ലാഹോർ: പാകിസ്താനിലെ ലാഹോറിൽ നടന്ന വെടിവെയ്പ്പിൽ ലഷ്കർ-ഇ-തയ്ബ (LeT) സഹസ്ഥാപകനും ഹഫീസ് സഈദിന്റെ അടുത്ത അനുയായിയുമായ അമിർ ഹംസയ്ക്ക് ഗുരുതരമായി പരിക്കേറ്റു. സ്വകാര്യ ടെലിവിഷൻ ചാനൽ ഓഫിസിന് സമീപമാണ് അജ്ഞാതർ വെടിയുതിർത്തത്.

വാഹനത്തിൽ സഞ്ചരിക്കുകയായിരുന്ന ഹംസയെ ലക്ഷ്യമിട്ടായിരുന്നു ആക്രമണമെന്ന് റിപ്പോർട്ടുകൾ സൂചിപ്പിക്കുന്നു. സംഭവത്തിൽ ഗുരുതരമായി പരിക്കേറ്റ ഇയാളെ സമീപത്തെ ആശുപത്രിയിൽ പ്രവേശിപ്പിച്ചിരിക്കുകയാണ്. അദ്ദേഹത്തിന്റെ നില അതീവ ഗുരുതരമാണെന്നാണ് ലഭ്യമായ വിവരം. 

മോട്ടോർസൈക്കിളിൽ എത്തിയ രണ്ട് അക്രമികളാണ് വെടിവെച്ചതെന്ന് പോലീസ് വ്യക്തമാക്കി. ആക്രമണത്തിന് പിന്നാലെ പ്രതികൾ സ്ഥലത്തുനിന്ന് രക്ഷപ്പെട്ടു. പ്രദേശത്ത് വ്യാപകമായ തിരച്ചിൽ ആരംഭിച്ചിട്ടുണ്ടെന്നും സുരക്ഷ ശക്തമാക്കിയിട്ടുണ്ടെന്നും അധികൃതർ അറിയിച്ചു. 

അമിർ ഹംസ ലഷ്കർ-ഇ-തയ്ബയുടെ പ്രധാന നേതാക്കളിൽ ഒരാളായി പരിഗണിക്കപ്പെടുന്ന വ്യക്തിയാണ്. സംഘടനയുടെ പ്രവർത്തനങ്ങളിലും പ്രചാരണങ്ങളിലും നിർണായക പങ്കുവഹിച്ചിട്ടുള്ള ഇയാൾ നിരവധി ഭീകരപ്രവർത്തനങ്ങളുമായി ബന്ധപ്പെട്ട വ്യക്തിയെന്ന നിലയിലും അറിയപ്പെടുന്നു. 

കഴിഞ്ഞ ഒരു വർഷത്തിനിടെ ഹംസയ്ക്കെതിരായ രണ്ടാമത്തെ ആക്രമണമാണിതെന്ന് റിപ്പോർട്ടുകൾ സൂചിപ്പിക്കുന്നു. സംഭവത്തെ തുടർന്ന് ലാഹോർ നഗരത്തിൽ സുരക്ഷാ ക്രമീകരണങ്ങൾ ശക്തമാക്കിയിട്ടുണ്ട്.

ആക്രമണത്തിന് പിന്നിലെ കാരണം വ്യക്തമായിട്ടില്ല.