേശിച്ചു.
​ജനാധിപത്യത്തിലെ പ്രതിപക്ഷം രാജ്യ താല്പര്യങ്ങൾക്ക് മുൻഗണന നൽകണമെന്നും ഭരണകക്ഷിയുടെ “ശത്രു” ആകാനോ അവരെ അധിക്ഷേപിക്കാനോ ശ്രമിക്കാതെ, സർക്കാരിനെ മികച്ച തീരുമാനങ്ങൾ എടുക്കാൻ സഹായിക്കുകയാണ് വേണ്ടതെന്നും അവർ കൂട്ടിച്ചേർത്തു. സോഷ്യൽ മീഡിയ ഉപയോക്താക്കൾ സ്വതന്ത്രമായി ചിന്തിക്കണമെന്നും ഓൺലൈൻ ട്രെൻഡുകളെ പിന്തുണയ്ക്കുകയോ ഏതെങ്കിലും ആശയങ്ങൾക്ക് വിധേയമായി ചിന്താഗതി മാറ്റുകയോ ചെയ്യരുതെന്നും അവർ അഭ്യർത്ഥിച്ചു.

വിദ്യാർത്ഥികളുടെ താല്പര്യങ്ങൾക്കാണ് മുൻഗണന നൽകുന്നതെങ്കിൽ അത് നല്ലതാണ്. എന്നാൽ പ്രതിഷേധങ്ങൾ നീറ്റ്, ചോദ്യപേപ്പർ ചോർച്ച, നാഷണൽ ടെസ്റ്റിംഗ് ഏജൻസി (NTA) തുടങ്ങിയ വിഷയങ്ങളിൽ നിന്ന് മാറി മതപരമായ കാര്യങ്ങളിലേക്കോ ബന്ധമില്ലാത്ത മറ്റ് വിഷയങ്ങളിലേക്കോ തിരിയുമ്പോൾ അതിന്റെ ലക്ഷ്യം മാറുകയാണ്,” അതിനാൽ ആളുകൾ ജാഗ്രത പാലിക്കണമെന്നും ദിവ്യജ ഓർമ്മിപ്പിച്ചു.

പരീക്ഷാ ക്രമക്കേടുകളിൽ മറുപടി വേണമെന്നും വിദ്യാഭ്യാസ സമ്പ്രദായത്തിൽ പരിഷ്കാരങ്ങൾ വരുത്തണമെന്നും പ്രധാൻ രാജിവെക്കണമെന്നും ആവശ്യപ്പെട്ട് സി.ജെ.പി (CJP) യുടെ നേതൃത്വത്തിലുള്ള സമരം ജൂൺ 20-നാണ് ജന്തർ മന്തറിൽ ആരംഭിച്ചത്. ജൂലൈ 20-ന് ഇവർ ‘സൻസദ് ചലോ’ മാർച്ചും സംഘടിപ്പിച്ചിരുന്നു.