കൊച്ചി: ശബരിമല അയ്യപ്പ സേവാ സമാജത്തിന്റെ (SASS) പുതിയ ദേശീയ ചെയർമാനായി ആർ. മുരുകൻ സെൽവനെ (കരാട്ടെ മുരുകൻ) ഏകകണ്ഠമായി തിരഞ്ഞെടുത്തു. ജൂൺ 7-ന് ചേർന്ന പ്രത്യേക ദേശീയ എക്സിക്യൂട്ടീവ് യോഗത്തിലാണ് ഈ നിർണായക തീരുമാനം. മുംബൈ കേന്ദ്രീകരിച്ച് പ്രവർത്തിക്കുന്ന പ്രശസ്ത കായികതാരവും എഴുത്തുകാരനും സംരംഭകനുമാണ് മുരുകൻ സെൽവൻ.
മുൻ ദേശീയ ചെയർമാൻ എസ്. ജെ. ആർ. കുമാർ സ്ഥാനമൊഴിഞ്ഞതിനെ തുടർന്നാണ് പുതിയ നിയമനം. മുതിർന്ന ട്രസ്റ്റിയും അന്നദാന കമ്മിറ്റി ചെയർമാനുമായ ടി. ബി. ശേഖർ ആണ് മുരുകൻ സെൽവന്റെ പേര് നിർദ്ദേശിച്ചത്. യോഗത്തിലുണ്ടായിരുന്ന മുഴുവൻ അംഗങ്ങളും ഈ നിർദ്ദേശത്തെ ഐകകണ്ഠ്യേന പിന്തുണയ്ക്കുകയായിരുന്നു. കഴിഞ്ഞ ഒരു വർഷമായി സമാജത്തിന്റെ വർക്കിംഗ് ചെയർമാനായി മികച്ച രീതിയിൽ പ്രവർത്തിച്ചു വരികയായിരുന്നു അദ്ദേഹം. അന്താരാഷ്ട്ര കരാട്ടെ കോൺഫറൻസിൽ ഇന്ത്യയെ പ്രതിനിധീകരിച്ചിട്ടുള്ള മുരുകൻ സെൽവന് കായികരംഗത്തെ സംഭാവനകൾക്ക് നിരവധി പുരസ്കാരങ്ങളും ലഭിച്ചിട്ടുണ്ട്.
ആർഎസ്എസ് മുതിർന്ന നേതാവ് എസ്. സേതുമാധവൻ, വി. കെ. വിശ്വനാഥൻ, എ. ആർ. മോഹനൻ, ദേശീയ ഓർഗനൈസിംഗ് സെക്രട്ടറി ഈറോഡ് രാജൻ തുടങ്ങിയ പ്രമുഖർ യോഗത്തിൽ പങ്കെടുത്ത് അദ്ദേഹത്തിന് ആശംസകൾ നേർന്നു.
18 വയസ്സ് പൂർത്തിയാകുന്ന ശബരിമല അയ്യപ്പ സേവാ സമാജത്തിന്റെ ബഹുമുഖ വളർച്ചയ്ക്കായി എല്ലാവരെയും ഒന്നിച്ച് ചേർത്ത് മുന്നോട്ട് കൊണ്ടുപോകും. സംഘടനയുടെ സേവന പ്രവർത്തനങ്ങൾ കൂടുതൽ മേഖലകളിലേക്ക് വ്യാപിപ്പിക്കാനും ഭക്തജന കൂട്ടായ്മയിലൂടെ സാമൂഹിക പരിവർത്തനം സാധ്യമാക്കാനും എന്റെ സമയവും അധ്വാനവും പൂർണ്ണമായി സമർപ്പിക്കും” എന്ന് നിയുക്ത ചെയർമാൻ മുരുകൻ സെൽവൻ വ്യക്തമാക്കി. രാജ്യത്തിനകത്തും വിദേശത്തും ഭക്തിയുടെയും സേവനത്തിന്റെയും ദൗത്യവുമായി മുന്നേറുന്ന സമാജത്തിന് ഈ പുതിയ നേതൃത്വം വലിയൊരു ഊർജ്ജമാകുമെന്നാണ് വിലയിരുത്തൽ.
