മുംബൈ: നഗരത്തിന് കുടിവെള്ളം നൽകുന്ന ഏഴ് തടാകങ്ങളിലെ ജലശേഖരം നിലവിൽ ഏകദേശം 35 ശതമാനമായി കുറഞ്ഞെങ്കിലും, അടുത്ത 100 ദിവസത്തേക്ക് ജല വിതരണം തുടരാൻ മതിയായ ശേഖരം ഉണ്ടെന്ന് അധികൃതർ വ്യക്തമാക്കി. നിലവിൽ ജലവിതരണത്തിൽ അടിയന്തര നിയന്ത്രണങ്ങൾ ഏർപ്പെടുത്തേണ്ട സാഹചര്യമില്ലെന്നാണ് വിലയിരുത്തൽ.

ബൃഹൻമുംബൈ മുനിസിപ്പൽ കോർപ്പറേഷൻ (ബി.എം.സി) അധികൃതർ വ്യക്തമാക്കുന്നതനുസരിച്ച്, മഴക്കാലം തുടങ്ങുന്നതുവരെ ലഭ്യമായ ജലസ്രോതസ്സുകൾ കൃത്യമായി വിനിയോഗിച്ചാൽ നഗരവാസികൾക്ക് പ്രതിസന്ധി നേരിടേണ്ടിവരില്ല. എന്നാൽ ചൂട് കൂടുന്നതോടെ ജലോപയോഗം ഉയരാൻ സാധ്യതയുണ്ടെന്ന ആശങ്കയും നിലനിൽക്കുന്നു.

ഇതിനിടെ, സ്ഥിതി ഗതികൾ വിലയിരുത്താൻ സമഗ്ര സർവേ നടത്തണമെന്ന ആവശ്യം കോർപ്പറേറ്റർമാർ മുന്നോട്ടുവച്ചു. ഭാവിയിൽ ജലക്ഷാമം ഒഴിവാക്കാൻ മുൻകരുതൽ നടപടികൾ ശക്തമാക്കണമെന്നും അവർ ആവശ്യപ്പെട്ടു.

മഴ എത്തുന്നതുവരെ ജലസംരക്ഷണം അനിവാര്യമാണെന്ന് അധികൃതർ ആവർത്തിച്ച് മുന്നറിയിപ്പ് നൽകി. നഗരവാസികൾ ഉത്തരവാദിത്വത്തോടെ വെള്ളം ഉപയോഗിക്കണമെന്ന നിർദേശവും നൽകിയിട്ടുണ്ട്.