ന്യൂഡൽഹി: കേന്ദ്ര സർക്കാരിന്റെയും പ്രധാനമന്ത്രി നരേന്ദ്ര മോദിയുടെയും കടുത്ത വിമർശകനായ നടൻ പ്രകാശ് രാജ് വീണ്ടും വാർത്തകളിൽ നിറയുന്നു. സമൂഹമാധ്യമങ്ങളിൽ തരംഗമായി മാറിയ ‘കോക്രോച്ച് ജനതാ പാർട്ടി’ക്ക് (CJP) പരസ്യ പിന്തുണ പ്രഖ്യാപിച്ച് താരം രംഗത്തെത്തിയതാണ് പുതിയ ചർച്ചകൾക്ക് വഴിതുറന്നിരിക്കുന്നത്. യുവാക്കളുടെ ഈ സമൂഹമാധ്യമ കൂട്ടായ്മയ്ക്ക് ഐക്യദാർഢ്യം പ്രഖ്യാപിച്ച് ജൂൺ 6-ന് താൻ ദൽഹിയിലെത്തുമെന്നാണ് പ്രകാശ് രാജ് വ്യക്തമാക്കിയത്.

കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാനിന്റെ രാജി ആവശ്യപ്പെട്ട് കോക്രോച്ച് ജനതാ പാർട്ടി സ്ഥാപകൻ അഭിജീത് ദിപ്കെ ജൂൺ 6-ന് ഇന്ത്യയിൽ തിരിച്ചെത്തുമെന്ന് പ്രഖ്യാപിച്ചിരുന്നു. ദൽഹി വിമാനത്താവളത്തിൽ ഇറങ്ങുന്ന ഇദ്ദേഹത്തെ സ്വീകരിക്കാൻ നേരിട്ടെത്തുമെന്നാണ് പ്രകാശ് രാജ് അറിയിച്ചിരിക്കുന്നത്. സിനിമയുടെ തിരക്കേറിയ ഷൂട്ടിങ് ഷെഡ്യൂളുകൾക്കിടയിലും ഈ സമരവീര്യത്തിന് പിന്തുണയുമായി താൻ ഉണ്ടാകുമെന്ന് എക്സ് (ട്വിറ്റർ) ഹാൻഡിലിലൂടെ താരം വ്യക്തമാക്കി. പരിസ്ഥിതി പ്രവർത്തകൻ സോനം വാങ്ചുകിന്റെ കുറിപ്പ് പങ്കുവെച്ചുകൊണ്ടായിരുന്നു താരത്തിന്റെ ഈ പ്രതികരണം.

​”ഏറ്റവും പ്രസക്തമായ ഈ കോക്രോച്ച് പ്രസ്ഥാനത്തിന് ഐക്യദാർഢ്യം പ്രഖ്യാപിക്കാൻ ജൂൺ 6-ന് അവിടെയെത്താൻ ശ്രമിക്കുകയാണ്. ഒരു സിനിമയുടെ ഷൂട്ടിങ്ങുമായി ബന്ധപ്പെട്ട് ഞാൻ ഇപ്പോൾ വളരെ അകലെയാണ്. എങ്കിലും അവിടെയെത്താൻ പരമാവധി ശ്രമിക്കുന്നുണ്ട്. എല്ലാ യുവ ‘കോക്രോച്ചുകളോടും’ (അണികളോട്) അങ്ങോട്ട് ഇഴഞ്ഞുചെല്ലാൻ (എത്തിച്ചേരാൻ) ഞാൻ അഭ്യർത്ഥിക്കുന്നു,” പ്രകാശ് രാജ് കുറിച്ചു. തന്റെ പതിവ് ഹാഷ്‌ടാഗായ ‘#justasking’ (ചോദിക്കുകയാണ് മാത്രം) ഇതിനൊപ്പവും താരം ചേർത്തിട്ടുണ്ട്.

അതേസമയം, പ്രകാശ് രാജിന്റെ ഈ നീക്കത്തിനെതിരെ മോദി അനുകൂലികളും ബിജെപി അനുഭാവികളും സമൂഹമാധ്യമങ്ങളിൽ കടുത്ത വിമർശനവുമായി രംഗത്തെത്തിക്കഴിഞ്ഞു. കേന്ദ്ര ആഭ്യന്തര മന്ത്രി അമിത് ഷായാണ് രാജ്യം ഭരിക്കുന്നതെന്ന് ഓർക്കുന്നത് നന്നായിരിക്കുമെന്ന മുന്നറിയിപ്പുകളുമായി പലരും രംഗത്തെത്തിയതോടെ വിഷയം സൈബർ ഇടങ്ങളിൽ വലിയ തർക്കങ്ങൾക്ക് കാരണമായിട്ടുണ്ട്. വരും ദിവസങ്ങളിൽ ഈ രാഷ്ട്രീയ നീക്കം എങ്ങോട്ട് തിരിയുമെന്ന ഉറ്റുനോക്കലിലാണ് രാഷ്ട്രീയ കേന്ദ്രങ്ങൾ.