മുംബൈ: മഹാരാഷ്ട്ര നിയമസഭ തിരഞ്ഞെടുപ്പ് 2024-ഇൽ മുംബൈയിലെ ചാന്ദിവലി മണ്ഡലത്തിൽ ഉപയോഗിച്ച ഇവിഎം മെഷീനുകൾ കോടതി ഉത്തരവിനെ തുടർന്ന് ഏപ്രിൽ 16, 17 തീയതികളിൽ പരിശോധനയ്ക്ക് വിധേയമാക്കും. തിരഞ്ഞെടുപ്പ് ഫലം ചോദ്യം ചെയ്ത ഹർജിയുടെ അടിസ്ഥാനത്തിലാണ് ഈ അപൂർവ നടപടി.
മുംബൈ ഹൈക്കോടതിയുടെ അനുമതിയോടെയാണ് പരിശോധന നടക്കുന്നത്. കോൺഗ്രസ് നേതാവ് മുഹമ്മദ് ആരിഫ് ലാലൻ ഖാൻ സമർപ്പിച്ച ഹർജിയിലാണ് കോടതി ഇടപെട്ടത്. തെരഞ്ഞെടുപ്പിൽ ശിവസേന സ്ഥാനാർത്ഥി ദിലീപ് ലാണ്ടെയോട് ഖാൻ പരാജയപ്പെട്ടതിനെ തുടർന്നാണ് ഫലത്തെ ചോദ്യം ചെയ്ത് കോടതിയെ സമീപിച്ചത്.
സംസ്ഥാന തിരഞ്ഞെടുപ്പ് കമ്മീഷൻ ഇതിനായി സ്ഥാനാർത്ഥികളെ ഔദ്യോഗികമായി അറിയിച്ചിട്ടുണ്ട്. പരിശോധന രണ്ടുദിവസങ്ങളിലായി നടത്തും. ഇവിഎം നിർമ്മാതാക്കളായ ഭാരത് ഇലക്ട്രോണിക്സ് ലിമിറ്റഡ് (BEL) ആണ് സാങ്കേതിക പരിശോധന നിർവഹിക്കുക. സ്ഥാനാർത്ഥികൾക്കും അവരുടെ പ്രതിനിധികൾക്കും പരിശോധന സമയത്ത് സന്നിഹിതരാകാൻ അനുമതി നൽകിയിട്ടുണ്ട്.
പരിശോധന സാങ്കേതിക പരിശോധനയായിരിക്കും. കൺട്രോൾ യൂണിറ്റ്, ബാലറ്റ് യൂണിറ്റ്, വി.വി.പി.എ.ടി എന്നിവയിലെ പ്രധാന ഘടകങ്ങൾ പരിശോധിച്ച് യന്ത്രങ്ങളുടെ പ്രവർത്തനക്ഷമത ഉറപ്പാക്കുന്നതാണ് ലക്ഷ്യം.
തിരഞ്ഞെടുപ്പിന് ശേഷം സ്ഥാനാർത്ഥികളുടെ സാന്നിധ്യത്തിൽ ഇത്തരത്തിലുള്ള ഇവിഎം പരിശോധന നടക്കുന്നത് അപൂർവമാണ്. രാജ്യത്ത് ഇവിഎം വിശ്വാസ്യതയെക്കുറിച്ചുള്ള ചർച്ചകൾ ശക്തമായ സാഹചര്യത്തിലാണ് ഈ നടപടി ശ്രദ്ധ നേടുന്നത്.
